(ජතුකණ්ණි)
මහාවීර මුනිඳාණනි – කාම රහිත බවට කැමති
සැඩ දිය සිඳ එතෙරට වැඩි – උතුමෙකු ලෙස මම ඔබ ගැන
අසා පැමිණියෙමි මෙහි අද – කාමරහිත මුනිඳුන් වෙත
උපතින් ලද නුවණැස් ඇති – පින්වත් භගවත් මුනිඳුනි
පහදා දෙනු මැනවි මටද – ඒ ශාන්තපදය නිවන
සැබෑ ලෙසම එකරුණ ගැන – පහදා දෙනු මැන මා හට
භගවත් සමිඳාණෝ නම් – සිටිති සියළු කාමය මැඩ
තෙද බලයෙන් පොළොව මඩින – බබලන හිරු මඩල විලස
මහ පැණවත් මුනිඳාණනි – එතරම් නුවණක් නැති මට
මෙහිදිම නැති කර දමන්ට – ඉපදෙන මැරෙනා මේ දුක
දැන ගත හැකි පරිද්දෙන්ම – දෙසන සේක්වා සදහම්!
(භාග්‍යවතුන් වහන්සේ)
පින්වත් ජතුකණ්ණි ඔබත් – කාම ඇල්ම දුරු කරන්න
කාමෙන් නික්මුණ සැපයම – කෙම් බිම විලසින් දකින්න
අරගැනීම, අත හැරීම – යන මේ කිසි දෙයක් ඔබට
කිසිවිට ඇති නොම වේවා!
අතීතෙ යම් දෙයක් වීද – ඒ හැම වියළා දමන්න
අනාගතේ තුළ ඇතිවන – කෙලෙසුන් හට නොගනීවා
වර්තමානයේ කිසිවක් – අල්ලා ගන්නේ නැතිනම්
සැබැවින් උපශාන්ත ලෙස – සැරිසරන්ට හැකිය ඔබට
ජතුකණ්ණි බමුණානනි,
නාම රූපයෙහි පවතින – හැම තණ්හාවම දුරු කළ
ඒ අරහත් බමුණිඳු හට – මාර වසඟයට ගෙන යන
සියළු කෙලෙස් නොමැත්තේය
ජතුකණ්ණි නිසා වදාළ දෙසුම මෙහි එකොළොස් වැන්න වේ.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_5-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M