06. එකල්හි එක්තරා සම්භාවනීය බ්‍රාහ්මණයෙක් භාග්‍යවතුන් වහන්සේ වෙත පැමිණුනා. ….(පෙ)…. එකත්පස්ව වාඩිවුන ඒ සම්භාවනීය බ්‍රාහ්මණයා භාග්‍යවතුන් වහන්සේට මෙකරුණ පැවසුවා. “භවත් ගෞතමයන් වහන්ස, ඉස්සර හිටිය වයෝවෘද්ධ මහළු ආචාර්ය ප්‍රාචාර්ය වූ බ්‍රාහ්මණයන් මේ කාරණය කියනවා මං අහලා තියෙනවා. ‘ඉස්සර මේ ලෝකය මිනිසුන්ගෙන් පිරී ඉතිරී තිබුනේ අවීචිය වගේ’ කියලා. ‘ගම්නියම්ගම් රාජධානිවල නිවෙස් මතින් එක දිගටම කුකුලෙකුට වුනත් යන්න පුළුවන්’ කියලා. භවත් ගෞතමයන් වහන්ස, මේ කාලයේ මනුෂ්‍යයින්ගේ ක්ෂය වීමක් තියෙනවා නම්, අඩු වීමක් තියෙනවා නම්, ගම් නොගම් වෙලා තියෙනවා නම්, නියම්ගම් නොනියම්ගම් වෙලා තියෙනවා නම්, නගර නොනගර වෙලා තියෙනවා නම්, රාජධානි නොරාජධානි වෙලා තියෙනවා නම්, ඒකට හේතුව කුමක්ද? ප්‍රත්‍යය කුමක්ද?”
“පින්වත් බ්‍රාහ්මණය, මේ කාලයේ මිනිස්සු අධර්ම රාගයට ඇලිලයි ඉන්නේ. විෂම ලෝභයට යටවෙලයි ඉන්නේ. මිත්‍යාමතවලින් පෙලෙමින් ඉන්නේ. ඔවුන් අධර්ම රාගයෙන් ඇලිලා, විෂම ලෝභයෙන් යට වෙලා, මිත්‍යාමතවලින් පීඩිත වෙලා, තියුණු අවි ආයුධ අරගෙන එකිනෙකාගේ ජීවිත වනසා ගන්නවා. ඒ හේතුවෙන් බොහෝ මිනිසුන් මිය යනවා. පින්වත් බ්‍රාහ්මණය, දැන් කාලයේ මිනිසුන්ගේ ක්ෂය වීමටත්, අඩු වීමටත්, ගම් නොගම් වීමටත්, නියම්ගම් නොනියම්ගම් වීමටත්, නගර නොනගර වීමටත්, රාජධානි නොරාජධානි වීමටත් හේතුව ඕකයි ප්‍රත්‍යය ඕකයි.
පින්වත් බ්‍රාහ්මණය, තවදුරටත් කියනවා නම්, මේ කාලයේ මිනිස්සු අධර්ම රාගයට ඇලිලයි ඉන්නේ. විෂම ලෝභයට යටවෙලයි ඉන්නේ. මිත්‍යාමතවලින් පෙලෙමින් ඉන්නේ. මේ විදිහට අධර්ම රාගයෙන් ඇලිලා, විෂම ලෝභයෙන් යට වෙලා, මිත්‍යාමතවලින් පීඩිත වෙලා ඉන්න මිනිස්සුන්ට නියම ආකාරයෙන් වැස්ස වහින්නේ නෑ. ඒ හේතුවෙන් දුර්භික්ෂය ඇතිවෙනවා. අස්වැන්න නැතුව යනවා. ගස්කොළන් වේලෙනවා. සලාකවලින් යැපෙනවා. ඒ දුර්භික්ෂයෙන් බොහෝ මිනිසුන් මිය යනවා. පින්වත් බ්‍රාහ්මණය, දැන් කාලයේ මිනිසුන්ගේ ක්ෂය වීමටත්, අඩු වීමටත්, ගම් නොගම් වීමටත්, නියම්ගම් ….(පෙ)…. රාජධානි නොරාජධානි වීමටත් හේතුව ඕකයි ප්‍රත්‍යය ඕකයි.
පින්වත් බ්‍රාහ්මණය, තව දුරටත් කියනවා නම්, මේ කාලයේ මිනිස්සු අධර්ම රාගයට ඇලිලයි ඉන්නේ. විෂම ලෝභයට යටවෙලයි ඉන්නේ. මිත්‍යාමතවලින් පෙලෙමින් ඉන්නේ. මේ විදිහට අධර්ම රාගයෙන් ඇලිලා, විෂම ලෝභයෙන් යට වෙලා, මිත්‍යාමතවලින් පීඩිත වෙලා ඉන්න ඒ මිනිසුන්ට දරුණු යක්ෂයන්ගේ බලපෑම ඇතිවෙනවා. ඒ හේතුවෙන් බොහෝ මිනිසුන් මිය යනවා. පින්වත් බ්‍රාහ්මණය, දැන් කාලයේ මිනිසුන්ගේ ක්ෂය වීමටත්, අඩු වීමටත්, ගම් නොගම් වීමටත්, නියම්ගම් නොනියම්ගම් වීමටත්, නගර නොනගර වීමටත්, රාජධානි නොරාජධානි වීමටත් හේතුව ඕකයි ප්‍රත්‍යය ඕකයි.
භවත් ගෞතමයන් වහන්ස, ඉතා මනහරයි. ….(පෙ)…. භවත් ගෞතමයන් වහන්ස, මා අද පටන් තෙරුවන් සරණ ගිය උපාසකයෙකු වශයෙන් පිළිගෙන වදාරණ සේක්වා!
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-2-1-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M