43. පින්වත් මහණෙනි, අන්‍යාගමික පිරිවැජියන් මේ හුදෙකලා විවේක තුන පණවනවා.
ඒ කවර තුනක්ද?
චීවර විවේකය, පිණ්ඩපාත විවේකය හා සේනාසන විවේකයයි.
පින්වත් මහණෙනි, අන්‍යාගමික පිරිවැජියන් මේ චීවර විවේකය පණවන්නේ මේ විදිහටයි. හණවැහැරිත් දරනවා. හණවැහැරි මිශ්‍ර වස්ත්‍රත් දරනවා. ඉවත් කළ කඩමලුත් දරනවා. මිනියෙන් බැහැර කළ රෙදිත් දරනවා. පොතුසුඹුළුවලින් කළ වස්ත්‍රත් දරනවා. අඳුන් දිවිසමත් දරනවා. මැදින් පැලූ අඳුන් දිවිසමත් දරනවා. කුසතණින් ගෙතූ වස්ත්‍රත් දරනවා. නියඳ වැහැරිත් දරනවා. එළුලොමින් කළ වස්ත්‍රත් දරනවා. මිනිස් කෙස්වලින් කළ වස්ත්‍රත් දරනවා. අස්ලොමින් කළ වස්ත්‍රත් දරනවා. බකමූණු පියාපතින් කළ වස්ත්‍රත් දරනවා. පින්වත් මහණෙනි, අන්‍යාගමික පිරිවැජියන් ‘චීවර විවේකය’ වශයෙන් පණවන්නේ මෙයයි.
පින්වත් මහණෙනි, අන්‍යාගමික පිරිවැජියන් මේ පිණ්ඩපාත විවේකය පණවන්නේ මේ විදිහටයි. කොළ වර්ගත් අමුවෙන් අනුභව කරනවා. ගස් බොඩත් අනුභව කරනවා. හූරු වැල් වීත් අනුභව කරනවා. සම් තැම්බූ කහට වතුරත් අනුභව කරනවා. ලහටු දියසෙවලත් අනුභව කරනවා. සහල් කුඩුත් අනුභව කරනවා. දන්කුඩත් අනුභව කරනවා. මුරුවටත් අනුභව කරනවා. තණකොළත් අනුභව කරනවා. ගොමත් අනුභව කරනවා. වනමුල් ගෙඩිත් අනුභව කරනවා. ගස්වලින් වැටුණු ගෙඩි පමණකුත් අනුභව කරනවා. පින්වත් මහණෙනි, අන්‍යාගමික පිරිවැජියන් ‘පිණ්ඩපාත විවේකය’ වශයෙන් පණවන්නේ මෙයයි.
පින්වත් මහණෙනි, අන්‍යාගමික පිරිවැජියන් මේ සේනාසන විවේකය පණවන්නේ මේ විදිහටයි. අරණ්‍යය, රුක් සෙවන, සොහොන, මහා වනය, එළිමහන, පිදුරු ගෙවල්, පැල්පත යන මේවායි. පින්වත් මහණෙනි,
අන්‍යාගමික පිරිවැජියන් ‘සේනාසන විවේකය’ වශයෙන් පණවන්නේ මෙයයි. පින්වත් මහණෙනි, අන්‍යාගමික පිරිවැජියන් පණවන්නේ ඔය විවේක තුනයි.
පින්වත් මහණෙනි, මේ ධර්ම විනයේ (ශාසනයේ) භික්ෂුවට හුදෙකලා විවෙක තුනක් තියෙනවා.
ඒ තුන මොනවාද?
පින්වත් මහණෙනි, මෙහිලා භික්ෂුව සිල්වත් වෙනවා. එතකොට ඔහුගේ දුස්සීලබව ප්‍රහාණය වෙලා යනවා. ඒ හේතුවෙන් හුදෙකලා විවේකයෙන් යුක්තයි. සම්මා දිට්ඨියෙන් යුක්ත වෙනවා. එතකොට ඔහුගේ මිත්‍යා දෘෂ්ටිය ප්‍රහාණය වෙලා යනවා. ඒ හේතුවෙනුත් හුදෙකලා විවේකයෙන් යුතු වෙනවා. ක්ෂීණාශ්‍රවයන් වහන්සේ නමක් වෙනවා. එතකොට ඔහුගේ ආශ්‍රවයන් ප්‍රහාණය වෙලා යනවා. ඒ හේතුවෙනුත් හුදෙකලා විවේකයෙන් යුක්තයි.
