42. සැවැත් නුවරදී…..
පින්වත් මහණෙනි, ගොවිතැන් කරන ගෘහපතියෙකුට අත්‍යවශ්‍යම කටයුතු තුනක් තියෙනවා.
ඒ කවර තුනක්ද?
පින්වත් මහණෙනි, මෙහිලා ගොවිතැන් කරන ගෘහපතියා ලහිලහියේ කුඹුර හොඳට සීසානවා. හොඳට පෝරුගා මට්ටම් කරනවා. ලහිලහියේ කුඹුර හොඳට සීසාලා, හොඳට පෝරුගා මට්ටම් කරලා ලහිලහියේ බීජ වපුරනවා. ලහිලහියේ බීජ වපුරලා, ලහිලහියේ වතුර බැඳීමත්, පිටමං කිරීමත් කරනවා. පින්වත් මහණෙනි, මේ තමයි ගොවිතැන් කරන ගෘහපතියෙකුට අත්‍යවශ්‍යයෙන්ම කරන්න තියෙන කටයුතු තුන.
පින්වත් මහණෙනි, ඒ ගොවිතැන් කරන ගෘහපතියාට, ‘අදම මගේ ධාන්‍ය වැඩේවා! හෙටම බණ්ඩි හැදී කිරි වැදේවා! අනිද්දාම පැසේවා!’ කියා මෙවැනි වූ ඉර්ධියක්වත්, ආනුභාවයක්වත් නෑ. නමුත් පින්වත් මහණෙනි, යම් හෙයකින් ඒ ගොවිතැන් කරන ගෘහපතියා විසින් වපුරන ලද, ඍතු පරිණාමයට අනුව සකස් වෙන ඒ ධාන්‍ය වැඩෙනවා නම්, බණ්ඩි හැදී කිරිවැදෙනවා නම්, පැසෙනවා නම්, එබඳු කාලයක් එනවා.
අන්න ඒ වගේම පින්වත් මහණෙනි, භික්ෂුවටත් අත්‍යවශ්‍යයෙන්ම කළ යුතු මේ කටයුතු තුනක් තියෙනවා.
ඒ කවර තුනක්ද?
අධිශීල ශික්ෂාවේ සමාදන් වීම. අධිචිත්ත ශික්ෂාවේ සමාදන් වීම හා අධිප්‍රඥා ශික්ෂාවේ සමාදන් වීමයි. පින්වත් මහණෙනි, මේ තමයි භික්ෂුවගේ අත්‍යවශ්‍යම කටයුතු තුන.
පින්වත් මහණෙනි, භික්ෂුවට ‘අදම මගේ සිත උපාදාන රහිතව ආශ්‍රවයන්ගෙන් නිදහස් වේවා! හෙටම හෝ අනිද්දාට හෝ එසේ වේවා!’ කියා මෙවැනි වූ ඉර්ධියක්වත්, ආනුභාවයක්වත් නෑ. නමුත් පින්වත් මහණෙනි, ඒ විදිහට අධිශීලයේ හික්මෙන්නා වූ, අධිචිත්තයේ හික්මෙන්නා වූ, අධිප්‍රඥාවේ හික්මෙන්නා වූ ඒ භික්ෂුවගේ සිත උපාදාන රහිතව ආශ්‍රවයන්ගෙන් නිදහස් වෙනවා නම්, එවැනි අවස්ථාවක් උදාවෙනවා.
ඒ නිසා පින්වත් මහණෙනි, මේ විදිහට හික්මිය යුතුයි. ‘අධිශීල ශික්ෂා සමාදන් වීම ගැන අප තුළ ඉතා දැඩි වූ කැමැත්තක් ඇතිවෙනවාමයි. අධිචිත්ත ශික්ෂා සමාදන් වීම ගැන අප තුළ ඉතා දැඩි වූ කැමැත්තක් ඇති වෙනවාමයි. අධිප්‍රඥා ශික්ෂා සමාදන් වීම ගැන අප තුළ ඉතා දැඩි වූ කැමැත්තක් ඇතිවෙනවාමයි’ කියලා පින්වත් මහණෙනි, ඔබ විසින් මේ ආකාරයටයි හික්මිය යුත්තේ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-2-5-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M