එදා ආයුෂ්මත් අනුරුද්ධ තෙරුන් ආයුෂ්මත් සැරියුත් තෙරුන් වැඩසිටි තැනට පැමිණියා. පැමිණ ආයුෂ්මත් සැරියුත් තෙරුන් සමඟ පිළිසඳර කථාබහෙන් සතුටු වුනා. සතුටු විය යුතු සිහි කළ යුතු කථාව නිම කොට එකත්පස්ව වාඩිවුනා. එකත්පස්ව වාඩිවුන ආයුෂ්මත් අනුරුද්ධ තෙරුන් ආයුෂ්මත් සාරිපුත්ත තෙරුන්ට මෙකරුණ පැවසුවා.
“ප්‍රිය ආයුෂ්මත් සාරිපුත්තයන් වහන්ස, මෙහි මම මිනිස් දර්ශන පථය ඉක්මවා ගිය පිරිසිදු දිවැසින් දහසක් ලෝක බලනවා. මා තුළ පටන් ගත් වීරිය තියෙනවා. ඒ වීරිය සැඟවෙලා නෑ. සිහිය හොඳින් පිහිටලා තියෙනවා. මුලා වෙලා නෑ. කයත් සැහැල්ලුයි. බරක් නෑ. සිත සමාහිත වෙලයි තියෙන්නේ. එකඟ වෙලයි තියෙන්නේ. ඒ වුනත් මගේ සිත කිසිවකට ග්‍රහණය නොවී ආශ්‍රවයන්ගෙන් නිදහස් වෙන්නේ නෑ.”
[සාරිපුත්තයන් වහන්සේ;]
“ප්‍රිය ආයුෂ්මත් අනුරුද්ධ, යම් හෙයකින් ඔබට මෙහෙම සිතෙනවා නෙව. ‘මං මේ විදිහට මිනිස් දර්ශන පථය ඉක්මවා ගිය පිරිසිදු දිවැසින් දහසක් ලෝකයන් බලනවා’ කියලා. ඔය අදහස තියෙන්නේ ඔබගේ මානය තුළයි.
ප්‍රිය ආයුෂ්මත් අනුරුද්ධ, යම් හෙයකින් ඔබට මෙහෙමත් සිතෙනවා නෙව. ‘මා තුළ පටන්ගත් වීරිය තියෙනවා. ඒ වීරිය සැඟවිලා නෑ. සිහිය හොඳින් පිහිටලා තියෙනවා. මුලා වෙලා නෑ. කයත් සැහැල්ලුයි. බරක් නෑ. සිත සමාහිත වෙලයි තියෙන්නේ. එකඟ වෙලයි තියෙන්නේ’ කියලා. ඔය අදහස තියෙන්නේ ඔබගේ සිතේ විසිරීම තුළයි.
ප්‍රිය ආයුෂ්මත් අනුරුද්ධ, යම් හෙයකින් ඔබට මෙහෙමත් සිතෙනවා නෙව. ‘ඒ වුනත් මගේ සිත කිසිවකට ග්‍රහණය නොවී ආශ්‍රවයන්ගෙන් නිදහස් වෙන්නේ නෑ’ කියලා. ඔය අදහස තියෙන්නේ ඔබගේ පසුතැවීම තුළයි.
ප්‍රිය ආයුෂ්මත් අනුරුද්ධයන් ඔය කාරණා තුන ප්‍රහාණය කරලා, ඔය කාරණා තුන සිහි නොකොට ඒ අමා නිවනට සිත යොමු කිරීම තමයි හොඳ.”
එතකොට ආයුෂ්මත් අනුරුද්ධ තෙරුන් පසු කාලයේදී මේ කාරණා තුන ප්‍රහාණය කරලා, මේ කාරණා තුන සිහි නොකොට, ඒ අමා නිවනට සිත යොමු කළා. ඉතින් ආයුෂ්මත් අනුරුද්ධ තෙරුන් තනිව වාසය කළා. හුදෙකලා වුනා. අප්‍රමාදීව කෙලෙස් තවන වීරියෙන් යුතුව, දහමට දිවි පුදා වාසය කරද්දී යම් අර්ථයක් පිණිස පින්වත් කුල පුත්‍රයන් මැනැවින් ගිහිගෙයින් නික්ම බුදු සසුනේ පැවිද්ද ලබනවා නම්, නොබෝ කලකින්ම ඒ අනුත්තර වූ බඹසර ජීවිතයේ කෙළවර වන අරහත්වය තමා විසින්ම උපදවා ගත් විශිෂ්ට වූ ඤාණයෙන් මේ ජීවිතයේදීම සාක්ෂාත් කොට එයට පැමිණ වාසය කළා. ‘ඉපදීම ක්ෂය වුනා. බඹසර වාසය සම්පූර්ණ කළා. නිවන පිණිස කළ යුතු දෙය කළා. නැවත සසරෙහි ඉපදීමක් නැතැ’යි අවබෝධ වුනා. ආයුෂ්මත් අනුරුද්ධ තෙරුන් රහතන් වහන්සේලා අතර කෙනෙක් බවට පත්වුනා.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-3-3-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M