705. (සොරු) ඉස්සර අපි බිලි පූජාවලටත් සල්ලි ගන්ටත් මිනිස්සු මැරුවා. අපි ඒ මිනිස්සුන්ව යටත් කර ගත්තහම ඒ ගොල්ල හරියට බය වුණා. බයට පත්වෙලා වෙව්ලන්න පටන් ගත්තා. හඬා වැලපෙන්න පටන් ගත්තා.
706. එහෙත් හරිම පුදුමයි, ඔබ බයවෙලා සිටින බවක් අපට පේන්නෙ නෑ. අනික ඔබේ ශරීරයත් ලස්සනට බබලනවා. මේ වගේ භයානක අවස්ථාවක් ඉදිරියේදී වැලපෙන්නෙ නැතිව ඉන්නෙ කොහොමද?
707. (අධිමුත්ත තෙරිඳු) පින්වත, මං ඉන්නෙ අපේක්ෂාවක් නැති සිතින්. මට කිසිම මානසික දුකක් නෑ. හැම බන්ධනයක්ම නැති කරල දාපු කෙනෙකුට බිය උපදින හැමදේම ඉක්මවා යන්ට පුළුවන්.
708. චතුරාර්ය සත්‍යය ධර්මය සම්පූර්ණයෙන්ම අවබෝධ කළොත් භව රැහැන් ඔක්කොම කැඩිලා යනවා. කෙලෙස් බර පැත්තකින් තිබ්බාම මරණය ඉදිරියේ භය වෙන්න කිසි දෙයක් නෑ.
709. මං මේ උතුම් ජීවිතයේ ඉතා හොඳට හසුරුවලා තියෙන්නෙ. නිවනට යන මග සම්පූර්ණ කරල තියෙන්නෙ. මරණය ගැන මට කිසිම භයක් නෑ. මරණය කියල කියන්නෙ මට සනීප වෙච්ච ලෙඩක් වගේ දෙයක්.
710. මං මේ උතුම් ජීවිතය ඉතා හොඳට හසුරුවා ගත්තා. නිවන් මග සම්පූර්ණ කර ගත්තා. ආශ්වාදයක් නැති මේ භවය නුවණින් දැකගත්තා. ඒ නිසා මරණය කියල කියන්නෙ මට නම් බීපු විෂක් වමනෙ දැම්මා වගේ.
711. සංසාරෙන් එතෙර වෙච්ච, කිසි බැඳීමක් නැති කිසි ආශ්‍රවයක් නැති මුනිවරයා ජීවත් වෙන්ට තිබෙන කාලය අවසන් වුණාම ඒ ගැන සතුටු වෙනවා. හිස ගසාලන දං ගෙඩියෙන් නිදහස් වුණ කෙනෙක් වගෙයි. (රහතුන්ට ජීවත්වීම මරණය කැඳවන දංගෙඩියක් වැන්න.)
712. මේක ධර්මතාවක්, අරහත්වයට පැමිණි කෙනා මේ ලෝකයේ කිසිම දෙයක් ගැන කිසිම අපේක්සාවක් නෑ. ගිනි ගන්න ගෙදරකින් එළියට පැනපු කෙනෙක් වගෙයි. මරණය ඉදිරියේ ශෝක වෙන්න දෙයක් නෑ.
713. හේතු ඵල දහමින් සකස් වූ දෙයක් යම් තැනක තියෙනවා නම්, භවයක් යම් තැනක තියෙනවා නම්, ඒ හැමතැනම තියෙන්නෙ ආත්ම රහිත දෙයක්. මහා ඉසිවර බුදු සමිඳුන් තමයි මේ දහම වදාළේ.
714. බුදු සමිඳුන් වදාළ ධර්මය ඒ විදිහටම අවබෝධ කර ගත්තොත් එයා කිසි භවයක් අල්ල ගන්නෙ නෑ. එයාට භවය පෙනෙන්නෙ ගින්දර පාටට රත්වෙලා ගිය යකඩ ගුලියක් වගෙයි.
715. ඉස්සර මං හිටිය කියල අදහසක් මට නෑ. අනාගතයේ මං ඉන්නවා කියල අදහසක් මට නෑ. සකස් වෙන හැමදෙයක් ම වෙනස් වෙලා යනවා. ඉතින් එවැනි දෙයක් ගැන මං වැලපෙන්නෙ මොකටද?
