64. සැවැත් නුවරදී ……….
එකල්හී එක්තරා භික්ෂුවක් භාග්‍යවතුන් වහන්සේ වෙත පැමිණුනා. ….(පෙ)…. භාග්‍යවතුන් වහන්සේට මෙකරුණ සැලකළා. “ස්වාමීනී, භාග්‍යවතුන් වහන්ස, මා හට සංක්ෂේපයෙන් ශ්‍රී සද්ධර්මය වදාරණ සේක් නම් මැනැවි. ….(පෙ)…. දහමට දිවි පුදා මාත් දහම තුළ හැසිරෙන්නම්.”
“පින්වත් භික්ෂුව, මමත්වයෙන් සිතන්නට ගියොත් බැඳී යන්නේ මාරයාට තමයි. මමත්වයෙන් තොරව සිතන්නට ගියොත් නිදහස් වෙන්නෙත් පවිටු මාරයාගෙන්මයි.”
“භාග්‍යවතුන් වහන්ස, මට අවබෝධ වුණා. සුගතයන් වහන්ස, මට අවබෝධ වුණා.”
“පින්වත් භික්ෂුව, මා විසින් සංක්ෂේප වශයෙන් පවසන ලද ධර්මය, ඔබ විසින් විස්තර වශයෙන් අරුත් අවබෝධ කරගත්තේ කොයි විදිහටද?”
“ස්වාමීනී, රූපය ගැන මමත්වයෙන් සිතුවොත් තමයි, මාරයාට බැඳිලා යන්නේ. රූපය කෙරෙහි මමත්වයෙන් තොරව සිතුවොත් තමයි, පවිටු මාරයාගෙන් නිදහස් වෙන්නේ. වේදනාවට ….(පෙ)…. සඤ්ඤාවට ….(පෙ)…. සංස්කාරවලට ….(පෙ)…. විඤ්ඤාණය ගැන මමත්වයෙන් සිතුවොත් තමයි, මාරයාට බැඳිලා යන්නේ. විඤ්ඤාණය කෙරෙහි මමත්වයෙන් තොරව සිතුවොත් තමයි, පවිටු මාරයාගෙන් නිදහස් වෙන්නේ. ස්වාමීනී, භාග්‍යවතුන් වහන්සේ විසින් සංක්ෂේප වශයෙන් වදාරණ ලද්දා වූ ධර්මය, මං ඔන්න ඔය ආකාරයටයි විස්තර වශයෙන් අර්ථාවබෝධ කරගත්තේ.”
“ඉතා හොඳයි, පින්වත් භික්ෂුව, ඉතා හොඳයි. පින්වත් භික්ෂුව මා විසින් සංක්ෂේප වශයෙන් පවසන ලද ධර්මය ඔබ විස්තර වශයෙන් අර්ථාවබෝධ කරගත් අයුරු ඉතාමත් යහපත් ය. පින්වත් භික්ෂුව, රූපය ගැන මමත්වයෙන් සිතුවොත් තමයි, මාරයාට බැඳිලා යන්නේ. රූපය කෙරෙහි මමත්වයෙන් තොරව සිතුවොත් තමයි, පවිටු මාරයාගෙන් නිදහස් වෙන්නේ. වේදනාවට ….(පෙ)…. සඤ්ඤාවට ….(පෙ)…. සංස්කාරවලට ….(පෙ)…. විඤ්ඤාණය ගැන මමත්වයෙන් සිතුවොත් තමයි, මාරයාට බැඳිලා යන්නේ. විඤ්ඤාණය කෙරෙහි මමත්වයෙන් තොරව සිතුවොත් තමයි, පවිටු මාරයාගෙන් නිදහස් වෙන්නේ. පින්වත් භික්ෂුව, මා විසින් සංක්ෂේප වශයෙන් වදාරණ ලද්දා වූ ධර්මය, ඔබ විස්තර වශයෙන් අර්ථාවබෝධ කරගත යුත්තේ ඔය විදිහට තමයි.”
එතකොට ඒ භික්ෂුව භාග්‍යවතුන් වහන්සේ විසින් වදාරණ ලද ධර්මාවවාදය සතුටින් පිළි අරගත්තා. ….(පෙ)…. භාග්‍යවතුන් වහන්සේට ආදරයෙන් වන්දනා කළා. පැදකුණු කරලා පිටත් වෙලා ගියා. ඉතින් ඒ භික්ෂුව හුදෙකලා වුණා. පිරිසෙන් වෙන් වුණා. ….(පෙ)…. ඒ භික්ෂුව එක්තරා රහතන් වහන්සේ නමක් බවට පත්වුණා.
සාදු! සාදු!! සාදු!!!
මඤ්ඤමාන සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn3_1-2-2-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M