එදා ආයුෂ්මත් සාරිපුත්ත තෙරුන් භාග්‍යවතුන් වහන්සේ වෙත පැමිණුනා. පැමිණ භාග්‍යවතුන් වහන්සේට ආදරයෙන් වන්දනා කොට එකත්පස්ව වාඩිවුනා. එකත්පස්ව වාඩිවුන ආයුෂ්මත් සැරියුත් තෙරුන් හට භාග්‍යවතුන් වහන්සේ මෙකරුණ වදාළා. “පින්වත් සාරිපුත්ත, මා කරුණු ගොනුකොට හකුළුවමින් දහම් දෙසනවා. පින්වත් සාරිපුත්ත, මා විස්තර වශයෙනුත් දහම් දෙසනවා. ඒ වගේම පින්වත් සාරිපුත්ත, මා කරුණු ගොනුකොට හකුළුවමිනුත්, විස්තර වශයෙනුත් දහම් දෙසනවා. නමුත් අවබෝධ කරගන්නා අය දුර්ලභයි.”
“භාග්‍යවතුන් වහන්සේ යම් ධර්මයක් කරුණු ගොනුකොට හකුළුමිනුත් දේශනා කරන සේක් නම්, විස්තර වශයෙනුත් දේශනා කරන සේක් නම්, කරුණු ගොනුකොට හකුළුවමිනුත්, විස්තර වශයෙනුත් දේශනා කරන සේක් නම්, භාග්‍යවතුන් වහන්ස, මේ එයට කාලයයි. සුගතයන් වහන්ස, මේ එයට කාලයයි. ධර්මය අවබෝධ කරන අය ඇතිවෙනවාමයි.”
“එසේ වී නම් පින්වත් සාරිපුත්තයෙනි, මේ අයුරින් හික්මිය යුතුයි. මේ විඤ්ඤාණය සහිත කය පිළිබඳව ‘මමය, මාගේය’ යන දෝංකාරය පවතින මාන අනුසය ඇති නොවන්නේ නම්, බාහිර සෑම නිමිත්තක් තුළම ‘මමය, මාගේය’ යන දෝංකාරය පවතින මාන අනුසය ඇතිනොවන්නේ නම්, එබඳු වූ චිත්ත විමුක්තියටත්, ප්‍රඥා විමුක්තියටත් පැමිණ වාසය කරනවා යන කරුණයි. පින්වත් සාරිපුත්තයෙනි, ඔබ හික්මිය යුත්තේ ඔන්න ඔය විදිහටයි.
පින්වත් සාරිපුත්ත, යම් අවස්ථාවක දී භික්ෂුවට මේ විඤ්ඤාණය සහිත කය පිළිබඳව ‘මමය, මාගේය’ යන දෝංකාරය පවතින මාන අනුසය ඇති නොවන්නේ නම්, බාහිර සෑම නිමිත්තක් තුළම ‘මමය, මාගේය’ යන දෝංකාරය පවතින මාන අනුසය ඇතිනොවන්නේ නම්, එබඳු වූ චිත්ත විමුක්තියටත්, ප්‍රඥා විමුක්තියටත් පැමිණ වාසය කරද්දී ‘මමය, මාගේය’ යන දෝංකාරය පවතින මාන අනුසය ඇති නොවේ නම් එබඳු වූ චිත්ත විමුක්තියටත්, ප්‍රඥා විමුක්තියටත් පැමිණ වාසය කරයි නම්, පින්වත් සාරිපුත්ත, මේ භික්ෂුවට තමයි කියන්නේ ‘තණ්හාව සිඳ දැම්මා, සංයෝජන ඉක්මවා ගියා, මනාකොට අවබෝධ වීමෙන් මාන්නය දුරුවුනා, දුකෙහි කෙළවරට පැමිණියා’ කියලා. පින්වත් සාරිපුත්ත, ඔය කරුණ උදෙසා තමයි මා විසින් පාරායන වර්ගයේ උදය ප්‍රශ්නයේදී මෙය වදාරණ ලද්දේ.
කාම සඤ්ඤාවන්ගේත්, දොම්නසේත් යන මේ කරුණු දෙකේ ප්‍රහාණයත් ඒ වගේම ථීනමිද්ධය බැහැර කිරීමත්, සැකය වළක්වාලීමත්,
උපේක්ෂා සහගත පාරිශුද්ධ සිහියෙන් යුතු හතරවෙනි ධ්‍යානයෙන්ද, ධර්මය නුවණින් විමසීම නැමැති ජවය මුලට ගැනීමෙන්ද, අවිද්‍යාව සිඳබිඳ දමමින් අරහත්ඵල විමෝක්ෂය ඇතිවෙනවා කියලයි මා කියන්නේ.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-4-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M