35. පින්වත් මහණෙනි, කෙඳිවලින් වියන ලද යම්කිසි වස්ත්‍රයක් ඇතිනම් ඒ වස්ත්‍ර අතුරින් කේසකම්බිලිය (කෙස්වලින් වියන ලද වස්ත්‍රය) ඉතාම පහත් කියලයි කියන්නේ. පින්වත් මහණෙනි, කේසකම්බිලිය සීතල වෙලාවට සීතලයි. උණුසුම් වෙලාවට ඌෂ්ණයි. දුර්වර්ණයි. දුර්ගන්ධයි. එහි පහසත් දුකයි. අන්න ඒ වගේම තමයි පින්වත් මහණෙනි, ශ්‍රමණයින්ගේ යම්කිසි මහත් මතවාදයන් ඇද්ද, ඒවා අතරින් මක්ඛලී ගෝසාලගේ මතය තමයි ඉතාමත්ම පහත්ය කියල කියන්නේ.
පින්වත් මහණෙනි, මක්ඛලී නම් වූ හිස් පුරුෂයා මෙබඳු මතවාදයක්, මෙබඳු දෘෂ්ටියක් තමයි පවසන්නේ. ‘කර්මය නැත. ක්‍රියාව නැත. වීරිය නැත’ කියලයි.
පින්වත් මහණෙනි, අතීතයේ යම්කිසි අරහත් සම්මා සම්බුදුරජාණන් වහන්සේලා වැඩසිටියා නම්, ඒ භාග්‍යවතුන් වහන්සේලා පවා කර්මවාදී වුනා. ක්‍රියාවාදී වුනා. විරියවාදී වුනා. පින්වත් මහණෙනි, ඒත් මේ මක්ඛලී කියන හිස් පුරුෂයා ‘කර්මය නැත, ක්‍රියාව නැත, වීරිය නැත’ කියල ඒ බුදුවරයන් වහන්සේලාත් ප්‍රතික්ෂේප කරනවා.
පින්වත් මහණෙනි, අනාගතයේ යම්කිසි අරහත් සම්මා සම්බුදුරජාණන් වහන්සේලා පහළ වෙනවා නම්, ඒ භාග්‍යවතුන් වහන්සේලා පවා කර්මවාදී වෙනවා. ක්‍රියාවාදී වෙනවා. විරියවාදී වෙනවා. පින්වත් මහණෙනි, ඒත් මේ මක්ඛලී කියන හිස් පුරුෂයා ‘කර්මය නැත, ක්‍රියාව නැත, වීරිය නැත’ කියල ඒ බුදුවරයන් වහන්සේලාත් ප්‍රතික්ෂේප කරනවා.
පින්වත් මහණෙනි, මෙකල අරහත් සම්මා සම්බුදුරජාණන් වහන්සේ වන මමද කර්මවාදී කෙනෙක්. ක්‍රියාවාදී කෙනෙක්. විරියවාදී කෙනෙක්. පින්වත් මහණෙනි, ඒත් මේ මක්ඛලී කියන හිස් පුරුෂයා ‘කර්මය නැත, ක්‍රියාව නැත, වීරිය නැත’ කියල මාවත් ප්‍රතික්ෂේප කරනවා.
පින්වත් මහණෙනි, ඒක හරියට මේ වගේ දෙයක්. ගං මෝයක කෙමනක් අටවලා තියෙනවා. එය බොහෝ මත්ස්‍යයින්ගේ අයහපත පිණිස, දුක පිණිස, අවාසනාව පිණිස, විනාශය පිණිස හේතු වෙනවා. අන්න ඒ වගේම තමයි පින්වත් මහණෙනි, ඔය මක්ඛලී කියන හිස් පුරුෂයා බොහෝ සත්වයින්ගේ අහිත පිණිස, දුක පිණිස, අවාසනාව පිණිස, විනාශය පිණිස ලෝකයෙහි ඉපදිලා ඉන්න මිනිස් කෙමනක් වගෙයි.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-3-4-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M