587. තමන්ගේ යහපත සොයා බලන කෙනා, සොයා බැලිය යුත්තේ බුදුන් වදාළ ධර්මයමය. ඒ වගේම එයා ශ්‍රමණයන්ට ගැලපෙන වැඩපිළිවෙලත් සොයා බලන්ට ඕනෙ.
588. කල්‍යාණ මිත්‍ර ආශ්‍රයත්, උසස් ශීලයක හික්මෙන එකත්, ඒ වගේම ධර්මය පවසන ගුරු උතුමන්ගේ වචනය ඇසීමේ කැමැත්තත් ශ්‍රමණ ජීවිතයට හොඳින් ගැලපෙනවා.
589. බුදු සමිඳුන් කෙරෙහි ගෞරවයක්, සද්ධර්මය කෙරෙහි ලෙන්ගතුකමක්, මාර්ගඵල ලාභී සඟරුවන කෙරෙහි උපස්ථානයත්, ශ්‍රමණ ජීවිතයට හොඳින් ගැලපෙනවා.
590. යහපත් ඇවතුම් පැවතුම්වලින් යුක්ත වීමත්, කාගෙන්වත් ගැරහුම් නොලබන පිරිසිදු ජීවිතයත්, භාවනාව තුළ සිත පිහිටුවා ගැනීමත්, ශ්‍රමණ ජීවිතයට හොඳින් ගැලපේ.
591. සිරිත් විරිත් දැනගෙන සිටීමත්, පැහැදීම ඇතිවන ඉරියව් පැවැත්වීමත්, සමථ විදර්ශනා භාවනාවේ යෙදීමත්, ශ්‍රමණ ජීවිතයට හොඳින් ගැලපේ.
592. මුනිවරුන් වාසය කරන අරණ්‍ය, දුර ඈත වන සෙනසුන්, ජනශූන්‍ය වනාන්තර ශ්‍රමණ ජීවිතයට හොඳින් ගැලපේ.
593. සිල්වත් වීම, සද්ධර්මය බොහෝ කොට දැනසිටීම, ජීවිතයේ යථාර්ථය නුවණින් විමසීම, චතුරාර්ය සත්‍යය අවබෝධ කිරීම ශ්‍රමණ ජීවිතයට හොඳින් ගැලපේ.
594. අනිච්ච සංඥාව, අනත්ත සංඥාව, අශුභ සංඥාව භාවනා වශයෙන් ප්‍රගුණ කරගෙන හැම ලෝකයක් ගැනම නොඇල්ම ඇති කරගැනීම ශ්‍රමණ ජීවිතයට හොඳින් ගැලපේ.
595. බොජ්ඣංග ධර්ම වැඩීම, ඉද්ධිපාද වැඩීම, පංච ඉන්ද්‍රිය, පංච බල, ආර්ය අෂ්ටාංගික මාර්ගය වැඩීම, ශ්‍රමණ ජීවිතයට හොඳින් ගැලපේ.
596. මුනිවරයා තෘෂ්ණාව අත්හැර දමයි. ආශ්‍රව මුලින්ම උදුරා දමයි. හැම දෙයකින්ම නිදහස් වී වාසය කරයි. මෙය ශ්‍රමණ ජීවිතයට හොඳින් ගැලපේ.
මෙය වනාහී ආයුෂ්මත් අපරගෝතම නම් රහත් මුනිඳුන් වදාළ ගාථාවන්ය.
දසවෙනි නිපාතය නිමා විය.
(ගාථා දහය බැගින් වදාළ කොටස නිමා විය)
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn5_10-1-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M