☰

ඛුද්දක නිකාය

ථේරී ගාථා

5.3. සීහා ථේරීගාථා

5.3. සීහා තෙරණියගේ ගාථා

77. අයෝනිසෝ මනසිකාරා කාමරාගේන අට්ටිතා,
අහෝසිං උද්ධතා පුබ්බේ චිත්තේ අවසවත්තිනී.

77. ඉස්සර මං හිතුවේ වැරදි විදිහටමයි. කාමාශාවෙන් මේ සිත හරියට පීඩා වින්දා. ඉතින් මං හිටියෙ හිත දමනය කරගන්ට බැරිව. හිත හරියට විසිරිලා තිබුණා.

78. පරියුට්ඨිතා කිලේසේහි සුභසඤ්ඤානුවත්තිනී,
සමං චිත්තස්ස නාලභිං රාගචිත්තවසානුගා.

78. මං මේ අරමුණු සුභ වශයෙන් පිළිගත්තු නිසාමයි කෙලෙස් පීඩා ඇතිවුණේ. රාග සිතේ වසඟයට ගිය නිසාමයි චිත්ත සමාධියක් ලබාගන්ට බැරිවුණේ.

79. කිසා පණ්ඩු විවණ්ණා ච සත්ත වස්සානි චාරි’හං,
නාහං දිවා වා රත්තිං වා සුඛං වින්දිං සුදුක්ඛිතා.

79. මං ඒ දවස්වල හරිම කෙට්ටුයි. ඇඟපත විරූපී වෙලා, අවලස්සන වෙලා තිබුණේ. අවුරුදු හතක්ම මං මේ විදිහට දුක් වින්දා. කෙලෙස් නිසා දුක් විඳපු මට ගෙවී ගිය රෑ දවල් කිසි වෙලාවක පැවිදි සැපයක් (සමාධියක්) ලබාගන්ට බැරි වුණා.

80. තතෝ රජ්ජුං ගහෙත්වාන පාවිසිං වනමන්තරං,
වරං මේ ඉධ උබ්බන්ධං යඤ්ච හීනං පුනාචරේ.

80. අන්තිමේදී මං කඹයක් අරගෙන වනාන්තරේ ඇතුළට ගියා. මේ පහත් ගිහි ජීවිතේට බැසගන්නවට වඩා බෙල්ල වැලලා ගෙන මැරෙන එක මට උතුම්.

81. දළ්හං පාසං කරිත්වාන රුක්ඛසාඛාය බන්ධිය,
පක්ඛිපිං පාසං ගීවාය අථ චිත්තං විමුච්චි මේති.

81. තොණ්ඩුව හොඳට සකස් කරල ඒ කඹය ගහේ අත්තක බැන්දා. ඒ තොණ්ඩුව බෙල්ලට දා ගත්තා. එතකොට මගේ සිත හැම කෙලෙස්වලින්ම නිදහස් වුණා.

ඉත්ථං සුදං සීහා ථේරී ගාථායෝ අභාසිත්ථා’ති.

මේ වනාහී සීහා නම් රහත් තෙරණිය වදාළ ගාථාවන්ය.

ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_5-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M