සැවැත් නුවරදී ……………
“පින්වත් මහණෙනි, මේ ගැන ඔබ මොකක් ද හිතන්නේ? කොයි වගේ භික්ෂුවක් ද කුලුපග වෙන්න සුදුසු? කොයි වගේ භික්ෂුවක් ද කුලුපග වෙන්න නුසුදුසු?”
“ස්වාමීනි, අප ගේ මේ ධර්මය භාග්‍යවතුන් වහන්සේ ම යි මුල් කර ගෙන තියෙන්නේ. භාග්‍යවතුන් වහන්සේ ම යි ප්‍රධාන කරගෙන තියෙන්නේ. භාග්‍යවතුන් වහන්සේ ම යි පිළිසරණ කරගෙන තියෙන්නේ. ස්වාමීනි, ඔය වදාළ කරුණ ගැන භාග්‍යවතුන් වහන්සේට ම වැටහෙන සේක්වා! භාග්‍යවතුන් වහන්සේ ගෙන් අසා ගෙනයි භික්ෂූන් මතක තබාගන්නේ …. (පෙ) …. භාග්‍යවතුන් වහන්සේ මෙය වදාළා.
“පින්වත් මහණෙනි, යම් කිසි භික්ෂුවක් මේ විදිහේ සිතකින් දායක ගෙවල්වලට යන්න පුළුවනි. ‘මට ම යි දෙන්න ඕන. මට නොදී සිටින්න එපා. මට ගොඩාක් දෙන්න ඕන. ටිකක් නම් දෙන්න එපා. මට ප්‍රණීත දෙයක් ම යි දෙන්න ඕන. රළු දෙයක් නම් දෙන්න එපා. මට ඉක්මනට දෙන්න ඕන. පමාවෙලා දෙන්න එපා. මට හොඳ පිළිවෙලකට ම යි දෙන්න ඕන. අපිළිවෙලකට දෙන්න එපා’ කියල. පින්වත් මහණෙනි, ඉතින් ඒ භික්ෂුව ඔය විදිහට හිතාගෙන දායක ගෙවල්වලට යනවා. එතකොට ඔහුට දෙන්නෙ නැති වුණා ම ඒ හේතුවෙන් ඔහු පීඩා විඳිනවා. ඒ හේතුවෙන් ඔහු දුක් දොම්නස් විඳිනවා. ඒ වගේ ම ඔහුට ටිකක් දෙනවා. ගොඩක් දෙන්නේ නෑ. ඒ හේතුවෙන් ඔහු පීඩා විඳිනවා. ඒ හේතුවෙන් ඔහු දුක් දොම්නස් විඳිනවා. ඔහුට රළු දෙයක් ලැබෙනවා. ප්‍රණීත දෙයක් ලැබෙන්නේ නෑ. ඒ හේතුවෙන් ඔහු පීඩා විඳිනවා. ඒ හේතුවෙන් ඔහු දුක් දොම්නස් විඳිනවා. ඔහුට හෙමිහිට ලැබෙනවා. ඉක්මනට ලැබෙන්නේ නෑ. ඒ හේතුවෙන් ඔහු පීඩා විඳිනවා. ඒ හේතුවෙන් ඔහු දුක් දොම්නස් විඳිනවා. ඔහුට අපිළිවෙලකට ලැබෙනවා. පිළිවෙලකට ලැබෙන්නේ නෑ. ඒ හේතුවෙන් ඔහු පීඩා විඳිනවා. ඒ හේතුවෙන් ඔහු දුක් දොම්නස් විඳිනවා. පින්වත් මහණෙනි, ඔන්න ඔය විදිහේ භික්ෂුවක් දායක ගෙවල්වලට පිවිසෙන්න සුදුස්සෙක් නොවේ.
ඒ වගේ ම පින්වත් මහණෙනි, යම් භික්ෂුවක් මෙබඳු සිතකින් යුක්තව දායක ගෙවල්වලට පිවිසෙන්න සුදුසුයි. ඔහු මෙහෙම හිතනවා. මේ විදිහේ දේවල් හිතලා අනුන් ගේ ගෙවල්වලින් ලැබීමක් ගැන කොහොම නම් බලාපොරොත්තු වෙන්නද? ඒ කියන්නේ මට ම යි දෙන්න ඕන. මට නොදී සිටින්න එපා. මට ගොඩාක් දෙන්න ඕන. ටිකක් නම් දෙන්න එපා. මට ප්‍රණීත දෙයක් ම යි දෙන්න ඕන. රළු දෙයක් නම් දෙන්න එපා. මට ඉක්මනට දෙන්න ඕන. පමාවෙලා දෙන්න එපා. මට හොඳ පිළිවෙලකට ම යි දෙන්න ඕන. අපිළිවෙලකට දෙන්න එපා’ කියල.
