38. පින්වත් මහණෙනි, අශ්ව පැටව් තුන් දෙනෙක් ගැනත්, පුරුෂ පැටව් තුන් දෙනෙක් ගැනත් දේශනා කරන්නම්. එය සවන් යොමා අසන්න. ….(පෙ)….
පින්වත් මහණෙනි, අශ්ව පැටව් තුන් දෙනා යනු කවුද? පින්වත් මහණෙනි, මෙහිලා ඇතැම් අශ්ව පැටියෙක් ජවසම්පන්නයි. නමුත් වර්ණසම්පන්න නෑ. ආරෝහපරිනාහසම්පන්න නෑ. ඒ වගේම පින්වත් මහණෙනි, මෙහිලා ඇතැම් අශ්ව පැටියෙක් ජවසම්පන්න නමුත් වර්ණසම්පන්න නමුත් ආරෝහපරිනාහ සම්පන්න නෑ. පින්වත් මහණෙනි, මෙහිලා ඇතැම් අශ්ව පැටියෙක් ජවසම්පන්න වගේම, වර්ණසම්පන්න වගේම, ආරෝහපරිනාහසම්පන්නයි. පින්වත් මහණෙනි, මේ තමයි අශ්ව පැටව් තුන්දෙනා.
පින්වත් මහණෙනි, පුරුෂ පැටව් තුන් දෙනා යනු කවුද? පින්වත් මහණෙනි, මෙහිලා ඇතැම් පුරුෂ පැටියෙක් ජවසම්පන්නයි. නමුත් වර්ණසම්පන්න නෑ. ආරෝහපරිනාහසම්පන්න නෑ. ඒ වගේම පින්වත් මහණෙනි, මෙහිලා ඇතැම් පුරුෂ පැටියෙක් ජවසම්පන්න නමුත් වර්ණසම්පන්න නමුත් ආරෝහපරිනාහ සම්පන්න නෑ. පින්වත් මහණෙනි, මෙහිලා ඇතැම් පුරුෂ පැටියෙක් ජවසම්පන්න වගේම, වර්ණසම්පන්න වගේම, ආරෝහපරිනාහසම්පන්නයි. පින්වත් මහණෙනි, මේ තමයි පුරුෂ පැටව් තුන්දෙනා.
පින්වත් මහණෙනි, පුරුෂ පැටියා ජවසම්පන්න වෙන්නෙත්, වර්ණසම්පන්න නොවෙන්නෙත්, ආරෝහපරිනාහසම්පන්න නොවෙන්නෙත් කොහොමද?
පින්වත් මහණෙනි, මෙහිලා භික්ෂුව ‘මෙය තමයි දුක’ කියලා ඇතිසැටියෙන්ම දැනගන්නවා. ‘මේ තමයි දුකේ හටගැනීම’ කියලා ඇතිසැටියෙන්ම දැනගන්නවා. ‘මේ තමයි දුක නිරුද්ධ වීම’ කියලා ඇතිසැටියෙන්ම දැනගන්නවා. ‘මෙය තමයි දුක නැතිවීම පිණිස පවතින ප්‍රතිපදාව’ කියලා ඇතිසැටියෙන්ම දැනගන්නවා. මෙය ඔහුගේ ජවය කියලයි මා කියන්නේ. නමුත් අභිධර්මය පිළිබඳව, අභිවිනය පිළිබඳව ප්‍රශ්නයක් ඇසූ විට පසුබසිනවා. විසඳන්නේ නෑ. මෙය ඔහුගේ වර්ණසම්පන්න නොවන බව කියලයි මා කියන්නේ. ඒ වගේම චීවර, පිණ්ඩපාත, සේනාසන, ගිලන්පස, බෙහෙත් පිරිකර ලබන සුළු කෙනෙක් නොවෙයි. මෙය ඔහුගේ ආරෝහ පරිනාහසම්පන්නබව නැතිකම කියලයි මා කියන්නේ. පින්වත් මහණෙනි, මේ ආකාරයට පුරුෂ පැටියා ජවසම්පන්න වෙනවා. ඒත් වර්ණසම්පන්න නෑ. ආරෝහපරිනාහසම්පන්න නෑ.
පින්වත් මහණෙනි, පුරුෂ පැටියා ජවසම්පන්න වෙන්නෙත්, වර්ණසම්පන්න වෙන්නෙත්, ආරෝහපරිනාහසම්පන්න නොවෙන්නෙත් කොහොමද?
පින්වත් මහණෙනි, මෙහිලා භික්ෂුව ‘මෙය තමයි දුක’ කියලා ඇතිසැටියෙන්ම දැනගන්නවා. ….(පෙ)…. ‘මෙය තමයි දුක නැතිවීම පිණිස පවතින ප්‍රතිපදාව’ කියලා ඇතිසැටියෙන්ම දැනගන්නවා. මෙය ඔහුගේ ජවය කියලයි මා කියන්නේ. අභිධර්මය පිළිබඳව, අභිවිනය පිළිබඳව ප්‍රශ්නයක් ඇසූ විට පසුබසින්නේ නෑ. විසඳනවා. මෙය ඔහුගේ වර්ණසම්පන්න බව කියලයි මා කියන්නේ. නමුත් චීවර, පිණ්ඩපාත, සේනාසන, ගිලන්පස, බෙහෙත් පිරිකර ලබන සුළු කෙනෙක් නොවෙයි. මෙය ඔහුගේ ආරෝහ පරිනාහ සම්පන්නබව නැතිකම කියලයි මා කියන්නේ. පින්වත් මහණෙනි, මේ ආකාරයට පුරුෂ පැටියා ජවසම්පන්න වෙනවා. වර්ණසම්පන්න වෙනවා. නමුත් ආරෝහපරිනාහසම්පන්න නෑ.
පින්වත් මහණෙනි, පුරුෂ පැටියා ජවසම්පන්න වෙන්නෙත්, වර්ණසම්පන්න වෙන්නෙත්, ආරෝහපරිනාහ සම්පන්න වෙන්නෙත් කොහොමද?
පින්වත් මහණෙනි, මෙහිලා භික්ෂුව ‘මෙය තමයි දුක’ කියලා ඇතිසැටියෙන්ම දැනගන්නවා. ….(පෙ)…. ‘මෙය තමයි දුක නැතිවීම පිණිස පවතින ප්‍රතිපදාව’ කියලා ඇතිසැටියෙන්ම දැනගන්නවා. මෙය ඔහුගේ ජවය කියලයි මා කියන්නේ. අභිධර්මය පිළිබඳව, අභිවිනය පිළිබඳව ප්‍රශ්නයක් ඇසූ විට පසුබසින්නේ නෑ. විසඳනවා. මෙය ඔහුගේ වර්ණසම්පන්න බව කියලයි මා කියන්නේ. ඒ වගේම චීවර, පිණ්ඩපාත, සේනාසන, ගිලන්පස, බෙහෙත් පිරිකර ලබන සුළු කෙනෙක් වෙනවා. මෙය ඔහුගේ ආරෝහ පරිනාහසම්පන්නබව කියලයි මා කියන්නේ. පින්වත් මහණෙනි, මේ ආකාරයට පුරුෂ පැටියා ජවසම්පන්න වෙනවා. වර්ණසම්පන්න වෙනවා. ආරෝහපරිනාහ සම්පන්න වෙනවා.
පින්වත් මහණෙනි, මේ තමයි පුරුෂ පැටව් තුන් දෙනා.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-3-4-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M