271. පින්වත් දුවේ, ඔයා ශ්‍රමණයන් ගැන කිය කියා ම යි නින්දට යන්නෙ. ශ්‍රමණයන් ගැන කිය කියා ම යි අවදිවන්නෙත්. ශ්‍රමණයන් ගේ ගුණ ම යි කියන්නෙ. මොකද ඔයාටත් ශ්‍රමණියක් වෙන්ට හිතුණ ද?
272. ඔයා ශ්‍රමණයන්ට ම යි බොහෝ දානමාන දෙන්නෙ. රෝහිණී දුවේ, මං ඔයාගෙන් අහන්නෙ මේක යි. ඔයාට ශ්‍රමණයන් ව ඔය තරම් ප්‍රිය වුණේ ඇයි?
273. ඒගොල්ලො වැඩක් පලක් කරන්ටත් කම්මැලියි. අලසයි. අනුන් දීපු දේකින් තමයි ජීවත් වෙන්නෙ. අනුන්ගේ දෙයක් ම යි බලාගෙන ඉන්නෙ. හොඳ දේවල් ම යි කැමැති. ඉතින් එහෙම තියෙද්දි ඔයාට මේ ශ්‍රමණයන්ව ඔය තරම් ප්‍රිය වුණේ ඇයි?
274. තාත්තෙ, ඔයා ශ්‍රමණයන් ගැන මගෙන් ඇහැව්වෙ ගොඩක් කාලෙකින්. මං දැන් ඔයාට කියන්නම්, ඒ ශ්‍රමණයන් ගේ ප්‍රඥාව ත්, සීලය ත්, වීරිය ත් ගැන.
275. ඒ ශ්‍රමණයන් හරි ම කැමැති යි නිවන් අවබෝධ කරගන්ට. කම්මැලි නෑ. ලෝකෙ තියෙන ශ්‍රේෂ්ඨ ම වැඬේ තමයි කරන්නෙ. ඒ තමයි රාග ද්වේෂ දුරු කරන එක. අන්න ඒ නිසයි මං ශ්‍රමණයන්ට කැමැති.
276. පිරිසිදු ජීවිත ගතකරනවා. ඒ ශ්‍රමණයින් ලෝභ, ද්වේෂ, මෝහ දුරු කරනවා. ඒ ගොල්ලො අරහත්වය ම ලබාගෙන හැම පවක් ම නැති කරල දානවා. අන්න ඒ නිස යි මං ශ්‍රමණයන්ට කැමැති.
277. පිරිසිදු දේවල්මයි උන්වහන්සේල කරන්නෙ. පිරිසිදු වචන ම යි කතා කරන්නෙ. පිරිසිදු දේවල් ම යි සිතන්නෙ. අන්න ඒ නිස යි මං ශ්‍රමණයන්ට කැමැති.
278. ඒ ශ්‍රමණයන් ආධ්‍යාත්මික වශයෙනුත් පිරිසිදු යි. බාහිර වශයෙනු ත් පිරිසිදුයි. නිර්මල සක්මුතු වගේ. කුසල් දහම් වලින් පිරිල ඉන්නෙ. අන්න ඒ නිස යි මං ශ්‍රමණයන්ට කැමති.
279. ඒ ශ්‍රමණයන් බුදු සමිඳුන්ගේ ධර්මය ගොඩාක් අහල තියෙනවා. ඒ ධර්මය මතක තියාගෙන ඉන්නවා. ධාර්මික ජීවිතයෙන් ම උසස් තත්වයට පත්වෙල ඉන්නෙ. ඒ නිසයි මං ශ්‍රමණයන්ට කැමැති.
280. ඒ ශ්‍රමණයන් බුදු සමිඳුන්ගේ ධර්මය ගොඩාක් අහල තියෙනව. ඒ ධර්මය මතක තියාගෙන ඉන්නවා. ධාර්මික ජීවිතෙන් ම උසස් තත්වයට පත්වෙලා ඉන්නෙ. සමාහිත සිතින්, හොඳ සිහියෙන් ඉන්නෙ. අන්න ඒ නිස යි මං ශ්‍රමණයන්ට කැමැති.
