සැවැත් නුවරදී ………………
එදා භාග්‍යවතුන් වහන්සේ ආයුෂ්මත් සාරිපුත්තයන් වහන්සේ අමතා මෙසේ වදාළා. “පින්වත් සාරිපුත්ත, මේ කාරණය කියැවෙන්නේ පාරායණ වර්ගයේ අජිත ප්‍රශ්නයේදී. ‘මේ සසුනෙහි පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් ඉන්නවා නම්, ඒ වගේම ආර්ය මාර්ගයෙහි හික්මෙන අනෙක් මාර්ගඵල ලාභී තව බොහෝ ශ්‍රාවකයන් ඉන්නවා නම්, පින්වත් නිදුකාණන් වහන්ස, මං මේ අහන්නේ උන්වහන්සේලාගේ ජීවිත පවත්වන ආකාරය ගැනයි. ඒ ගැන මට වදාළ මැනැව’ කියලා.
ඉතින් පින්වත් සාරිපුත්ත, සංක්ෂේපයෙන් කියපු ඔය කාරණයේ අර්ථය විස්තර වශයෙන් දැනගත යුත්තේ කොහොමද?” එතකොට ආයුෂ්මත් සාරිපුත්තයන් වහන්සේ නිශ්ශබ්ද වුණා. දෙවෙනි වතාවටත් භාග්‍යවතුන් වහන්සේ සාරිපුත්තයන් වහන්සේ අමතා වදාළා. ….(පෙ)…. දෙවෙනි වතාවටත් ආයුෂ්මත් සාරිපුත්තයන් වහන්සේ නිශ්ශබ්ද වුණා. තුන්වෙනි වතාවටත් භාග්‍යවතුන් වහන්සේ ආයුෂ්මත් සාරිපුත්තයන් වහන්සේ අමතා වදාළා, “පින්වත් සාරිපුත්ත, මේ කාරණය කියැවෙන්නේ පාරායණ වර්ගයේ අජිත ප්‍රශ්නයේදී. ‘මේ සසුනෙහි පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් ඉන්නවා නම්, ඒ වගේම ආර්ය මාර්ගයෙහි හික්මෙන අනෙක් මාර්ගඵල ලාභී තව බොහෝ ශ්‍රාවකයන් ඉන්නවා නම්, පින්වත් නිදුකාණන් වහන්ස, මං මේ අහන්නේ උන්වහන්සේලාගේ ජීවිත පවත්වන ආකාරය ගැනයි. ඒ ගැන මට වදාළ මැනැව’ කියලා.
ඉතින් පින්වත් සාරිපුත්ත, සංක්ෂේපයෙන් කියපු ඔය කාරණයේ අර්ථය විස්තර වශයෙන් දැනගත යුත්තේ කොහොමද?” එතකොට තුන්වෙනි වතාවටත් ආයුෂ්මත් සාරිපුත්තයන් වහන්සේ නිශ්ශබ්ද වුණා.
“පින්වත් සාරිපුත්ත, ‘මේ වනාහී හටගත් සත්වයෙක්’ කියලයි දැක්ක යුත්තේ.”
“ස්වාමීනී, මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා.
මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගෙන ආහාරයෙන් හටගැනීම ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා.
හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගන්නවා. හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ නිරුද්ධ වන ස්වභාවයට අයිති දේ ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා. ස්වාමීනී, ඔය විදිහටයි ආර්ය මාර්ගයෙහි හික්මෙන (සේඛ) කෙනෙක් වෙන්නේ.
ස්වාමීනී, පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් වෙන්නේ කොහොමද? ස්වාමීනී, මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ.
මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගෙන ආහාරයෙන් හටගැනීම ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ.
හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගන්නවා. හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලාදියුණු කරපු ප්‍රඥාවෙන් යථාභූත ඤාණයෙන් දැකගෙන ඒ නිරුද්ධ වන ස්වභාවයට අයිති දේ ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ. ස්වාමීනී, සදහම් පරිපූර්ණව අවබෝධ කරගත් රහතන් වහන්සේ නමක් වෙන්නේ ඔය විදිහටයි.
