පින්වත් මහණෙනි, ඔටුණු පැළඳවීමෙන් අභිෂේක කරන ලද ක්ෂත්‍රිය රජුට ජීවිතාන්තය දක්වා සිහි කළ යුතු කරුණු තුනක් තියෙනවා. ඒ තුන මොනවාද? පින්වත් මහණෙනි, ඔටුණු පැළඳවීමෙන් අභිෂේක කරන ලද ඒ ක්ෂත්‍රිය රජතුමා යම් ප්‍රදේශයක ඉපදුනා නම්, පින්වත් මහණෙනි, ඔටුණු පැළඳවීමෙන් අභිෂේක කරන ලද ඒ රජතුමා විසින් දිවි ඇතිතෙක්ම සිහි කළ යුතු පළමු කරුණ මෙයයි.
ඒ ගැන තවදුරටත් කියනවා නම්, පින්වත් මහණෙනි, ඒ ක්ෂත්‍රිය රජතුමා යම් ප්‍රදේශයකදී ඔටුණු පැළඳීමෙන් අභිෂේක කළා නම්, පින්වත් මහණෙනි, ඔටුණු පැළඳවීමෙන් අභිෂේක කරන ලද ඒ ක්ෂත්‍රිය රජතුමා විසින් දිවි ඇතිතෙක්ම සිහි කළ යුතු දෙවෙනි කරුණ මෙයයි.
ඒ ගැන තවදුරටත් කියනවා නම්, පින්වත් මහණෙනි, ඔටුණු පැළඳවීමෙන් අභිෂේක කරන ලද ක්ෂත්‍රිය රජතුමා යම් ප්‍රදේශයකදී යුද්ධය දිනා, දිනන ලද සංග්‍රාම ඇතිව ඒ යුද්ධ භූමියේම ජය කඳවුරු බැඳ වාසය කරනවා නම්, පින්වත් මහණෙනි, ඔටුණු පැළඳවීමෙන් අභිෂේක කරන ලද ඒ ක්ෂත්‍රිය රජතුමා විසින් දිවි ඇතිතෙක්ම සිහි කළ යුතු තුන් වෙනි කරුණ මෙයයි. පින්වත් මහණෙනි, මේ කරුණු තුන ඔටුණු පැළඳවීමෙන් අභිෂේක කරන ලද ක්ෂත්‍රිය රජු විසින් දිවි ඇතිතෙක් සිහි කළ යුතුයි.
අන්න ඒ අයුරින්ම පින්වත් මහණෙනි, භික්ෂුවටත් දිවි ඇති තුරාවට සිහි කළ යුතු කරුණු තුනක් තියෙනවා. ඒ තුන මොනවාද? පින්වත් මහණෙනි, යම් ප්‍රදේශයකදී භික්ෂුව කෙස් රැවුල් බා, කසාවත් පොරොවා, ගිහි ගෙයින් නික්ම, අනගාරිකව බුදු සසුනේ පැවිදි ජීවිතයට පත්වුනා නම්, පින්වත් මහණෙනි, භික්ෂුව විසින් දිවි ඇතිතෙක්ම සිහි කළ යුතු පළමු කරුණ මෙයයි.
ඒ ගැන තවදුරටත් කියනවා නම්, පින්වත් මහණෙනි, යම් ප්‍රදේශයකදී භික්ෂුව ‘මේ තමයි දුක නම් වූ ආර්ය සත්‍යය’ කියල ඇති සැටියෙන්ම අවබෝධ කළා නම්, ‘මේ තමයි දුකේ හටගැනීම නම් වූ ආර්ය සත්‍යය’ කියල ඇති සැටියෙන්ම අවබෝධ කළා නම්, ‘මේ තමයි දුකේ නැතිවීම නම් වූ ආර්ය සත්‍යය’ කියල ඇති සැටියෙන්ම අවබෝධ කළා නම්, ‘මේ තමයි දුකේ නැතිවීම පිණිස ඇති ප්‍රතිපදාව නම් වූ ආර්ය සත්‍යය’ කියල ඇති සැටියෙන්ම අවබෝධ කළා නම්, පින්වත් මහණෙනි, භික්ෂුව විසින් දිවි ඇතිතෙක්ම සිහි කළ යුතු දෙවෙනි කරුණ මෙයයි.
ඒ ගැන තවදුරටත් කියනවා නම්, පින්වත් මහණෙනි, යම් ප්‍රදේශයකදී භික්ෂුව ආශ්‍රවයන් ක්ෂය වීමෙන්, ආශ්‍රව රහිත වූ චේතෝ විමුක්තියත්, ප්‍රඥා විමුක්තියත් තමන්ගේම විශේෂ නුවණින් සාක්ෂාත් කොට, මේ ජීවිතයේදීම අවබෝධ කර ගෙන වාසය කරනවා නම්, පින්වත් මහණෙනි, භික්ෂුව විසින් දිවි ඇතිතෙක්ම සිහි කළ යුතු තුන්වෙනි කරුණ මෙයයි. පින්වත් මහණෙනි, මේ කරුණු තුන භික්ෂුව විසින් දිවි ඇති තෙක් සිහි කළ යුතුයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an1_3-1-2-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M