මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ විශාලා මහනුවර මහවනයේ, කූටාගාර ශාලාවේ. එදා පර්ජන්‍ය දෙවියන්ගේ දියණිය වන, ‘කෝකනදා’ දෙව්දුව ඒ රැය පහන් වන වෙලාවේ, මුළු මහත් මහවනයම ඒකාලෝක කරගෙන, භාග්‍යවතුන් වහන්සේව බැහැදකින්න පැමිණුනා. පැමිණ භාග්‍යවතුන් වහන්සේට වන්දනා කළා. පැත්තකින් හිටගත්තා. පැත්තකින් හිටගත් කෝකනදා නම් වූ පර්ජන්‍ය දියණිය භාග්‍යවතුන් වහන්සේ සමීපයේ මේ ගාථාවන් පැවසුවා.
“(ස්වාමීනි, භාග්‍යවතුන් වහන්ස,) මං කෝකනදා. මං පර්ජන්‍ය දෙවියන්ගේ දියණිය වූ කෝකනදා. විසල්පුර මහාවනයේ වැඩසිටින, හැම සතුනට අග්‍ර වූ සම්බුදුරජාණන් වහන්සේට සාදරයෙන් වන්දනා කරමි.
සදහම් ඇස් ඇති බුදු සමිඳුන් විසින් අවබෝධ කරන ලද ධර්මය ගැන මං ඉස්සර ඇහුවා විතරයි. නමුත් දැන්, ඒ සදහම් දෙසන, සුගත වූ මුනිඳුන්ගේ ධර්මය මං ප්‍රත්‍යක්‍ෂ වශයෙන්ම දන්නවා.
යම්කිසි කෙනෙක් නුවණ නැතිකමින් මේ ශ්‍රේෂ්ඨ ධර්මයට ගරහමින් ගියොත්, ඔවුන්ට සිද්ධ වෙන්නෙ දරුණු වූ රෞරව නරකාදියේ ඉපදිලා, බොහෝ කලක් දුක් විඳින්නයි.
නමුත් යම් කෙනෙක් මේ ශ්‍රේෂ්ඨ ධර්මය තුළ ඉවසීමටත්, සංසිඳීමටත් පැමිණුනොත්, ඔවුන් මිනිස් සිරුරු අත්හැරියාට පස්සේ, ඔවුන්ගෙන් තමයි දිව්‍යලෝක පිරෙන්නෙ.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_1-4-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M