මහණෙනි, පුද්ගලයෝ සතර දෙනෙක් ලෝකයෙහි පැහැදිලි ව දකින්නට සිටිති. ඒ කවර සතර දෙනෙක් ද යත්;
සවන් දීමෙන් ලැබෙන ප්‍රයෝජන නොලත් අල්පශ්‍රැතයා, සවන් දීමෙන් ලැබෙන ප්‍රයෝජනය ලත් අල්පශ්‍රැතයා, සවන් දීමෙන් ලැබෙන ප්‍රයෝජන නොලත් බහුශ්‍රැතයා, සවන් දීමෙන් ලැබෙන ප්‍රයෝජනය ලත් බහුශ්‍රැතයා,
1. මහණෙනි, සවන් දීමෙන් ලැබෙන ප්‍රයෝජනය නොලත් අල්පශ්‍රැතයා යනු කවුද? මහණෙනි, මෙහිලා කිසියම් පුද්ගලයෙක් විසින් සුත්ත, ගෙය්ය, වෙය්‍යාකරණ, ගාථා, උදාන, ඉතිවුත්තක, ජාතක, අබ්භූතධම්ම, වේදල්ල යන නවාංග ශාස්තෘ ශාසනය අල්ප වශයෙන් අසන ලද්දේ වෙයි. ඒ තැනැත්තා අල්ප වශයෙන් ඇසූ ඒ කරුණු පිළිබඳ ව තේරුම් නොගෙන, ඒ ධර්මය වටහා නොගෙන, ධර්මානුකූල ජීවිතයකට නොබැසගත්තේ වෙයි. මහණෙනි, මෙසේ මේ පුද්ගලයා සවන් දීමෙන් ලැබෙන ප්‍රයෝජනය නොලත් අල්පශ්‍රැතයෙක් වෙයි.
2. මහණෙනි, සවන් දීමෙන් ලැබෙන ප්‍රයෝජනය ලත් අල්පශ්‍රැතයා යනු කවුද? මහණෙනි, මෙහිලා කිසියම් පුද්ගලයෙක් විසින් සුත්ත, ගෙය්ය, වෙය්‍යාකරණ, ගාථා, උදාන, ඉතිවුත්තක, ජාතක, අබ්භූතධම්ම, වේදල්ල යන නවාංග ශාස්තෘ ශාසනය අල්ප වශයෙන් අසන ලද්දේ වෙයි. ඒ තැනැත්තා අල්ප වශයෙන් ඇසූ ඒ කරුණු පිළිබඳ ව තේරුම් ගෙන, ඒ ධර්මය වටහා ගෙන, ධර්මානුකූල ජීවිතයකට බැසගත්තේ වෙයි. මහණෙනි, මෙසේ මේ පුද්ගලයා සවන් දීමෙන් ලැබෙන ප්‍රයෝජනය ලත් අල්පශ්‍රැතයෙක් වෙයි.
3. මහණෙනි, සවන් දීමෙන් ලැබෙන ප්‍රයෝජනය නොලත් බහුශ්‍රැතයා යනු කවුද? මහණෙනි, මෙහිලා කිසියම් පුද්ගලයෙක් විසින් සුත්ත, ගෙය්ය, වෙය්‍යාකරණ, ගාථා, උදාන, ඉතිවුත්තක, ජාතක, අබ්භූතධම්ම, වේදල්ල යන නවාංග ශාස්තෘ ශාසනය බොහෝ කොට අසන ලද්දේ වෙයි. ඒ තැනැත්තා බොහෝ කොට ඇසූ ඒ කරුණු පිළිබඳ ව තේරුම් නොගෙන, ඒ ධර්මය වටහා නොගෙන, ධර්මානුකූල ජීවිතයකට නොබැසගත්තේ වෙයි. මහණෙනි, මෙසේ මේ පුද්ගලයා සවන් දීමෙන් ලැබෙන ප්‍රයෝජනය නොලත් බහුශ්‍රැතයෙක් වෙයි.
4. මහණෙනි, සවන් දීමෙන් ලැබෙන ප්‍රයෝජනය ලත් බහුශ්‍රැතයා යනු කවුද? මහණෙනි, මෙහිලා කිසියම් පුද්ගලයෙක් විසින් සුත්ත, ගෙය්ය, වෙය්‍යාකරණ, ගාථා, උදාන, ඉතිවුත්තක, ජාතක, අබ්භූතධම්ම, වේදල්ල යන නවාංග ශාස්තෘ ශාසනය බොහෝ කොට අසන ලද්දේ වෙයි. ඒ තැනැත්තා බොහෝ කොට ඇසූ ඒ කරුණු පිළිබඳ ව තේරුම් ගෙන, ඒ ධර්මය වටහා ගෙන, ධර්මානුකූල ජීවිතයකට බැසගත්තේ වෙයි. මහණෙනි, මෙසේ මේ පුද්ගලයා සවන් දීමෙන් ලැබෙන ප්‍රයෝජනය ලත් බහුශ්‍රැතයෙක් වෙයි.
මහණෙනි, මේ සතර පුද්ගලයෝ ලෝකයෙහි දකින්නට සිටිති.
ඉදින් ධර්මය අසන ලද්දේ ත් අල්ප වශයෙන් නම්, සීලය ත් නොපුරයි නම්, ඒ තැනැත්තා සීලයෙනුත්, ශ්‍රැතයෙනුත් යන මේ දෙඅංශයෙන් ම ගැරහීමට ලක්වෙයි.
ඉදින් ස්වල්පයක් නමුත් ධර්මය අසන ලද්දේ නම්, සීලය ත් පුරයි නම් ඒ තැනැත්තා සීලයෙන් ප්‍රශංසා ලබන්නේ වෙයි. එනමුදු ශ්‍රැතය සම්පූර්ණ වී නැත.
ඉදින් යමෙක් බොහෝ කොට ධර්මය අසන ලද්දේ ද, එහෙත් සිල් නොපුරයි ද, ඔහු සීලය සම්බන්ධයෙන් ගැරහුම් ලබයි. ශ්‍රැතය සම්පූර්ණ වී ඇත්තේ ය.
ඉදින් යමෙක් බොහෝ කොට ධර්මය අසන ලද්දේ ද, සීලය පුරන්නේ ත් වෙයි ද, සීලයෙනුත්, ශ්‍රැතයෙනුත් යන මේ දෙඅංශයෙන් ම ඔහු ප්‍රශංසාවට බඳුන් වෙයි.
බහුශ්‍රැත වූ, ධර්මධර වූ, ප්‍රඥා සම්පන්න වූ බුද්ධ ශ්‍රාවකයා ඉතා දිළිසෙන වටිනා රනක් මෙන් බබලයි. ඒ ශ්‍රාවකයා හට ගරහන්නට කවරෙකුට නම් හැකි වෙයි ද? ඔහුට දෙවියෝ පවා ප්‍රශංසා කරති. බ්‍රහ්මරාජයා විසිනුත් පසසන ලද්දේ ය.
අප්පස්සුත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M