සැවැත් නුවර ජේතවනාරාමයේදී ……………………..
පින්වත් මහණෙනි, මේක ඉස්සර සිදුවෙච්ච දෙයක්. හොඳ, යහපත් ගුණධර්ම ඇති සිල්වත් ඉසිවරු ගොඩාක් මුහුදු තෙර කුටිවල වාසය කළා.
පින්වත් මහණෙනි. ඒ කාලෙ දෙවියන් හා අසුරයන් අතර යුද්ධයක් හටගත්තා. පින්වත් මහණෙනි, එතකොට ඒ යහපත් ගුණදහම් ඇති සිල්වත් ඉසිවරුන්ට මෙහෙම හිතුනා. “දෙවියෝ නම් ධාර්මිකයි. නමුත් අසුරයො අධාර්මිකයි. අසුරයන්ගෙන් අපට භය ඇතිවෙන්න පුළුවනි. අපි එහෙම නම් සම්බර අසුරේන්‍ද්‍රයා ළඟට ගිහින් අභය දානය ඉල්ලගන්න ඕන.”
පින්වත් මහණෙනි. ඉතින් බලවත් පුරුෂයෙක් අකුලපු අතක් දික් කරනවා වගේ, දික් කළ අතක් අකුලගන්නවා වගේ, ඒ යහපත් ගුණධර්ම ඇති යහපත් ඉසිවරු ඒ විදිහටම මුහුදු තීරයේ කුටිවලින් අතුරුදහන් වුනා. සම්බර අසුරේන්‍ද්‍රයා ඉදිරියේ පහළ වුනා. පින්වත් මහණෙනි, ඉතින් ඒ යහපත් ගුණධර්ම ඇති යහපත් ඉසිවරු සම්බර අසුරේන්‍ද්‍රයාට ගාථාවකින් පැවසුවා.
“සම්බර ළඟට මේ ඉසිවරු ආවේ අභය දානය ඉල්ලගෙනයි. භය දෙන්නත්, අභය දෙන්නත් පුළුවන්කම තිබෙන ඔබ, කැමැත්තක් කළ මැනව.”
(සම්බර) :
“අපට සතුරු වූ ශක්‍රයාත් එක්ක හිතවත්කම් පාන ඉසිවරුන්ට අභය දානයක් නැත. අභය දානය ඉල්ලන ඔබට භයමයි මම දෙන්නෙ.”
(ඉසිවරු) :
“අභය දානය ඉල්ලද්දිත්, ඔබ අපට දෙන්නෙ භයම නම්, ඔබේ ඒ කීම අපි පිළිගන්නවා. ඔබේ බිය ද නැති නොවේවා!
වපුරන්නේ යම් ආකාර බීජයක්ද, අස්වැන්නට ලැබෙන්නේ එබඳු බීජයන්මයි. යහපත් දේ කරන කෙනා, යහපත් විපාක ලබනවා. පව් කරන කෙනා පව් විපාක ලබනවා. දරුව, ඔබත් යම්කිසි බීජයක් වැපුරුවා. ඒකෙ ඵලය ඔබමයි ලබන්න ඕන.”
පින්වත් මහණෙනි, ඉතින් ඒ යහපත් ගුණධර්ම ඇති යහපත් ඉසිවරු ඒ සම්බර අසුරේන්‍ද්‍රයාට ශාප කළා. ඊට පස්සෙ බලවත් පුරුෂයෙක් හකුලපු අතක් දික්කරගන්නවා වගේ, දික් කළ අතක් හකුළගන්නවා වගේ ඒ ඉසිවරු සම්බර අසුරේන්‍ද්‍රයා ඉදිරියේ අතුරුදහන් වුනා. මුහුදු තෙර කුටිවල පහළ වුනා.
පින්වත් මහණෙනි, ඒ යහපත් ගුණදහම් ඇති සිල්වත් ඉසිවරුන්ගෙන් ශාප ලැබූ සම්බර අසුරේන්‍ද්‍රයා රාත්‍රියට තැති අරගෙන තුන් වතාවක් නැගිටිනවා.
සාදු! සාදු!! සාදු!!!
පළමු සුවීර වර්ගය අවසන් විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_11-1-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M