(තෝදෙය්‍ය)
යම්කිසි කෙනෙකුගෙ සිත තුළ – නැතිද කාම සිතිවිල්ලක්
යමෙකුගෙ හදවත ඇතුලත – නැතිද කිසිම තණ්හාවක්
යමෙක් කළේ නම් තරණය – සැකය ඇතුළු හැම දෙයක්ම
ඔහු ලබනා විමුක්ති සුව – කොයි ආකාරේ දෙයක්ද?
(භාග්‍යවතුන් වහන්සේ)
යම්කිසි කෙනෙකුගෙ සිත තුළ – නැතිද කාම සිතිවිල්ලක්
යමෙකුගෙ හදවත ඇතුලත – නැතිද කිසිම තණ්හාවක්
යමෙක් කළේ නම් තරණය – සැකය ඇතුළු හැම දෙයක්ම
ඔහු හට වෙන විමුක්තියක් – ඇවැසි නැතැයි පවසමි මම
(තෝදෙය්‍ය)
ඒ අයුරින් යුතු උතුමා,
ආශා රහිතව සිටීද? – ආශා සහිතව සිටීද?
ප්‍රඥාවෙන් යුතු කෙනෙක්ද? – නුවණ සකසමින් සිටීද?
ශාක්‍යමුනිවරයාණෙනි, හඳුනාගත හැකි ලෙස ඔහු
හැම දෙය දකිනා මුනිඳුනි – පවසනු මැන මට එකරුණ
(භාග්‍යවතුන් වහන්සේ)
පින්වත් තෝදෙය්‍ය,
ආශා රහිතය ඒ මුනි – ආශාවන් සහිත නොවේ
යුතුමය හේ ප්‍රඥාවෙන් – සකසන්නෙක් නොවේ නුවණ
ඒ මුනි උතුමාණන් ගැන – හඳුන ගන්න ඔය අයුරින්
කාමයෙ හෝ භවයේ හෝ – ඔහුට නොමැත කිසි කෙලෙසුන්
තෝදෙය්‍ය නිසා වදාළ දෙසුම මෙහි නව වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M