පින්වත් මහණෙනි, ලෝකයෙහි මේ පුද්ගලයන් තුන් දෙනෙක් දකින්න ලැබෙනවා. කවර පුද්ගලයන් තුන් දෙනෙක්ද?
පින්වත් මහණෙනි, මෙහිලා එක්තරා පුද්ගලයෙක් සියලු ආකාරයේ රූප සඤ්ඤා ඉක්මවා යෑමෙන්, ගොරෝසු සඤ්ඤාවන් නැති කිරීමෙන්, නානා සඤ්ඤාවන් සිහි නොකිරීමෙන්, ‘ආකාසය අනන්තයි’ කියලා ආකාසානඤ්චායතනය උපදවාගෙන වාසය කරනවා. ඔහු ඒ අරූප ධ්‍යානයෙන් ආශ්වාදයක් ලබනවා. ඒ අරූප ධ්‍යානය ගැන ඉතාමත් කැමැති වෙනවා. එයින් සතුටට පත්වෙනවා. ඒ අරූප ධ්‍යානයෙහි සිටිමින් එහි බැසගත් සිතින් යුතුව, බහුල වශයෙන් එය තුළ වාසය කරමින් ඒ ධ්‍යානයෙන් නොපිරිහී කළුරිය කර ආකාසානාඤ්චායතනයට පැමිණ දෙවියන් සමඟ එක්වීමකට පැමිණෙනවා.
පින්වත් මහණෙනි, ආකාසානඤ්චායතන ලෝකයෙහි උපන් දෙවිවරුන්ගේ ආයුෂ ප්‍රමාණය කල්පවලින් විසිදහසක් වෙනවා. එහිලා පෘතග්ජන පුද්ගලයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා නිරයටත් යනවා. තිරිසන් යෝනියටත් යනවා. ප්‍රේත විෂයටත් යනවා.
නමුත් භාග්‍යවතුන් වහන්සේගේ ශ්‍රැතවත් ආර්ය ශ්‍රාවකයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා එහිම පිරිනිවන් පානවා. පින්වත් මහණෙනි, යම් මේ පරලොව ගතියක් ඇති කල්හි, ඉපදීමක් ඇති කල්හි ශ්‍රැතවත් ආර්ය ශ්‍රාවකයාගේත්, අශ්‍රැතවත් පෘතග්ජනයාගේත් තියෙන විශේෂත්වය මේකයි. සුවිශේෂීබව මෙයයි. වෙනස්කම මෙයයි.
ඒ ගැන තවදුරටත් කියනවා නම්, පින්වත් මහණෙනි, මෙහිලා එක්තරා පුද්ගලයෙක් සියලු ආකාරයේ ආකාසානඤ්චායතන සඤ්ඤා ඉක්මවා යෑමෙන්, ‘විඤ්ඤාණය අනන්තයි’ කියලා විඤ්ඤාණඤ්චායතනය උපදවාගෙන වාසය කරනවා. ඔහු ඒ අරූප ධ්‍යානයෙන් ආශ්වාදයක් ලබනවා. ඒ අරූප ධ්‍යානය ගැන ඉතාමත් කැමැති වෙනවා. එයින් සතුටට පත්වෙනවා. ඒ අරූප ධ්‍යානයෙහි සිටිමින් එහි බැසගත් සිතින් යුතුව, බහුල වශයෙන් එය තුළ වාසය කරමින් ඒ ධ්‍යානයෙන් නොපිරිහී කළුරිය කර විඤ්ඤාණඤ්චායතනයට පැමිණි දෙවියන් සමඟ එක්වීමකට පැමිණෙනවා.
පින්වත් මහණෙනි, විඤ්ඤාණඤ්චායතන ලෝකයෙහි උපන් දෙවිවරුන්ගේ ආයුෂ ප්‍රමාණය කල්පවලින් හතලිස්දහසක් වෙනවා. එහිලා පෘතග්ජන පුද්ගලයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා නිරයටත් යනවා. තිරිසන් යෝනියටත් යනවා. ප්‍රේත විෂයටත් යනවා.
නමුත් භාග්‍යවතුන් වහන්සේගේ ශ්‍රැතවත් ආර්ය ශ්‍රාවකයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා එහිම පිරිනිවන් පානවා. පින්වත් මහණෙනි, යම් මේ පරලොව ගතියක් ඇති කල්හි, ඉපදීමක් ඇති කල්හි ශ්‍රැතවත් ආර්ය ශ්‍රාවකයාගේත්, අශ්‍රැතවත් පෘතග්ජනයාගේත් තියෙන විශේෂත්වය මේකයි. සුවිශේෂීබව මෙයයි. වෙනස්කම මෙයයි.
ඒ ගැන තවදුරටත් කියනවා නම්, පින්වත් මහණෙනි, මෙහිලා එක්තරා පුද්ගලයෙක් සියලු ආකාරයේ විඤ්ඤාණඤ්චායතනය ඉක්මවා යෑමෙන්, ‘කිසිවක් නැත’ කියලා ආකිඤ්චඤ්චායතනය උපදවාගෙන වාසය කරනවා. ඔහු ඒ අරූප ධ්‍යානයෙන් ආශ්වාදයක් ලබනවා. ඒ අරූප ධ්‍යානය ගැන ඉතාමත් කැමැති වෙනවා. එයින් සතුටට පත්වෙනවා. ඒ අරූප ධ්‍යානයෙහි සිටිමින් එහි බැසගත් සිතින් යුතුව, බහුල වශයෙන් එය තුළ වාසය කරමින් ඒ ධ්‍යානයෙන් නොපිරිහී කළුරිය කර ආකිඤ්චඤ්ඤායතනයට පැමිණ දෙවියන් සමඟ එක්වීමකට පැමිණෙනවා.
පින්වත් මහණෙනි, ආකිඤ්චඤ්ඤායතන ලෝකයෙහි උපන් දෙවිවරුන්ගේ ආයුෂ ප්‍රමාණය කල්පවලින් හැටදහසක් වෙනවා. එහිලා පෘථග්ජන පුද්ගලයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා නිරයටත් යනවා. තිරිසන් යෝනියටත් යනවා. ප්‍රේත විෂයටත් යනවා.
නමුත් භාග්‍යවතුන් වහන්සේගේ ශ්‍රැතවත් ආර්ය ශ්‍රාවකයා ආයුෂ ඇති තාක්කල් එහි ඉඳලා ඒ දෙවියන්ගේ ආයුෂ ප්‍රමාණය යම්තාක්ද, ඒ සියලු ආයුෂ ගෙවලා එහිම පිරිනිවන් පානවා. පින්වත් මහණෙනි, යම් මේ පරලොව ගතියක් ඇති කල්හි, ඉපදීමක් ඇති කල්හි ශ්‍රැතවත් ආර්ය ශ්‍රාවකයාගේත්, අශ්‍රැතවත් පෘථග්ජනයාගේත් තියෙන විශේෂත්වය මේකයි. සුවිශේෂීබව මෙයයි. වෙනස්කම මෙයයි.
පින්වත් මහණෙනි, මේ පුද්ගලයන් තුන් දෙනා ලෝකයෙහි දකින්නට ලැබෙනවා.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-3-2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M