818. මහා වීරිය ඇති භාග්‍යවත් මුනිඳුනි, ඔබවහන්සේට තියෙන්නේ පරිපූර්ණ ශරීරයක්. ලස්සනම ලස්සන රූපයක්. සුන්දර උපතක්. සුන්දර පෙනුමක්. රත්තරන් පාට සිරුරක්. සුදෝ සුදු දත් දෙපලක්.
819. වාසනාවන්ත උපතක් ලබපු කෙනෙකුගේ ශරීරයේ ඒ ගැන උතුම් සලකුණු තියෙනවා. ඔබවහන්සේගේ ශරීරයේ ඒ උතුම් මහා පුරුෂ ලක්ෂණ තියෙන බව මට පේනවා.
820. ඔබවහන්සේගේ ඇස් දෙක හරිම ලස්සනයි. මුව මඬල හරිම සුන්දරයි. උස මහත බ්‍රහ්මයෙකුගේ වගෙයි. ශ්‍රමණයන් වහන්සේලා මැද ඔබවහන්සේ වැඩ සිටිනකොට හිරු මඬල බබලනවා වගෙයි.
821. පින්වත් ශ්‍රමණයන් වහන්ස, රත්තරන් පාට සමකින් යුතු ඔබවහන්සේ නම් හරිම ලස්සනයි. මෙච්චර ලස්සන රූපයක් තියෙන ඔබවහන්සේ මහණ වීමෙන් ඇති ඵලය කුමක්ද?
822. ඔබවහන්සේට ගැලපෙන්නෙ සතර මහා සාගරය ජය අරගෙන මුළු දඹදිවට අග රජු වන මහා රථ තියෙන සක්විති රජෙක් වීමයි.
823. එතකොට ඔබවහන්සේ පස්සෙන් මහා සම්භාවනීය රජවරු එනවා. පින්වත් ගෞතමයාණෙනි, රජුන්ට රජ වූ මිනිසුන්ගේ ශක්‍රයා වූ රජෙක් විදිහට වැඩකරන්ට පුළුවන් නේද?
824. (භාග්‍යවතුන් වහන්සේ) පින්වත් සේල, මං රජෙක්. අති උතුම් සදහම් රජෙක්. මං පවත්වන මේ ධර්ම චක්‍රය ලෝකෙ කාටවත් ආපහු හරවන්ට බැරි වක්‍රයක්.
825. (සේල බ්‍රාහ්මණ) පින්වත් ගෞතමයාණෙනි, ඔබවහන්සේ ඔය පවසන්නේ අති උතුම් සදහම් රජු වන සම්මා සම්බුදු කෙනෙක් බවද?
826. එහෙම නම්, පින්වත් ඔබවහන්සේගේ සේනාපතියා කවුද? ඔබවහන්සේ විදිහටම ධර්ම චක්‍රය පවත්වන්ට පුළුවන් වූ ශාස්තෘන් වහන්සේගේ අනුජාත ශ්‍රාවකයාණන් කවුද?
827. (භාග්‍යවතුන් වහන්සේ) පින්වත් සේල, මං විදිහට මයි එයා අති උතුම් ධර්ම චක්‍රය පවත්වන්නේ. එයාට තමයි තථාගත අනුජාත සාරිපුත්ත කියන්නෙ.
828. අවබෝධ කළ යුතු ඔක්කොම දේවල් මං අවබෝධ කළා. භාවනා වශයෙන් වැඩිය යුතු ඔක්කොම දේවල් මං වැඩුවා. නැති කරල දැමිය යුතු ඔක්කොම දේවල් මං නැති කළා. පින්වත් බ්‍රාහ්මණය, මම තමයි බුද්ධ කියන්නෙ.
829. පින්වත් බ්‍රාහ්මණය, මං ගැන තියෙන සැක සංකා නැති කරල දාන්න. පහන් සිත් ඇති කරගන්න. සම්මා සම්බුදුවරයෙක් හැම තිස්සෙම දකින්ට ලැබෙනවයි කියන්නෙ අතිශයින්ම දුර්ලභ එකක්.
830. ලෝකයේ හැම තිස්සෙම දකින්න පුළුවන් විදිහට කෙනෙක් සිටීම අතිශයින්ම දුර්ලභ දෙයක්. අන්න ඒ කෙනා මමයි. පින්වත් බ්‍රාහ්මණය, මං අතිඋතුම් ශල්‍ය වෛද්‍යවරයෙක්. මං සම්බුදු කෙනෙක්.