ඉතින් ස්වාමීනී, (සුත්ත නිපාතයට අයත්) පරායණ වර්ගයේ අජිත ප්‍රශ්නයේදී, ‘මේ සසුනෙහි පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් ඉන්නවා නම්, ඒ වගේම ආර්ය මාර්ගයෙහි හික්මෙන අනෙක් මාර්ගඵල ලාභී තව බොහෝ ශ්‍රාවකයන් ඉන්නවා නම්, පින්වත් නිදුකාණන් වහන්ස, මං මේ අහන්නේ උන්වහන්සේලාගේ ජීවිත පවත්වන ආකාරය ගැනයි. ඒ ගැන මට වදාළ මැනැව’ කියලා යම් කරුණක් පවසා තිබෙනවාද, ස්වාමීනී, ඔය සංක්ෂේපයෙන් පැවසූ කරුණ ගැන ඔය ආකාරයටයි විස්තර වශයෙන් මට අර්ථ වැටහෙන්නේ.”
“සාදු! සාදු! පින්වත් සාරිපුත්ත, මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා.
මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගෙන ආහාරයෙන් හටගැනීම ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා.
හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගන්නවා. හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ නිරුද්ධ වන ස්වභාවයට අයිති දේ ගැන කලකිරීම පිණිස, ඇල්ම දුරුවීම පිණිස, ඇල්ම නිරුද්ධ වීම පිණිස ප්‍රතිපත්තියෙහි යෙදෙනවා. පින්වත් සාරිපුත්ත, ඔය විදිහටයි ආර්ය මාර්ගයෙහි හික්මෙන (සේඛ) කෙනෙක් වෙන්නේ.
පින්වත් සාරිපුත්ත, පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් වෙන්නේ කොහොමද? පින්වත් සාරිපුත්ත, මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ වනාහී හටගත් සත්වයෙක් කියල දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ.
මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගන්නවා. මේ සත්වයා ආහාරයෙන් හටගෙන තිබෙන බව දියුණු කරපු ප්‍රඥාවෙන් යථාභූත ඤාණයෙන් දැකගෙන ආහාරයෙන් හටගැනීම ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ.
හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගන්නවා. හටගත්තා වූ යම් සත්වයෙක් ඇද්ද, එයට උපකාරී වූ ඒ ආහාර නිරුද්ධ වීමෙන් නිරුද්ධ වී යන ස්වභාවයෙන් යුක්තයි කියලා දියුණු කරපු ප්‍රඥාවෙන් යථාභූත ඤාණයෙන් දැකගෙන ඒ නිරුද්ධ වන ස්වභාවයට අයිති දේ ගැන කලකිරිලා, ඇල්ම දුරුවෙලා, ඇල්ම නිරුද්ධ වෙලා උපාදාන රහිත වෙලා දුකෙන් නිදහස් වෙලයි ඉන්නේ. පින්වත් සාරිපුත්ත, සදහම් පරිපූර්ණව අවබෝධ කරගත් රහතන් වහන්සේ නමක් වෙන්නේ ඔය විදිහටයි.
ඉතින් පින්වත් සාරිපුත්ත, (සුත්ත නිපාතයට අයත්) පරායණ වර්ගයේ අජිත ප්‍රශ්නයේදී, ‘මේ සසුනෙහි පරිපූර්ණව සදහම් අවබෝධ කරගත් යම් අරහත් ශ්‍රාවකයෙක් ඉන්නවා නම්, ඒ වගේම ආර්ය මාර්ගයෙහි හික්මෙන අනෙක් මාර්ගඵල ලාභී තව බොහෝ ශ්‍රාවකයන් ඉන්නවා නම්, පින්වත් නිදුකාණන් වහන්ස, මං මේ අහන්නේ උන්වහන්සේලාගේ ජීවිත පවත්වන ආකාරය ගැනයි. ඒ ගැන මට වදාළ මැනැව’ කියලා යම් කරුණක් පවසා තිබෙනවාද, පින්වත් සාරිපුත්ත, ඔය සංක්ෂේපයෙන් පැවසූ කරුණ ගැන ඔය ආකාරයටයි විස්තර වශයෙන් අර්ථ වටහාගත යුත්තේ.
සාදු! සාදු!! සාදු!!!
භූත සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn2_1-4-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M