14. (මළගිය ඥාතීන් පෙරේත ලෝකයේ ඉපදුනාට පස්සේ) තමන් කලින් හිටපු ගෙවල්වලට ආයෙමත් එනවා. ඇවිදින් බිත්තියෙන් එහා පැත්තෙත්, දොර මුල්ලෙත්, බිත්තිය මුල්ලෙත්, හතර මංසංධිවලත් ඉන්නවා.
15. ගෙවල්වල උදවිය හොඳට කෑම බීම හදාගෙන, කාල බීල ඉන්නකොට, අර මැරිච්ච උදවියගේ අකුසල කර්ම නිසා, කාටවත් ඔවුන්ව මතක් වෙන්නේ නැහැ.
16. නමුත් ඔවුන් ගැන අනුකම්පා කරන ඥාතිවරු සුදුසු කාලෙට කැපසරුප් විදිහට, ප්‍රණීත විදිහට දානෙ හදලා ඒ ඥාතීන්ගේ නාමයෙන් (ගුණවතුන්ට) පූජා කරනවා. අපගේ පරලොව ගිය ඥාතීන්ට මේ පින අයිති වෙත්වා! ඒ නෑදෑයෝ සුවපත් වෙත්වා! කියලා පින් දෙනකොට, එතැනට ඒ මිය පරලොව ගිය ඥාති ප්‍රේතයෝ රැස් වෙනවා.
17. ඒ මලගිය ඤාතීන් ඒ ඒ තැන්වලට ඇවිදින් රැස්වෙලා ඉන්නවා. බොහෝ දන් පැන්වලින් දානමය පින්කම් සිදුකරන කොට ඉතා හොඳින් අනුමෝදන් වෙනවා.
18. ‘අනේ! අපේ මේ නෑදෑයෝ බොහෝ කලක් ජීවත් වෙත්වා’ ඔවුන් නිසා අපට මේ පුණ්‍ය සම්පත් ලැබුනා නෙව. අපටත් පූජාවන් ලැබුනා නෙව, කියල ඒ ඥාතී ප්‍රේතයෝ සෙත් පතනවා. දන් දුන්න උදවියටත් නිෂ්ඵල වන්නේ නෑ.
19. ඒ ප්‍රේත ලෝකයේ කුඹුරු වැඩ නෑ. ගව පාලනයක් නෑ. වෙළහෙළඳාමකුත් නෑ, රන් රිදී, මිළ මුදල් ගනුදෙනුවක් නෑ. කළුරිය කරලා, ප්‍රේත ලෝකෙ උපන්නට පස්සෙ මේ මිනිස් ලෝකෙන් දෙන පිනකින් තමයි ඒ උදවිය ජීවත් වෙන්නෙ.
20. ඒක උස් බිමකට වැටුන ජලය පහත් බිමකට ගලාගෙන යනවා වාගේ දෙයක්. ඒ විදිහටම තමයි මේ මිනිස් ලොව ඥාතීන් විසින් දෙන පින්වලින් ප්‍රේතයින්ට සැප ලැබෙන්නෙ.
21. ඒ වගේම මහා ගංගා, කුඩා ඇළ දොළවලින් රැස් වෙන දියෙන් මහ සයුරු පිරෙනවා වගේ, මිනිස් ලොව ඥාතීන් විසින් දෙන පින්වලින් තමයි ප්‍රේතයින්ට සැප ලැබෙන්නෙ.
22. ඒ ඥාතීන් ජීවත් වෙලා ඉන්න කාලෙ ‘මට මේ මේ දේවල් තියෙනව. මට මේ මේ උපකාර කරලා තියෙනවා. මේ අය මගේ ඥාති මිත්‍රයෝ, මේ අය මාගේ යාළුවෝ’ කියලා ඔවුන්ට ඉස්සර කරපු කියපු උපකාර සිහි කර ගෙන පින් දෙන්ට ඕන.
23. අඬලා වැඩක් නෑ. ශෝක වෙලා වැඩක් නෑ. වෙන වැළපීමක් කරලා වැඩක් නෑ. ප්‍රේත ලෝකයේ උපදින අයට ඒකෙන් කිසි ප්‍රයෝජනයක් නෑ. ඒ ඥාති ප්‍රේතයෝ ඒ විදිහටම එහෙ ඉන්නවා.
24. (බිමිබිසාර රජතුමනි, ඔබ අද තමන්ගේ මියගිය ඥාතීන් උදෙසා) මේ දානය පූජා කරගත්තා. ආර්ය සංඝයා කෙරෙහි පිදූ දානය යහපත් ලෙස පිනේ පිහිටියා. බොහෝ කලක් ඒ උදවියට මේ පින හිත සුව පිණිස හේතු වෙනවා. මේ මොහොතේම ඒ ඇත්තන්ට මේ පින් ලැබෙනවා.
25. මේක හොඳ ඥාතිධර්මයක්. හොඳ ආදර්ශයක්. මිය ගිය උදවියට උසස් පූජාවක් කළා වෙනවා. භික්ෂු සංඝයාට ශක්තියක් ලබා දුන්නා වෙනවා. (රජතුමනි) ඔබ විසින් බොහෝ කලක් යහපත පිණිස හේතු වන මහත් පිනක් රැස් කර ගත්තා.
සාදු! සාදු!! සාදු!!!
පස්වෙනි තිරෝකුඩ්ඩ ප්‍රේත වස්තුවයි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn4_1-5/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M