පින්වත් මහණෙනි, ධාර්මික වූ, ධර්මරාජ වූ, යම් ඒ සක්විති රජකෙනෙක් ඇද්ද, ඔහු පවා රජෙකුගෙන් තොරව අණසක පතුරුවන්නේ නෑ. මෙසේ වදාළ විට එක්තරා භික්ෂුවක් භාග්‍යවතුන් වහන්සේට මෙය පැවසුවා. “ස්වාමීනී, ධාර්මික වූ, ධර්මරාජ වූ සක්විති රජුගේ රජතුමා කවුරුද?” කියලා. “පින්වත් භික්ෂුව, මෙහි ධාර්මික වූ ධර්මරාජ වූ සක්විති රජු, ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයටම පුදමින්, ධර්මයම ධජය කරගෙන, ධර්මයම සළකුණු කර ගෙන, ධර්මයම අධිපති කරගෙන තමයි රට තුළ ජනයාට ධාර්මික වූ ආරක්ෂාවත්, රැකවරණයත් ලබා දෙන්නෙ.
ඒ ගැන තවදුරටත් කියනවා නම්, පින්වත් භික්ෂුව, ධාර්මික වූ, ධර්මරාජ වූ සක්විති රජු ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයටම පුදමින්, ධර්මයම ධජය කරගෙන, ධර්මයම සළකුණු කරගෙන, ධර්මයම අධිපති කරගෙන තමයි වැඩ කටයුතුවල යෙදී සිටින ක්ෂත්‍රියයන්ටත්, බල සේනාවටත්, බ්‍රාහ්මණ ගෘහපතියන්ටත්, නියම්ගම් වැසියන්ටත්, ජනපද වැසියන්ටත්, ශ්‍රමණ-බ්‍රාහ්මණයින්ටත්, සතුන්ට හා පක්ෂීන්ට පවා ආරක්ෂාවත්, රැකවරණයත් ලබා දෙන්නෙ. පින්වත් භික්ෂුව, ඒ ධාර්මික වූ, ධර්මරාජ වූ සක්විති රජු ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයම පුදමින්, ධර්මයම ධජය කරගෙන, ධර්මයම සළකුණු කරගෙන, ධර්මයම අධිපති කරගෙන රට තුළ ජනයාට ධාර්මික වූ ආරක්ෂාවත් රැකවරණයත් ලබා දෙනවා. වැඩ කටයුතුවල යෙදී සිටින ක්ෂත්‍රියයන්ටත්, බල සේනාවටත්, බ්‍රාහ්මණ ගෘහපතියන්ටත්, නියම්ගම් වැසියන්ටත්, ජනපද වැසියන්ටත්, ශ්‍රමණ-බ්‍රාහ්මණයින්ටත්, සතුන්ට හා පක්ෂීන්ට පවා ආරක්ෂාවත්, රැකවරණයත් සළසලා ධර්මයෙන්ම අණසක පතුරුවනවා. ඒ ධාර්මික අණසක වළක්වන්න කිසිම මනුෂ්‍යයෙකුටවත්, කිසිම සතුරෙකුටවත් ප්‍රාණියෙකුටවත් බැහැ.
අන්න ඒ වගේ තමයි පින්වත් භික්ෂුව, ධාර්මික වූ, ධර්මරාජ වූ අරහත් සම්මා සම්බුදුරජාණන් වහන්සේත් ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයම පුදමින්, ධර්මයම ධජය කරගෙන, ධර්මයම සළකුණු කරගෙන, ධර්මයම අධිපති කරගෙන ‘මේ විදිහේ කාය කර්මයන් කළ යුතුයි, මේ විදිහේ කාය කර්මයන් නොකළ යුතුයි’ කියලා ධාර්මික ආරක්ෂාවත්, රැකවරණයත් සපයනවා.
ඒ ගැන තවදුරටත් කියනවා නම්, පින්වත් භික්ෂුව, ධාර්මික වූ, ධර්මරාජ වූ අරහත් සම්මා සම්බුදුරජාණන් වහන්සේත් ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයම පුදමින්, ධර්මයම ධජය කරගෙන, ධර්මයම සළකුණු කරගෙන, ධර්මයම අධිපති කරගෙන ‘මේ විදිහේ වචී කර්මයන් කළ යුතුයි, මේ විදිහේ වචී කර්මයන් නොකළ යුතුයි’ කියලා ධාර්මික ආරක්ෂාවත්, රැකවරණයත් සපයනවා. ….(පෙ)…. ‘මේ විදිහේ මනෝ කර්මයන් කළ යුතුයි, මේ විදිහේ මනෝ කර්මයන් නොකළ යුතුයි’ කියලා ධාර්මික ආරක්ෂාවත්, රැකවරණයත් සපයනවා.
පින්වත් භික්ෂුව, ඒ ධාර්මික වූ, ධර්මරාජ වූ අරහත් සම්මා සම්බුදුරජාණන් වහන්සේත් ධර්මයම ආශ්‍රය කරගෙන, ධර්මයටම සත්කාර කරමින්, ධර්මයටම ගරු කරමින්, ධර්මයම පුදමින්, ධර්මයම ධජය කරගෙන, ධර්මයම සළකුණු කරගෙන, ධර්මයම අධිපති කරගෙන කාය කර්ම ගැන ධාර්මික ආරක්ෂාවත්, රැකවරණයත් සපයලා, වචී කර්ම ගැන ධාර්මික ආරක්ෂාවත්, රැකවරණයත් සපයලා, මනෝ කර්ම ගැන ධාර්මික ආරක්ෂාවත්, රැකවරණයත් සපයලා, ධර්මයෙන්ම උත්තරීතර වූ දහම් අණසක පතුරුවනවා. ඒ දහම් අණසක වළක්වන්න කිසිම ශ්‍රමණයෙකුටවත්, බ්‍රාහ්මණයෙකුටවත්, දෙවියෙකුටවත්, මාරයෙකුටවත්, බ්‍රහ්මයෙකුටවත් ලෝකයේ කිසිම කෙනෙකුටවත් බැහැ.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-2-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M