281. ඈත සේනාසනවලයි වැඩ ඉන්නෙ. හොඳ සිහි නුවණින් කල් ගෙවන්නෙ. නුවණ පාවිච්චි කරල යි කතා කරන්නෙ. හරි ම නිහතමානි යි. දුකේ අවසානය වූ අමා නිවන ගැන දැනගෙන යි ඉන්නෙ. අන්න ඒ නිසයි මං ශ්‍රමණයන්ට කැමැති.
282. ඒ ශ්‍රමණයන් ගමකින් තවත් ගමකට වඩිනකොට කිසි ම දෙයක් අපේක්ෂා කරන්නෙ නෑ. ආපසු හැරිල බලන්නෙ නෑ. අපේක්ෂා රහිත ව ම අත්හැරල යනවා. අන්න ඒ නිසයි මං ශ්‍රමණයන්ට කැමැති.
283. ඒ ශ්‍රමණයන් තමන් ගෙ දේවල් පෙට්ටගම්වල දාන්නෙ නෑ. හැලි වළංවල දාන්නෙ නෑ. මලුවල හංගන්නෙ නෑ. කාගෙ හරි ගෙදරක ඉදෙන බත් චුට්ටක් විතරයි සොයා ගෙන යන්නෙ. අන්න ඒ නිසයි මං ශ්‍රමණයන්ට කැමැති.
284. ඒ ශ්‍රමණයන් මිල මුදල් පිළිගන්නෙ නෑ. රන් රිදී පිළිගන්නෙ නෑ. ඒ වෙලාවට ලැබෙන දේකින් ජීවත් වෙනවා. අන්න ඒ නිස යි මං ශ්‍රමණයන්ට කැමැති.
285. ඒ ශ්‍රමණයන් නොයෙක් කුලවලින් ඇවිත්, නොයෙක් පළාත්වලින් ඇවිත් මහණ වෙලා ඉන්නෙ. නමුත් ඒ කිසි භේදයක් නැතිව එකිනෙකාට මෛත්‍රියෙන් ම යි වාසය කරන්නෙ. අන්න ඒ නිස යි මං ශ්‍රමණයන්ට කැමැති.
286. පින්වත් රෝහිණී දුවේ, ඔයා ගෙ හිතේ ලොකු ශ්‍රද්ධාවකුත්, ලොකු ගෞරවයකුත් තියෙනවා, ඒ බුදු සමිඳුන් ගැනත්, සද්ධර්මය ගැනත්, ආර්ය ශ්‍රාවක සංඝරත්නය ගැනත්, ඇත්තෙන් ම ඔයා අපේ පවුලෙ උපන්නෙ අපේ වාසනාවට.
287. ඇත්තෙන් ම ඔයා හඳුනාගෙන තියෙන්නෙ අනුත්තර පින්කෙත ගැන. ඒ ශ්‍රමණයන් වහන්සේලා අපේ දානෙ පිළිගන්නවා නම්, අපට ඒ දානයෙන් මහත් ඵල මහානිශංස ලැබෙනවා.
288. තාත්තේ, ඉතින් ඔය ත් දුකට බය නම්, දුකට අකැමැති නම්, ඔය ත් අකම්පිත සිත් ඇති බුදු සමිඳුන් ව ත්, සද්ධර්මය ත්, ආර්ය සංඝරත්නය ත් සරණ යන්න. සිල් සමාදන් වෙන්න. ඒක ඔයාට ගොඩාක් යහපත පිණිස හේතු වෙනවා.
289. ඔව් දුව, මාත් අකම්පිත සිත් ඇති බුදු සමිඳුන් ව ත්, සද්ධර්මය ත්, ආර්ය ශ්‍රාවක සංඝරත්නය ත් සරණ යනවා. මාත් සිල් සමාදන් වෙනවා. ඒක මට ගොඩාක් යහපත පිණිස පවතීවි.
290. මං බ්‍රාහ්මණ කුලේ උපන් නිසා මට කිව්වෙ බ්‍රහ්මබන්ධු කියල. නමුත් මං ඇත්තට ම බ්‍රාහ්මණයෙක් වුණේ දැනුයි. මාත් ත්‍රිවිද්‍යාව ලබාගත්තා. යහපතට පත් වුණා. ධර්මයේ මුදුනට පැමිණුනා. පව් සෝදල දැම්මා.
මේ වනාහී රෝහිණී නම් රහත් තෙරණිය වදාළ ගාථාවන් ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn6_20-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M