645. මං ගිහි ජීවිතය අත්හැරලා මහණ වෙච්ච දවසේ ඉඳලා මේ දක්වාම මගේ හිතේ කිසිම ද්වේෂ සහගත සිතිවිල්ලක් ඇති වෙච්ච බවක් මං දන්නෙ නෑ.
646. මේ සත්වයෝ මැරෙත්වා! වැනසෙත්වා! දුකට පත්වෙත්වා! යන හැඟීමක් වත් මෙච්චර දීර්ඝ කාලයක් තුළ මා තුළ ඇතිවුණ බවක් මං දන්නෙ නෑ.
647. මෛත්‍රිය ගැන බුදුසමිඳුන් කියා දුන්න ආකාරයටම මං මෛත්‍රී භාවනාව කළා. අප්‍රමාණ මෙත් සිත ක්‍රම ක්‍රමයෙන් පුරුදු කළ බව මං දන්නවා.
648. තරහක් නැති සිතින් යුතුව හැම මිතුරන් යහළුවන් සත්වයන් හැමදෙනා ගැනම අනුකම්පාවෙන් මං මෛත්‍රී සිත වඩනවා.
649. කිසිම බැඳීමක් නැති වෙනස් වීමක් නැති ඒ මෛත්‍රියෙන්මයි සිතේ සතුට ඇති වෙන්නේ. නුවණ නැති ජනතාව මෙය පුරුදු කරන්නෙ නෑ. එහෙත් මං සතර බ්‍රහ්ම විහරණයන්ම පුරුදු කරනවා.
650. සම්බුදු සමිඳුන්ගේ ශ්‍රාවක භික්ෂුව විතර්ක නැති ධ්‍යානයට කියන්නෙ ආර්ය වූ නිශ්ශබ්දතාවය කියලා. ඒ භික්ෂුව එයට සම වදිනවා.
651. ඉතා හොඳින් නිශ්චලව පිහිටි ගල් පර්වතය වගේ මෝහය නැති කරපු භික්ෂුවත් අකම්පිතයි.
652. නිතරම යහපතම හොයාගෙන ගිය කෙලෙස් නැති කෙනාට කෙස් ලෝමයක අග තිබෙන දෙයක් තරම් ඉතා කුඩා වරද පවා වළාකුලක් වගේ ලොකුවට පේනවා.
653. ඇතුළු නුවරත්, පිට නුවරත් ඉතා හොඳට ආරක්ෂා වෙලා තියෙන නගරයක් වගෙයි, තමන්ගෙ ජීවිතය වරදට වැටෙන්න නොදී රැකගන්න ඕනෙ. මේ උතුම් අවස්ථාව මග හරින්ට එපා.
654. මට දැන් මරණය ගැන අමුතු ආශාවක් නැත. ජීවිතය ගැනත් අමුතු ආශාවක් නැත. මාසෙ පඩිය ලබාගෙන ඉන්න කෙනෙක් වගේ මං මේ කල් බලාගෙන ඉන්නෙ පිරිනිවන් පෑමටයි.
655. මට දැන් මරණය ගැන ද අමුතු ආශාවක් නැහැ. ජීවිතය ගැන ද අමුතු ආශාවක් නැහැ. හොඳට සිහිය පිහිටුවාගෙන නුවණින් යුක්තව මං මේ කල් බලාගෙන ඉන්නෙ පිරිනිවන් පෑමටයි.
656. මං ශාස්තෘන් වහන්සේව ඉතා ගෞරවයෙන් ඇසුරු කළා. බුදු සසුන සම්පූර්ණ කරගත්තා. කෙලෙස් බර පැත්තකින් තිබ්බා. භව රැහැන කපලා දැම්මා.
657. ගිහි ජීවිතය අතහැරලා මං මහණ වුණේ උතුම් බලාපොරොත්තුවක් ඇතිව. මගේ ඒ උතුම් අදහස ඉෂ්ට වුණා. හැම බැන්ධනයක්ම නැතිකරලා දැම්මා.
658. ඉතින් පින්වත්නි, මෙච්චරයි මට කියන්න තියෙන්නෙ. අප්‍රමාදීව නිවන් මගේ හැසිරෙන්න. මා නම් ඒකාන්තයෙන්ම පිරිනිවන් පානවා. හැම දුකින්ම නිදහස් වුණා.
මෙය වනාහී ආයුෂ්මත් ඛදිරවනයේ රේවත නම් රහත් මුනිඳුන් වදාළ ගාථාවන්ය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_14-1-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M