පින්වත් මහණෙනි, යම් කලෙක භික්ෂුව සිල්වත් වෙනවාද, ඔහුගේ දුස්සීලබව ප්‍රහාණය වෙලා යනවාද, ඒ හේතුවෙන් හුදෙකලා විවේකයෙන් යුක්ත වෙනවාද, ඒ වගේම සම්මා දිට්ඨියෙන් යුක්ත වෙනවාද, ඔහුගේ මිත්‍යා දෘෂ්ටිය ප්‍රහාණය වෙලා යනවාද, ඒ හේතුවෙනුත් හුදෙකලා විවේකයෙන් යුක්ත වෙනවාද, ඒ වගේම ක්ෂීණාශ්‍රවයන් වහන්සේ නමක් වෙනවාද, ඔහුගේ ආශ්‍රවයන් ප්‍රහාණය වෙලා යනවාද, ඒ හේතුවෙනුත් හුදෙකලා විවේකයෙන් යුක්ත වෙනවාද, පින්වත් මහණෙනි, ත්‍රිවිධ විවේකයෙහි අග්‍රප්‍රාප්ත වුනා කියල කියන්නෙත්, සාරවත් බවට පත්වුනා කියන්නෙත්, පිරිසිදුව සාරයෙහි පිහිටියා කියන්නෙත් මෙන්න මේ භික්ෂුවටයි.
පින්වත් මහණෙනි, ඒක මේ වගේ දෙයක්. ගොවිතැන් කරන ගෘහපතියෙකුට හොඳ හැල් කෙතක් තියෙනවා. ගොවිතැන් කරන ගෘහපතියා ඒ කෙත ලහිලහියේ වපුරවනවා නම්, ලහිලහියේ වපුරවලා, ලහිලහියේ ගොයම කපලා, එකතු කරවනවා නම්, ලහිලහියේ එකතු කරවලා, ලහිලහියේ කමතට රැස් කරවනවා නම්, ලහිලහියේ කමතට ගොඩගස්සවලා, ලහිලහියේ කොළ බන්ඳවනවා නම්, ලහිලහියේ කොළ බන්ඳවලා, ලහිලහියේ ගොයම පාගවනවා නම්, ලහිලහියේ ගොයම පාගවලා, ලහිලහියේ පිදුරු අස් කරවනවා නම්, ලහි ලහියේ පිදුරු අස්කරවලා, ලහිලහියේ බොල් පොළවනවා නම්, ලහිලහියේ බොල් පොළවලා, ලහිලහියේ හුළං කරනවා නම්, ලහිලහියේ හුළං කරවලා, ලහිලහියේ අටුවට යවනවා නම්, ලහිලහියේ අටුවට යවලා, ලහිලහියේ කොටවනවා නම්, ලහිලහියේ කොටවලා, ලහිලහියේ දහයියා ඉවත් කරවනවා නම්, පින්වත් මහණෙනි, එතකොට මේ අයුරින් ඒ ගොවිතැන් කරන ගෘහපතියාගේ ධාන්‍යය ඇල් සහලින් අගතැන්පත් වෙනවා. සාරවත් බවට පත්වෙනවා. ශුද්ධ බවට පත්වෙනවා. සාරයේ පිහිටියා වෙනවා.
අන්න ඒ වගේම තමයි පින්වත් මහණෙනි, භික්ෂුව සිල්වත් වෙනවාද, ඔහුගේ දුස්සීලබව ප්‍රහාණය වෙලා යනවාද, ඒ හේතුවෙන් හුදෙකලා විවේකයෙන් යුක්ත වෙනවාද, ඒ වගේම සම්මා දිට්ඨියෙන් යුක්ත වෙනවාද, ඔහුගේ මිත්‍යා දෘෂ්ටිය ප්‍රහාණය වෙලා යනවාද, ඒ හේතුවෙනුත් හුදෙකලා විවේකයෙන් යුක්ත වෙනවාද, ඒ වගේම ක්ෂීණාශ්‍රවයන් වහන්සේ නමක් වෙනවාද, ඔහුගේ ආශ්‍රවයන් ප්‍රහාණය වෙලා යනවාද, ඒ හේතුවෙනුත් හුදෙකලා විවේකයෙන් යුක්ත වෙනවාද, පින්වත් මහණෙනි, ත්‍රිවිධ විවේකයෙහි අග්‍රප්‍රාප්ත වුනා කියල කියන්නෙත්, සාරවත් බවට පත්වුනා කියන්නෙත්, පිරිසිදුව සාරයෙහි පිහිටියා කියන්නෙත් මෙන්න මේ භික්ෂුවටයි.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-2-5-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M