(නන්ද)
ලොවේ නොයෙක් දෙනා කියති – මුනිවරු වැඩ සිටිති කියා
කොහොමද ඔය මුනිවරු ගැන – ඒ උදවිය පවසන්නේ?
ඤාණය ලැබ ගත්ත අයද – “මුනිවරු” ලෙස සළකන්නේ
තාපස දිවි ඇති අයටද – “මුනිවරු” යැයි පවසන්නේ
(භාග්‍යවතුන් වහන්සේ)
නන්දය, ඔය දේ පිළිබඳ – කරුණු දන්න උදවිය නම්
යමක් ඇසින් දුටු පමණින් – කණින් අසා ගත් පමණින්
ඤාණය ඇති වුණ පමණින් – නොකියති “මුනිවරු” විලසින්
හැම කෙලෙසුන් වැනසීමෙන් – සියළුම දුක් දුරුවීමෙන්
ආශා සිතිවිලි රහිතව – ලොවේ යමෙක් හැසිරේ නම්
මම ඔහු ගැන පවසාලමි – “මුනිවරයා” කියන නමින්
(නන්ද)
භගවත් බුදු සමිඳාණනි – ඇතැම් සමණ බමුණන් මෙහි
දැකීමෙන්ද ඇසීමෙන්ද – පවසති පිරිසිදු වන බව
රකිනා ව්‍රත සීලයෙන්ද – පවසති පිරිසිදු වේ යයි
මේ අයුරින් නොයෙක් ලෙසින් – පවසති පිරිසිදු වේ යයි
භගවත් මුනිඳාණනි, කිම – එලෙසින් පවසන හැමදෙන
හැසිරෙත්මය පිරිසිදු ලෙස – ඒ අය පවසන විලසට
නිදුකාණෙනි ඒ හැම දෙන – ඉපදෙන දිරනා මේ ලොව
තරණය කර දැමූ අයද?
භාග්‍යවත් මුනිඳාණනි, විමසන මා හට එකරුණ
පහදා පවසාලනු මැන
(භාග්‍යවතුන් වහන්සේ)
පින්වත් නන්දයෙනි මෙලොව – සිටින ඇතැම් සමණ බමුණු
පවසත්මය පිරිසිදු බව – දැකීමෙන්ද ඇසීමෙන්ද
පවසත්මය පිරිසිදු බව – රකිනා ව්‍රත සීලයෙන්ද
පවසත්මය පිරිසිදු බව – මේ අයුරින් නොයෙක් ලෙසින්
මොන අයුරින් ඒ උදවිය – සිටියත් ඒ ලෙස කියමින්
ඉපදෙන දිරනා ලොව නම් – තරණය නොකළෝය කියමි
(නන්ද)
භගවත් මුනිඳුනි මේ ලොව – සිටින ඇතැම් සමණ බමුණු
කියන නමුත් පිරිසිදු බව – දැකීමෙන්ද ඇසීමෙන්ද
කියන නමුත් පිරිසිදු බව – රකිනා ව්‍රත සීලයෙන්ද
කියන නමුත් පිරිසිදු බව – මේ අයුරින් නොයෙන් ලෙසින්
මුනිඳාණනි ඒ හැම දෙන – මේ සැඩ තණ්හා දිය කඳ
තරණය නොම කෙරුවේ නම්
කවුරුද එහෙනම් මුනිඳුනි- මේ දෙවි මිනිසුන්ගෙ ලොවේ
ඉපදෙන දිරනා ලෝකය – තරණය කොට එතෙර ගියේ
භගවත් මුනිඳාණනි මම – විමසා සිටිනෙමි එකරුණ
පහදා දෙනු මැන මා හට
(භාග්‍යවතුන් වහන්සේ)
පින්වත් නන්දයෙනි මෙමා – නොකියමි හැම සමණ බමුණු
සිටිති කියා එහි රැඳෙමින් – ඉපදෙන දිරනා ලොව තුළ
නැණැති යම් කෙනෙක් මෙලොවේ – දැකීමෙන්ද ඇසීමෙන්ද
රකිනා ව්‍රත සීලයෙන්ද – පිරිසිදු වේ යන අදහස
හැම ලෙසින්ම බැහැරට කොට – සිතේ තිබෙන තණ්හා ගැන
නුවණින් අවබෝධ කෙරුව – කෙලෙස් රහිත බවද ලැබුව
ඒ නුවණින් යුතු සමණා – සංසාරේ සැඩ දිය කඳ
තරණය කොට එතෙරට ගිය – බව පවසාලන්නෙමි මම
(නන්ද)
මහ ඉසිවර මුනිඳාණනි – ඔබ පැවසූ සියළු වචන
මම පිළිගන්නෙමි සතුටින්
ගෞතම බුදුසමිඳාණනි,
පහදා දුන් සේක හොඳින් – නිකෙලෙස් වූ අමානිවන
යම් කිසි කෙනෙකුන් මෙලොවේ-ඇසින් දුටුව පමණින් හෝ
කණින් ඇසුව පමණින් හෝ – රකිනා ව්‍රත සීලෙන් හෝ
පිරිසිදු වන බව පවසන – සියළුම මත බැහැරට කොට
ඒ අයුරින් නොයෙක් ලෙසින් – ඇති හැම මත බැහැරට කොට
සිතේ තිබෙන තණ්හා ගැන – නුවණින් අවබෝධ කෙරුව
කෙලෙස් රහිත බවද ලැබුව – ඒ පින්වත් උදවිය නම්
සංසාරේ සැඩ දිය කඳ – තරණය කොට එතෙරට ගිය
බවද මමත් පවසාලමි
නන්ද නිසා වදාළ දෙසුම මෙහි සත් වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M