(තිස්ස – මෙත්තෙය්‍ය)
යෙදෙනා විට මෛථුනයෙහි – ලැබෙනා දුක් කරදර ගැන
දැන ගන්නට රිසි වෙමු අපි – කියාදෙන්න නිදුකාණනි
අසමින් ඔබ ගේ එ වදන් – දැනගෙන මුනිඳුන්ගෙ සසුන්
හික්මෙන්නෙමු අපි සැමදෙන – විවේකයෙහි ඇලෙන සිතින්
(භාග්‍යවතුන් වහන්සේ)
යෙදෙනා විට මෛථුනයේ – නොලැබී යනු ඇත ඔහු හට
සම්මා සම්බුදු සසුනක – ලැබෙන උතුම් වූ මගඵල
වරදට බැස ගත්ත කෙනා – ඔහු වේ මේ ලොව සිටිනා
ඔහු තුළ පවතින ඒ දොස – ළාමක අකුසලයක්මයි
යමෙක් කළින් පැවිදිව සිට – පසු කල එහි යෙදෙනා විට
යන මගතොට වැරදී ගිය – වාහනයක් බඳු වේ හේ
සිවුරු හැරපු ඒ පුහුදුන් – අය මෛථුනයෙහි යෙදෙනා
ළාමක වූ ජීවිතයට – වැටුනා යයි කියති ලොවේ
සිවුරෙ රැඳී සිටි කාලේ – ඔහු ජීවත් වුණ තාලේ
පැතිරුන කිත් යස රාවේ – සැණෙකින් සුළගේ පාවේ
දැක මේ අනතුර තිබෙනා – මෛථුනයෙන් ඇති කරනා
එයින් සදහටම මිදෙන්නට – ගනිව් සිතට හික්මෙන්නට
කාම හැඟුම් වලින් පිරුණ – සිතිවිල්ලට යටවුණ විට
ඔහු යළි යළි එය සිතමින් – ගෙවයි දිළින්දෙක් විලසින්
ඔහු ගත කරනා දිවියට – නින්දා බස් ලැබෙනා විට
කරබාගෙන සිටී එවිට – කිසිවක් කරගත නොහැකිව
නින්දා බස් ලැබෙනා විට – එයින් මිදෙන්නට සිතමින්
ගොතා නොයෙක් ලෙස බොරු බස් -අවියක් විලසින් දුසිරිත්
දොඩමින් හේ දෙයි පිළිතුරු – වධයක් ම ය එයත් ඔහුට
හුදෙකලාවේ දැඩි සිතකින් – සිල්වත් වී වසනා කල
පැතිර ගියේ ඔහුගේ ගුණ – නැණවත් උතුමෙක් යයි ලොව
එහෙත් සිවුරු හැර පසු කල – මෛථුනයේ යෙදෙනා විට
කෙලෙසී යයි ඔහු හැම ලෙස – ලොවේ මෝඩයෙක් විලසට
පෙර ගත කළ පැවිදි සැපත – පසුව ලැබෙන ගිහි දුක දැක
හොඳින් හැඳින මේ කරදර – මුනිවරු දිවි ගෙවත් තනිව
දැඩි හිතකින් හුදෙකලාව – දැනගෙන සදහම් කලාව
මෛථුනයේ නොම යෙදෙමින් – සුරකිති උත්තම බඹසර
අරහත් මුනිවරු තුළ ඇති – උතුම් විවේකය ලබන්ට
තම සිත එහි පිහිටුවමින් – හික්මෙන හැටි සිතට ගන්ට
එනිසා ලොකුවට ඉහළින් – නොසිතා ඒ ගැන කිසිවිට
සදහම් තුළ හැසිරෙන අය – අමා නිවන් සුව අසළය
හැම දොස් බැහැරට කරමින් – සසුන් පිළිවෙතේ යෙදෙමින්
කාමයන්ද නොම සිතමින් – ගෙවයි එයා සිත සතුටින්
කෙලෙස් වතුර තරණය කළ – අරහත් මුනි උතුමන් ගැන
කාමෙන් මුසපත් වී ගිය – ලෝ වැස්සන් හරි කැමතිය
තිස්සමෙත්තෙය්‍ය නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-7/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M