මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ ශාක්‍ය ජනපදයේ කපිලවස්තු නුවර අසල මහාවනයේ. භාග්‍යවතුන් වහන්සේත් සමඟ සියල්ලන්ම රහත් වූ භික්‍ෂූන් පන්සීයක් පමණ වැඩසිටියා. එදා දස දහසක් ලෝකධාතුවලින් බොහෝ දෙවිවරු භාග්‍යවතුන් වහන්සේවත්, භික්‍ෂු සංඝයාවත් බැහැදකින්න ආවා.
එතකොට සුද්ධාවාස බඔලොව ඉන්න දෙවිවරුන් හතර දෙනෙකුට මෙහෙම හිතුනා. ‘මේ භාග්‍යවතුන් වහන්සේ ශාක්‍ය ජනපදයේ කිඹුල්වත්පුර අසල මහාවනයේ හැමදෙනාම රහත් වූ භික්‍ෂුන් වහන්සේලා සමඟ වැඩසිටිනවා. දස දහසක් සක්වලිනුත් බොහෝ දෙවිවරු, භාග්‍යවතුන් වහන්සේවත්, භික්‍ෂු සංඝයාවත් බැහැදකින්න පැමිණිල ඉන්නවා. ඉතින් අපිත්, භාග්‍යවතුන් වහන්සේව බැහැදකින්න යමු. ගිහින් අපි වෙන වෙනම භාග්‍යවතුන් වහන්සේ ළඟ ගාථාවන් කියමු.’
ඊට පස්සෙ ඒ දෙවිවරු බලවත් මිනිසෙක් හැකිලූ අතක් දිගහරිනවා වගේ, දික් කරපු අතක් හකුළගන්නවා වගේ, සුද්ධාවාස දෙවියන් කෙරෙන් අතුරුදහන් වෙලා, භාග්‍යවතුන් වහන්සේ ඉදිරියේ පහළ වුනා.
ඉතින් ඒ දෙවිවරු භාග්‍යවතුන් වහන්සේට වන්දනා කළා. පැත්තකින් හිටගත්තා. පැත්තකින් හිටගත්තු එක් දෙවියෙක් භාග්‍යවතුන් වහන්සේ සමීපයේ මේ ගාථාව පැවසුවා.
“මේ මහාවනයේ මහා රැස්වීමක්. දෙවිවරුන් රැස්වෙලා ඉන්නවා. අපරාජිත සඟරුවන බැහැදකින්න අපිත් මේ දහම් සභාවට ආවා.”
ඊට පස්සේ තව දෙවියෙක් භාග්‍යවතුන් වහන්සේ සමීපයේ මේ ගාථාව පැවසුවා.
“එතන සිටින භික්‍ෂුන් වහන්සේලා තමන්ගේ සිත් සමාධිගත කරගත්තා. සෘජු කරගත්තා. උන්වහන්සේලා ප්‍රඥාවන්තයි. රැහැන්පට අල්ලගෙන, අශ්වයන් හික්මවගෙන යන දක්‍ෂ රියදුරන් වගෙයි තම ඉඳුරන් රැකගෙන ඉන්නේ.”
එතකොට තව දෙවි කෙනෙක් භාග්‍යවතුන් වහන්සේ සමීපයේ මේ ගාථාව පැවසුවා.
“උන්වහන්සේලාට කෙලෙස් හුල් නෑ. අවිද්‍යා ආවරණය නෑ. කෙලෙස් නැමැති කණුව උදුරල දාලා, තෘෂ්ණා රහිතවයි ඉන්නෙ. සදහම් ඇස් ඇති බුදු සමිඳුන් විසින් මනාකොට දමනය කරන ලද උන්වහන්සේලා පිරිසිදු නිමල හැසිරීමෙන් යුක්තයි.”
එතකොට තව දෙවි කෙනෙක් භාග්‍යවතුන් වහන්සේ සමීපයේ මේ ගාථාව පැවසුවා.
“යම්කිසි කෙනෙක් බුදු සමිඳුන්ව සරණ ගියා නම්, ඒ උදවිය අපායට යන්නෙ නෑ. මිනිස් සිරුර අත්හැරියට පස්සේ ඒ උදවියගෙන් දෙව්ලොව පිරෙනවා.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/sn1_1-4-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M