831. මං ශ්‍රේෂ්ඨත්වය ලබාගත්තු කෙනෙක්. අසහාය කෙනෙක්. මාර සේනාව පරාජය කළ කෙනෙක්. සතුරු බලවේග නැති කරල දාල කිසිම පැත්තකින් බයක් නැති කෙනෙක්.
832. (සේල බ්‍රාහ්මණ) පින්වත්නි, සදහම් ඇස් ඇති මුනිඳුන් මේ පවසන සුන්දර වචන හොඳට අසා ගන්න. උන්වහන්සේ සත්වයින්ගේ සිත්වලින් කෙලෙස් හුල් උදුරා දමන ශල්‍ය වෛද්‍යවරයෙක්. මහා වීරියවන්තයෙක්. වනාන්තරයේ නද දෙන සිංහ රාජයෙක් වගෙයි.
833. උන්වහන්සේ ශ්‍රේෂ්ඨත්වයෙන් නිර්මාණය වෙලා තියෙන්නෙ. අසහාය කෙනෙක්. මාර සේනා පරදවා ජය ලැබූ කෙනෙක්. මේ සමිඳුන් දකින විට ඕනෑම තරාතිරමක කෙනෙක් නොපහදින්නෙ කොහොමද?
834. උතුම් නුවණ තිබෙන මේ බුදු සමිඳුන් ළඟ මං මහණ වෙනවා. ඔයාලත් කැමති නම් මාත් සමඟ මහණ වෙන්න. අකමැති නම් ආපහු යන්න.
835. (ශිෂ්‍ය පිරිස) පින්වත් ආචාර්තුමනි, සම්බුදු සමිඳුන්ගේ ශාසනයට ඔයා මේ තරම් ආශා නම්, අපිත් කැමතියි ඒ උතුම් නුවණ තියෙන බුදු සමිඳුන් ළඟ මහණ වෙන්න.
836. (සේල බ්‍රාහ්මණයා) භාග්‍යවතුන් වහන්ස, මෙතන තුන්සීයක බ්‍රාහ්මණ පිරිසක් ඉන්නවා. අපි ඔක්කොම ඔබවහන්සේට වැඳලා මේ ඉල්ලන්නෙ උතුම් බඹසර ජීවිතයයි. ඔබවහන්සේ ළඟ අපි ඔක්කොම බඹසර රකින්ට කැමතියි.
837. (භාග්‍යවතුන් වහන්සේ) පින්වත් සේල, මං කියා දෙන විදිහට අප්‍රමාදීව කටයුතු කළොත් මේ මහණකම හිස් දෙයක් වෙන්නෙ නෑ. උතුම් බඹසර ජීවිතය ගැන මං ඉතාම පැහැදිලිව කියල දීල තියෙන්නෙ. මේ ධර්මය මේ ජීවිතයේදීම දකින එකක්. (සන්දිට්ඨික) ඕනෑම කාලයක දකින එකක්. (අකාලික)
838. (සේල බ්‍රාහ්මණ) දහම් ඇස් ඇති මුනිඳුනි, ඇත්තෙන් ම අපි මේ උතුම් තිසරණයට ආවේ දවස් අටකට කලින්. භාග්‍යවතුන් වහන්ස, දවස් හතක් ඇතුලත අපි ඔක්කොම සදහට ම දමනය වුණා.
839. ඇත්තෙන් ම ඔබවහන්සේ බුදු කෙනෙක් ම යි. සැබෑ ම ශාස්තෘන් වහන්සේ නමක් ම යි. මාර බලය අභිබවා ගිය මුනිවරයා ම යි. සියලු කෙලෙස් සිඳ ගෙන සසරින් එතෙරට වැඩිය ඔබවහන්සේ අපවත් මේ සංසාරයෙන් එතෙර කළා.
840. ඔබවහන්සේ සියලු කෙලෙස් ඉක්මවා ගියා. ආශ්‍රවයන් වැනසුවා. හැම භවයක් ම නැති කළා. උපාදාන රහිත වුණා. ඇත්තෙන්ම ඔබවහන්සේ සිංහ රාජයෙක් වගෙයි.
841. මහා වීරියවන්ත මුනිඳුනි, තුන්සියයක් භික්ෂූන් වහන්සේලා මේ වැඳගෙනයි සිටින්නේ. ඔය සිරිපා යුගල දිගු කළ මැනව. මේ ඇතුන් පිරිස ශාස්තෘන් වහන්සේගේ සිරි පතුල් වඳිත්වා!
මෙය වනාහී ආයුෂ්මත් සේල නම් රහත් මුනිඳුන් වදාළ ගාථාවන්ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_20-1-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M