මා හට අසන්නට ලැබුනේ මේ විදිහටයි. ඒ දිනවල ආයුෂ්මත් සාරිපුත්ත තෙරුන් වැඩසිටියේ සැවැත් නුවර ජේතවනය නම් වූ අනේපිඬු සිටුතුමාගේ ආරාමයේ. ඒ දිනවලම ආයුෂ්මත් සාරිපුත්ත තෙරුන් භික්ෂූන්ට ධර්මය කියා දෙනවා. මතු කරලා පෙන්නනවා. සමාදන් කරවනවා. උනන්දුව ඇතිකරවනවා. සතුටු කරවනවා. සැරියුත් තෙරුන් පවසන ඒ වචන ශිෂ්ට සම්පන්නයි. දොස් රහිතයි. අර්ථ ගිලිහෙන්නෙ නෑ. අර්ථය අවබෝධ වෙනවා. ඉතින් ඒ භික්ෂූන් වහන්සේලාත්, මේ ප්‍රයෝජනය සළකාගෙන, හොඳට සිත යොමු කරගෙන, මුළු හිතම යොමු කරගෙන හොඳට කන් යොමාගෙන, ධර්මයට සවන් දීගෙන ඉන්නවා.
එතකොට ආයුෂ්මත් වංගීස තෙරුන්ට මෙහෙම හිතුනා ‘මේ ආයුෂ්මත් සාරිපුත්තයන් වහන්සේ භික්ෂූන්ට ධර්මය කියා දෙනවා. මතු කරලා පෙන්නනවා. සමාදන් කරවනවා. උනන්දුව ඇතිකරවනවා. සතුටු කරවනවා. සැරියුත් තෙරුන් පවසන ඒ වචන ශිෂ්ට සම්පන්නයි. දොස් රහිතයි. අර්ථ ගිලිහෙන්නෙ නෑ. අර්ථය අවබෝධ වෙනවා. ඉතින් ඒ භික්ෂූන් වහන්සේලාත්, මේ ප්‍රයෝජනය සළකාගෙන, හොඳට සිත යොමු කරගෙන, මුළු හිතම යොමු කරගෙන හොඳට කන් යොමාගෙන, ධර්මයට සවන් දීගෙන ඉන්නවා. මං ආයුෂ්මත් සාරිපුත්තයන් වහන්සේට ප්‍රශංසා ලැබෙන විදිහේ ගාථාවන් ඉදිරිපත් කරන්න ඕන’ කියලා.
ඉතින් ආයුෂ්මත් වංගීසයන් ආසනයෙන් නැගිට්ටා. සිවුරු ඒකාංශ කරගත්තා. ආයුෂ්මත් සාරිපුත්ත තෙරුන්ට වැඳගත්තා. ආයුෂ්මත් සාරිපුත්ත තෙරුන්ට මෙහෙම කිව්වා.
“ප්‍රිය ආයුෂ්මත් සාරිපුත්තයන් වහන්ස, මට කාරණයක් වැටහෙනවා. ප්‍රිය ආයුෂ්මත් සාරිපුත්තයන් වහන්ස, මට කාරණයක් වැටහෙනවා.”
“ප්‍රිය ආයුෂ්මත් වංගීස, ඔබට එය වැටහේවා!”
එතකොට ආයුෂ්මත් වංගීසයන් ආයුෂ්මත් සැරියුත් තෙරුන් ඉදිරියේ සුදුසු ගාථාවලින් ප්‍රශංසා කළා.
“සාරිපුත්තයන් වහන්සේ මහා ප්‍රඥාවන්තයි. ගම්භීර ප්‍රඥාවක් තියෙනවා. හරිම බුද්ධිමත්. නිවන් මගත්, සසර මගත් ගැන තේරුම් ගන්න අතිශයින්ම දක්ෂයි. උන්වහන්සේ භික්ෂූන්ට දහම් දෙසනවා.
කෙටියෙනුත් දහම් දෙසනවා. විස්තර වශයෙනුත් දහම් දෙසනවා. සැළලිහිණියෙකුගේ වගේ ඉතා මිහිරි හඬක් උන්වහන්සේට තියෙන්නෙ. ප්‍රතිභාන ශක්තිය ඉස්මතු වෙවී එනවා.
අර්ථ රස වෑහෙන, සවන් යුග ඇදී යන මිහිරි කන්කළු ස්වරයෙන් උන්වහන්සේ දහම් දෙසන කොට භික්ෂූන් සවන් දීගෙන ඉන්නවා. භික්ෂූන් ඒ ධර්මයට සවන් දෙන්නෙ හරිම ප්‍රීතියෙන්, ඔද වැඩුණු සිතින්.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_8-1-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M