පින්වත් මහණෙනි, ඉතින් ඒ භික්ෂුව ඔය විදිහට හිතාගෙන දායක ගෙවල්වලට යනවා. එතකොට ඔහුට දෙන්නේ නැති වුණා ම ඒ හේතුවෙන් ඔහු පීඩා විඳින්නේ නෑ. ඒ හේතුවෙන් ඔහු දුක් දොම්නස් විඳින්නේ නෑ. ඒ වගේ ම ඔහුට ටිකක් දෙනවා ගොඩාක් දෙන්නේ නෑ. ඒ හේතුවෙන් ඔහු පීඩා විඳින්නේ නෑ. ඒ හේතුවෙන් ඔහු දුක් දොම්නස් විඳින්නේ නෑ. ඔහුට රළු දෙයක් ලැබෙනවා. ප්‍රණීත දෙයක් ලැබෙන්නේ නෑ. ඒ හේතුවෙන් ඔහු පීඩා විඳින්නේ නෑ. ඒ හේතුවෙන් ඔහු දුක් දොම්නස් විඳින්නේ නෑ. ඔහුට හෙමිහිට ලැබෙනවා. ඉක්මනට ලැබෙන්නේ නෑ. ඒ හේතුවෙන් ඔහු පීඩා විඳින්නේ නෑ. ඒ හේතුවෙන් ඔහු දුක් දොම්නස් විඳින්නේ නෑ. ඔහුට අපිළිවෙලකට ලැබෙනවා. පිළිවෙලකට ලැබෙන්නේ නෑ. ඒ හේතුවෙන් ඔහු පීඩා විඳින්නේ නෑ. ඒ හේතුවෙන් ඔහු දුක් දොම්නස් විඳින්නේ නෑ. පින්වත් මහණෙනි, ඔන්න ඔය විදිහේ භික්ෂුවක් දායක ගෙවල්වලට පිවිසෙන්න සුදුස්සෙක් වෙනවා.
පින්වත් මහණෙනි, මේ කස්සප මෙවැනි සිතකිනුයි දායක ගෙවල්වලට යන්නේ. කස්සප මෙහෙම හිතනවා. මේ විදිහේ දේවල් හිතලා අනුන් ගේ ගෙවල්වලින් ලැබීමක් ගැන කොහොම නම් බලාපොරොත්තු වෙන්නද? …. (පෙ) …. මට හොඳ පිළිවෙලකට ම යි දෙන්න ඕන. අපිළිවෙලකට දෙන්න එපා කියල.
පින්වත් මහණෙනි, ඉතින් ඒ කස්සප ඔය විදිහට හිතාගෙන දායක ගෙවල්වලට යනවා. එතකොට කස්සපට දෙන්නේ නැති වුණා ම ඒ හේතුවෙන් කස්සප පීඩා විඳින්නේ නෑ. ඒ හේතුවෙන් කස්සප දුක් දොම්නස් විඳින්නේ නෑ. ඒ වගේ ම කස්සපට ටිකක් දෙනවා. ගොඩක් දෙන්නේ නෑ. ඒ හේතුවෙන් කස්සප පීඩා විඳින්නේ නෑ. ඒ හේතුවෙන් කස්සප දුක් දොම්නස් විඳින්නේ නෑ. කස්සපට රළු දෙයක් ලැබෙනවා. ප්‍රණීත දෙයක් ලැබෙන්නේ නෑ. ඒ හේතුවෙන් කස්සප පීඩා විඳින්නේ නෑ. ඒ හේතුවෙන් කස්සප දුක් දොම්නස් විඳින්නේ නෑ. කස්සපට හෙමිහිට ලැබෙනවා. ඉක්මනට ලැබෙන්නේ නෑ. ඒ හේතුවෙන් කස්සප පීඩා විඳින්නේ නෑ. ඒ හේතුවෙන් කස්සප දුක් දොම්නස් විඳින්නේ නෑ. කස්සපට අපිළිවෙලකට ලැබෙනවා. පිළිවෙලකට ලැබෙන්නේ නෑ. ඒ හේතුවෙන් කස්සප පීඩා විඳින්නේ නෑ. ඒ හේතුවෙන් කස්සප දුක් දොම්නස් විඳින්නේ නෑ.
පින්වත් මහණෙනි, එක්කො මම අවවාද කරන්නම්. එක්කො කස්සපයන් අවවාද කරාවි. ඒ අවවාද ලබන අය කස්සප වගේ වෙනවා කියලයි ඔබ විසින් පිළිපැදිය යුත්තේ.
සාදු! සාදු!! සාදු!!!
කුලූපග සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_4-1-4/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M