815. මොකද මේ පිස්සු හැදිල වගේ? බිරාන්ත වෙච්ච සතෙක් වගේ දුවන්නෙ ඇයි? නිසැකයෙන්ම පව් කෙරිල තියෙනවා. ඔබ මහ හඬින් කෑ ගහන්නෙ මොකද?
816. අනේ ස්වාමීනි, මං පෙරේතයෙක්. දුකට පත්වෙලයි ඉන්නෙ. පෙරේත ලෝකෙ ඉපදිලයි ඉන්නෙ.
817. හැම පැත්තෙන්ම යකඩ කුළු ගෙඩි හැට දාහක් ඇවිදින් මගේ ඔළුවට වදිනවා. එතකොට ඒ යකඩ කුළු ගෙඩි මගේ හිස් මුදුන චප්ප කරනවා.
818. ඔබ විසින් කයෙන් වචනයෙන් මනසින් මොන වගේ පවක්ද කර ගත්තෙ? මොන වගේ කර්මයක විපාකයක් නිසාද මේ වගේ දුකකට පත් වුනේ?
819. හැම පැත්තෙන්ම යකඩ කුළු ගෙඩි හැට දාහක් ඇවිදින් ඔබේ ඔළුවට වදිනවා. එතකොට ඒ යකඩ කුළු ගෙඩි ඔබේ හිස් මුදුන චප්ප කරනවා.
820. වඩන ලද ශ්‍රද්ධාදී ඉඳුරන් තියෙන සුනෙත්ත පසේ බුදුරජාණන් වහන්සේව මං දැක්කා. උන්වහන්සේ කිසි බියකින් තොරව රුක් සෙවණේ භාවනා කරමින් හිටියේ.
821. මං අත මිටි මොළොවල උන්වහන්සේගේ හිස මතට පහර දීල හිස පැළුවා. ඒ කර්ම විපාකයෙන් තමයි මේ දුක මං විඳින්නෙ.
822. හැම පැත්තෙන්ම යකඩ කුළු ගෙඩි හැට දාහක් ඇවිදින් මගේ ඔළුවට වදිනවා. එතකොට ඒ යකඩ කුළු ගෙඩි මගේ හිස් මුදුන චප්ප කරනවා.
823. හැම පැත්තෙන්ම යකඩ කුළු ගෙඩි හැට දාහක් ඇවිදින් ඔබේ ඔළුවට වදිනවා නම්, එතකොට ඒ යකඩ කුළු ගෙඩි ඔබේ හිස් මුදුන චප්ප කරනවා නම්, නින්දිත පුරුෂය මේක ඔබට සිද්ධ වෙන්නෙ තමන්ගෙ ක්‍රියාවට අනුරූපවයි.
සාදු! සාදු!! සාදු!!!
දහසය වෙනි සට්ඨිකූට ප්‍රේත වස්තුවයි.
හතරවෙනි මහා වර්ගය නිමා විය.
එහි පිළිවෙල උද්දානයයි –
අම්බසක්ඛර ප්‍රේත වස්තුව, සේරිස්සක ප්‍රේත වස්තුව, පිංගල ප්‍රේත වස්තුව, රේවතී ප්‍රේත වස්තුව, උච්ඡුඛාදක ප්‍රේත වස්තුව, කුමාර ප්‍රේත වස්තු දෙක, ගූථඛාදක ප්‍රේත වස්තු දෙක, ගණ ප්‍රේත වස්තුව, පාටලී ප්‍රේත වස්තුව, පොක්ඛරණී ප්‍රේත වස්තුව, අම්බරුක්ඛ ප්‍රේත වස්තුව, භෝග සංහාර ප්‍රේත වස්තුව, සෙට්ඨිපුත්ත ප්‍රේත වස්තුව, සට්ඨිකූට ප්‍රේත වස්තුව කියල ප්‍රේත වස්තු දහසයක් ගැන කියවෙනවා.
ඛුද්දක නිකායට අයත් ප්‍රේත වස්තු පාළි නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn4_4-16/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M