716. පින්වත, පැහැදිලිව ම ජීවිතය කියන්නෙ දුක පිණිස හේතු ඵල ධර්මයක සකස් වීමයි. (පටිච්ච සමුප්පාදයකි.) පැහැදිලිවම සකස් වෙච්ච දේවල්වල පැවැත්මකි. මේ සත්‍යය ඒ ආකාරයෙන්ම අවබෝධ වුණ කෙනෙකුට භයක් ඇති වෙන්නෙ නෑ.
717. දියුණු කරපු ප්‍රඥාවෙන් ජීවිතය දිහා බලනකොට පෙනෙන්නෙ දර ගොඩක් වගෙයි. මගේ කියා අල්ලාගත හැකි කිසිම දෙයක් එයාට ලැබෙන්නෙ නෑ. ඉතින් එහෙම කෙනෙකුට මගේ දේ නැති වෙනවා කියල ශෝක කරන්න දෙයක් නෑ.
718. ඇත්තෙන්ම මේ ශරීරය ගැන මං කලකිරිලයි ඉන්නෙ. මේ භවයෙන් මට කිසිම වැඩක් නෑ. මේ කය බිඳීයන දෙයක්මයි. ආයෙමත් වෙන කයක් මට ඕනෙ නෑ.
719. දැන් ඉතින් මේ ශරීරයෙන් ඔබට ප්‍රයෝජනයක් තිබෙනවා නම් ඒ කැමති දේ කරන්න. (මරා දමන්න) ඒ ගැන මට පසුතැවෙන්ට දෙයක් නෑ. තරහකුත් නෑ. ප්‍රේමයකුත් නෑ.
720. රහතන් වහන්සේගේ වචන අහගෙන හිටිය හොරු පිරිස විස්මයට පත්වුණා. ඔවුන්ගේ සිරුරුවල ලොම් කෙලින් වුණා. අතේ තිබුණ ආයුධ වීසි කරලා දැම්මා. ඒ රහත් මුනිඳුන්ට මෙහෙම කිව්වා.
721. (සොරු) පින්වත් මුනිඳුනි, ඇත්තෙන්ම කවුද ඔබේ ගුරුවරයා? මේ විදිහට ශෝක නොවී සිටින්ට පුළුවන් වුණේ කාගෙ ධර්මයක් තුළින්ද?
722. (අධිමුත්ත සමිඳු) මගේ ගුරුදේවයන් වහන්සේ අවබෝධ කළ යුතු සියලුම දේ අවබෝධ කළ කෙනෙක්. සියලු ලෝකය ජයගත් කෙනෙක්. මහා කාරුණික කෙනෙක්. සර්වඥ කෙනෙක්. උන්වහන්සේ මගේ ශාස්තෘන් වහන්සේ. උන්වහන්සේ තමයි මේ ලෝකයට සදහම් බෙහෙත් බෙදන්නෙ.
723. හැම දුක් අවසන් කරන පරම ශ්‍රේෂ්ඨ වූ මේ ධර්මය ඒ බුදු සමිඳාණන් තමයි මට කියල දුන්නේ. ඉතින් මං ඒ ධර්මය තුළට පැමිණුනා. මේ ශෝක රහිත ජීවිතය ලබාගත්තා.
724. මහ ඉසිවර ඒ රහතුන්ගේ උතුම් ධර්මය අහපු ඒ හොරු ඔක්කොම අවි ආයුධ වීසිකරලා දැම්මා. සමහර අය සොරකම් වලින් වැලකිලා යහපත් අය වුණා. තවත් අය මහණ වුණා. බුදු සසුන බැබලුවා. (රහත් වුණා.)
725. ඒ හොරු සුගතයන් වහන්සේගේ ශාසනයේ මහණ වෙලා බොජ්ඣංග ධර්ම, බලධර්ම දියුණු කරගෙන නුවණ ලබාගෙන සතුටු සිතින් භාවනා කරමින් ඒ දියුණු කරපු ශ්‍රද්ධාදී ඉඳුරන් නිසාම හේතු ඵල දහම ඉක්මවා ගියා. ඒ අමා නිවන් සුව අවබෝධ කළා.
මෙය වනාහී ආයුෂ්මත් අධිමුත්ත නම් රහත් මුනිඳුන් වදාළ ගාථාවන්ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_20-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M