මහණෙනි, සතර දෙනෙකු කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි. ඒ කවර සතර දෙනෙකු කෙරෙහි ද යත්;
1. මහණෙනි, තම මව් කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි.
2. මහණෙනි, තම පියා කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි.
3. මහණෙනි, තථාගතයන් වහන්සේ කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි.
4. මහණෙනි, තථාගත ශ්‍රාවකයා කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි.
මහණෙනි, මේ සතර දෙනා කෙරෙහි වැරදි ලෙස පිළිපන් බාල වූ, අව්‍යක්ත වූ අසත්පුරුෂයා සාරා ගත් ගුණ ඇති ව, වනසා ගත් ගුණ ඇති ජීවිතයක් පරිහරණය කරයි. දොස් සහිත වූයේ වෙයි. නැණවතුනට දොස් සහිත වූවෙක් ද වෙයි. බොහෝ පව් ද රැස් කරයි.
මහණෙනි, සතර දෙනෙකු කෙරෙහි යහපත් ලෙස පිළිපන් නුවණැති, ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි. ඒ කවර සතර දෙනෙකු කෙරෙහි ද යත්;
1. මහණෙනි, තම මව් කෙරෙහි යහපත් ලෙස පිළිපන් නුවණැති, ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි.
2. මහණෙනි, තම පියා කෙරෙහි යහපත් ලෙස පිළිපන් නුවණැති, ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි.
3. මහණෙනි, තථාගතයන් වහන්සේ කෙරෙහි යහපත් ලෙස පිළිපන් නුවණැති, ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි.
4. මහණෙනි, තථාගත ශ්‍රාවකයා කෙරෙහි යහපත් ලෙස පිළිපන් නුවණැති, ව්‍යක්ත වූ සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි.
මහණෙනි, මේ සතර දෙනා කෙරෙහි යහපත් ලෙස පිළිපන් නුවණැති, ව්‍යක්ත වූ, සත්පුරුෂයා සාරා නොගත් ගුණ ඇති ව, වනසා නොගත් ගුණ ඇති ජීවිතයක් පරිහරණය කරයි. නිදොස් වූයේ වෙයි. නැණවතුනට දොස් රහිත වූවෙක් ද වෙයි. බොහෝ පින් ද රැස් කරයි.
යමෙක් තම මව් කෙරෙහි ද, තම පියා කෙරෙහි ද වරදවා පිළිපන්නේ නම්, සම්බුද්ධත්වයට පත් තථාගතයන් වහන්සේ කෙරෙහි ද, තථාගත ශ්‍රාවකයා කෙරෙහි ද වරදවා පිළිපන්නේ නම්, එබඳු වූ මනුෂ්‍යයා බොහෝ පව් රැස් කරගන්නේ ය.
මව් පිය ආදීන් කෙරෙහි කළ ඒ අධර්ම චර්යාව හේතුවෙන් නැණවත්හු ඔහුට මෙලොව දී ම ගරහති. මෙයින් චුත වූ විට අපායෙහි උපදියි.
යමෙක් මව් කෙරෙහි ද, තම පියා කෙරෙහි ද යහපත් ලෙස පිළිපන්නේ නම්, සම්බුද්ධත්වයට පත් තථාගතයන් වහන්සේ කෙරෙහි ද, තථාගත ශ්‍රාවකයා කෙරෙහි ද යහපත් ලෙස පිළිපන්නේ නම්, එබඳු වූ මනුෂ්‍යයා බොහෝ පින් රැස් කරගන්නේ ය.
මව් පිය ආදීන් කෙරෙහි කළ ඒ ධර්ම චර්යාව හේතුවෙන් නැණවත්හු ඔහුට මෙලොව දී ම ප්‍රශංසා කරති. මෙයින් චුත වූ විට සුගතියෙහි ඉපිද සතුටු වෙයි.
දුතිය ඛත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-1-1-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M