පින්වත් මහණෙනි, මේ පුද්ගලයින් තුන් දෙනෙක් ලෝකයේ දකින්නට ලැබෙනවා. ඒ තුන් දෙනා කවුද? ගූථභාණී, පුප්ඵභාණී, මධුභාණී.
පින්වත් මහණෙනි, ගූථභාණී පුද්ගලයා කවුද? පින්වත් මහණෙනි, මෙහි ඇතැම් පුද්ගලයෙක් සභාවකට ගියත්, පිරිසක් අතරට ගියත්, ඤාතීන් මැදට ගියත්, සේනා මැදට ගියත්, රාජ කුලයන් මැදට ගියත්, ඒ පිරිස අතර දී සාක්ෂි විමසද්දී ‘එම්බා පුරුෂය, යමක් දන්නවා නම් එය කියන්න’ කියලා. එතකොට ඔහු නො දන්නා දේ ගැනත් ‘දනිමි’ කියලා කියනවා. දන්නා දේ ගැන ‘නො දනිමි’ කියලා කියනවා. නො දැක්ක දේ ගැන ‘දකිමි’ කියල කියනවා. දැක්ක දේ ගැන ‘නො දකිමි’ කියලා කියනවා. මේ විදිහට තමන් නිසා වේවා, අනුන් නිසා වේවා, තමන්ට ලැබෙන කිසියම් ලාභයක් නිසා වේවා, දැන දැන බොරු කියනවා. පින්වත් මහණෙනි, මොහුට තමයි ගූථභාණී පුද්ගලයා කියන්නේ.
පින්වත් මහණෙනි, පුප්ඵභාණී පුද්ගලයා කවුද? පින්වත් මහණෙනි, මෙහි ඇතැම් පුද්ගලයෙක් සභාවකට ගියත්, පිරිසක් අතරට ගියත්, ඤාතීන් මැදට ගියත්, සේනා මැදට ගියත්, රාජ කුලයන් මැදට ගියත්, ඒ පිරිස අතර දී සාක්ෂි විමසද්දී ‘එම්බා පුරුෂය, එන්න. යමක් දන්නවා නම් එය කියන්න’ කියලා. එතකොට ඔහු නො දන්නා දේ ගැන ‘නො දනිමි’ කියල කියනවා. දන්නා දේ ගැන ‘දනිමි’ කියලා කියනවා. නො දැක්ක දේ ගැන ‘නො දකිමි’ කියල කියනවා. දැක්ක දේ ගැන ‘දකිමි’ කියලා කියනවා. මේ විදිහට තමන් නිසා වේවා, අනුන් නිසා වේවා, තමන්ට ලැබෙන කිසියම් ලාභයක් නිසා වේවා, දැන දැන බොරු කියන්නේ නෑ. පින්වත් මහණෙනි, මොහුට තමයි පුප්ඵභාණී පුද්ගලයා කියන්නේ.
පින්වත් මහණෙනි, මධුභාණී පුද්ගලයා කවුද? පින්වත් මහණෙනි, මෙහි එක්තරා පුද්ගලයෙක් ඉන්නවා. ඔහු පරුෂ වචන අත්හැරලා, පරුෂ වචනයෙන් වෙන් වෙලා ඉන්නවා. යම් ඒ වචනයක් වැරදි නැත්නම්, කණට සුවදායක නම්, ආදරයක් ඇති වෙනවා නම්, හෘදයාංගම නම්, ආචාරශීලී කතාවෙන් යුතු නම්, බොහෝ දෙනා කැමැති, බොහෝ දෙනාට ප්‍රිය වචන ඇතිනම්, ඒ විදිහේ වචන කතා කරනවා. පින්වත් මහණෙනි, මොහුට තමයි මධුභාණී පුද්ගලයා කියලා කියන්නේ. පින්වත් මහණෙනි, මේ තමයි ලෝකයේ දකින්නට ලැබෙන පුද්ගලයන් තුන් දෙනා.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-3-8/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M