මහණෙනි, පුද්ගලයෝ සතර දෙනෙක් ලෝකයෙහි පැහැදිලි ව දකින්නට සිටිති. ඒ කවර සතර දෙනෙක් ද යත්;
අනුසෝතගාමී පුද්ගලයා, පටිසෝතගාමී පුද්ගලයා, ඨිතත්ත පුද්ගලයා සහ සැඩ පහරින් එතෙර ව ගොඩබිමෙහි පිහිටි නිකෙලෙස් පුද්ගලයා වශයෙනි.
1. මහණෙනි, ‘අනුසෝතගාමී’ හෙවත් සැඩපහරට අනුව යන පුද්ගලයා කවුද? මහණෙනි, මෙහිලා ඇතැම් පුද්ගලයෙක් පංච කාමයන් සේවනය කරයි. පව් ද කරයි. මහණෙනි, මේ පුද්ගලයා ගසා ගෙන සැඩ පහරට අනුව යන්නා යැයි කියනු ලැබේ.
2. මහණෙනි, ‘පටිසෝතගාමී’ හෙවත් සැඩපහරට එරෙහි ව යන පුද්ගලයා කවුද? මහණෙනි, මෙහිලා ඇතැම් පුද්ගලයෙක් පංච කාමයන් සේවනය නොකරයි. පාප කර්මයකුත් නොකරයි. දුකින් යුක්ත ව, දොම්නසින් යුක්ත ව, කඳුළු වැකුණු මුහුණින් යුක්ත ව, හඬමින් වීරිය ගෙන, පිරිපුන් අයුරින් බඹසරෙහි හැසිරෙයි. මහණෙනි, මේ තැනැත්තා සැඩ පහරට එරෙහි ව යන පුද්ගලයා යැයි කියනු ලැබේ.
3. මහණෙනි, ‘ඨිතත්ත’ හෙවත් තමා ධර්මය තුළ පිහිටුවා ගත් පුද්ගලයා යනු කවුද? මහණෙනි, මෙහි ඇතැම් පුද්ගලයෙක් ඕරම්භාගීය සංයෝජනයන් ක්ෂය කොට ඕපපාතික ව සුද්ධාවාස බඹලොව උපදියි. ඒ ලෝකයෙන් නැවත මෙලොවට නොපැමිණෙන ස්වභාවයෙන් යුතුව එහිදී ම පිරිනිවන් පාන්නේ වෙයි. මහණෙනි, මොහු ඨිතත්ත හෙවත් තමා ධර්මය තුළ පිහිටුවා ගත් පුද්ගලයා යැයි කියනු ලැබේ.
4. මහණෙනි, ‘සැඩපහර තරණය කොට එතෙර වී ගොඩබිම නම් වූ නිවනෙහි පිහිටි බ්‍රාහ්මණයා’ නම් වූ තැනැත්තා කවුද? මහණෙනි, මෙහිලා ඇතැම් පුද්ගලයෙක් ආශ්‍රවයන්ගේ ක්ෂය වීමෙන් ආශ්‍රව රහිත වූ චිත්ත විමුක්තිය ත්, ප්‍රඥා විමුක්තිය ත් මේ ජීවිතයේ දී ම තම විශිෂ්ට නුවණින් අත්දැක එය තුළ වාසය කරයි. මහණෙනි, මේ පුද්ගලයා සැඩපහර තරණය කොට එතෙර වී ගොඩබිම නම් වූ නිවනෙහි පිහිටි බ්‍රාහ්මණයා යැයි කියනු ලැබේ.
මහණෙනි, මේ සතර පුද්ගලයෝ ලෝකයෙහි පැහැදිලි ව දකින්නට සිටිති.
යම්කිසි ජනතාවක් කාමයන්හී අසංවර ව රාගය ප්‍රහාණය නොකොට මෙලොවෙහි කාමභෝගී ව වාසය කරත් ද, තෘෂ්ණාවෙන් බැසගත් ඔවුහු නැවත නැවත ඉපදෙන දිරන ලෝකයට ම පැමිණෙති. ඔවුහු ඒ සැඩ පහරට අනුව යන්නා වූ පුද්ගලයෝ ය.
එහෙයින් නුවණැති තැනැත්තා මේ ජීවිතය තුළ මැනැවින් සිහිය පිහිටුවා ගෙන පංච කාමයනුත්, පාපය ත් සේවනය නොකොට ඉතා දුක සේ නමුත් කාමයන් අත්හරින්නේ ය. එබඳු පුද්ගලයා හට සැඩ පහරට එරෙහි ව යන්නා යැයි කියනු ලැබේ.
යම්කිසි ආර්ය ශ්‍රාවකයෙක් ඒකාන්තයෙන් ම පංච ඕරම්භාගීය සංයෝජනයන් ප්‍රහාණය කොට සම්පූර්ණ හික්මීමකින් යුතුව, නොපිරිහෙන ස්වභාවයෙන් යුතුව, මැනැවින් දමනය කළ සිතින් යුතුව, සංසුන් කරගත් ඉඳුරන් ඇතිව වාසය කරයි නම්, ඒ ශ්‍රාවකයා ඒකාන්තයෙන් ම ඨිතත්ත හෙවත් ධර්මය තුළ තමා ව පිහිටුවා ගත් පුද්ගලයා යැයි කියනු ලැබේ.
යමෙකු විසින් කුසලාකුසල කර්මයන් නුවණින් දැන අකුසල් වනසන ලද්දේ ද, පව් නසන ලද්දේ ද, ඔහු තුළ කිසි පාපයක් නොපෙනේ ද, ඒ තැනැත්තා නුවණින් අගපත් වූ, බඹසර වාසය නිම කළ, ලොවෙහි කෙළවරට ගිය, සැඩපහරින් එතෙර වූ කෙනා යැයි කියනු ලැබේ.
අනුසෝත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M