(පෝසාල)
ආශාවන් කිසිත් නොමැති – කිසි තැන සැක කුකුසක් නැති
සම්බුදු වූ යම් උතුමෙක් – අතීතෙ ගැන කියා දෙත්ද
හැම දහමේ පරතෙර වැඩි – ඒ බුදු සමිඳාණන් වෙත
ආවෙමි මම පැන අසන්ට
ශාක්‍ය මුනිවරයාණනි,
රූපය ගැන ඇති හැඳුනුම් – හැම ලෙසින්ම ඉක්මවමින්
හැම කයක්ම බැහැරට කොට – තමා තුළ ද බාහිරව ද
“කිසිවක් නැති බව” ම දකින – ඔහුගෙ නුවණ ගැන විමසමි
කොහොමද ඒ උදවිය ලොව – අම නිවනට පැමිණෙන්නේ?
(භාග්‍යවතුන් වහන්සේ)
පින්වත් වූ පෝසාලය,
විඤ්ඤාණය පිහිටන තැන් – සියල්ල ගැන මැනවින් දත්
ලොවේ තථාගතවරු නම් – මේ ගැන හැම ලෙස දනිත්ය
අරූපි සමවතේ සිටින – කෙනා එයම විදසුන් කොට
එයම නිවන් මග කරගෙන – පත්වන්නේ විමුක්තියට
අරූපි සමවතට තිබෙන – තණ්හාවේ හැටි දැනගෙන
ඒ ගැන පවතින ඇල්මම – බන්ධනයක් යයි දැකගෙන
දියුණු කරපු නුවණින් හේ – වඩන්නේය එහි විදසුන්
නිවනට යන මග ම වැඩුව – ඒ අරහත් බමුණිඳු හට
ලැබෙනා මේ ඤාණය නම් – වෙනස් නොවෙන බව පවසමි
පෝසාල නිසා වදාළ දෙසුම මෙහි දාහතර වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-14/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M