(ආයුෂ්මත් සැරියුත් තෙරණුවෝ)
මීට කළින් මා දැක නැත – කිසිවෙකුගෙන් අසා නොමැත
තුසිත පුරෙන් මිනිස් ලොවට – වැඩි උත්තම සමිඳුන් ගැන
මෙබඳු මිහිරි බස් තෙපළන – තිලොවග ගුරු සමිඳුන් ගැන
මේ දෙවියන් සහිත ලොවේ – සදහම් ඇස ලබාගත්ත
මුනිඳුන් ලෙස හඳුනයි හේ
සියළු අවිදු අඳුර නසා – හුදෙකළාව වැඩ වෙසෙමින්
සපැමිණියේ නිවන් සැපට
මිදුනා හේ තණ්හාවෙන් – නොසැලේ අටලෝ දහමින්
කුහක කමින් තොර වූ හේ – පැමිණි සේක පිරිස් මැදට
ඒ බුදු සමිඳාණන් වෙත – ආවෙම් මම සිත සතුටින්
බොහො දෙනාට සෙත සලසන – ප්‍රශ්න අසා විසඳගන්ට
ප්‍රශ්න;
රුක් සෙවනෙක හෝ සොහොනක -කඳු ගැටයක ගල් කුටියක
වෙන් වී හැම කාමයෙන්ම – වසමින් හුදෙකලාවේම
සංසාරය පිළිකුල් කළ – සසුනට වන් සමණා හට
කුඩා මහත් සෙනසුන් වල – නිහඬව පවතින තැන්වල
භික්ෂුව නොසැලේ නම් එහි – බිය ඇතිවන අරමුණු දැක
තැති ගැනීම ඇති කරවන – අරමුණු කොතරම් තිබේද?
ඈත සෙනසුනේ වසනා – නොගිය නිවනටම වඩිනා
සමණ වීරියෙන් මඩිනා – කොතෙක්ද උවදුරු තිබෙනා?
තබා දිවිය පරදුවටම – වෙර වඩනා සමණිඳු හට
කුමක් ලැබේවිද අසන්ට – කුමන සීලයක් රකින්ට?
කවර තැනක සැරිසරන්ට – ලැබේද ඒ සමණා හට?
කවර සීලයක් රකිමින් – සමාධිගත සිතින් යුතුව
නුවණ හසුරුවා මැනවින් – කෙලෙසින් හැසිරෙන කෙනාද
රන්කරුවෙක් රිදියෙහි මල – පිරිසිදු කර හරින ලෙසින්
සිතේ තිබෙන කෙලෙස් කහට – බැහැරට දුරු කරලන්නේ?
(භාග්‍යවතුන් වහන්සේ සැරියුත් තෙරුන්ගේ ප්‍රශ්නයන්ට මේ පිළිතුරු ගාථා රත්නයන් වදාළ සේක)
සංසාරය පිළිකුල් කළ – සියළු කාමයෙන් වෙන්වුන
වසමින් හුදෙකලාවේම – නිවන් ලබාගනු කැමතිව
බුදුසසුනේ සමණා හට – පහසු ජීවිතේ සලසන
එයටම ගැළපෙන සදහම් – දැනගත් කෙනෙකුන් වශයෙන්
පවසන්නෙමි මා ඔබ හට – මැනවින් එය ඉගෙන ගන්න
නැණැති සමණ බිය නොවනා -කරුණු පහකි බිය හැදෙනා
සිහියෙන් හේ වසනා විට – සදහම් සීමා ඇතුළත
ලේ උරනා මැසි මදුරුද – ඝෝර විසැති උරගයින්ද
මිනිසුන්ගෙන් එන පහසද – පා සතරෙක් යුතු සතුන්ද
බිය හදනා මේවා හට – කිසිම බියක් නැත සමණා.
වෙන ආගම්වල අය හට – හේ නොම බිය වන්නේ වේ
දකින නමුත් ඔවුන් හදන – අරමුණු බිය ඇති කරවන
තවත් එවැනි බොහො උවදුරු – කොතෙකුත් ලැබුණත් ඔහු හට
මඩිමින් ඒ හැම අරමුණු – විමසාලයි කුසල් දහම්
රෝග දුකක් වැළඳුන විට – පෙළෙනා විට කුසගින්නේ
දැඩි සීතල ලැබෙනා විට – රත්වෙන විට ගිනි අව්වේ
ඉවසයි හේ සිහි නුවණින් – එවැනි කටුක වූ දේවල්
ජීවිතයට ඒ අයුරින් – ලැබෙනා විට ඒ දේවල්
වඩයි වීරියම මැනවින් – නිවනට යන සමණ තෙමේ
සොරකම් කිසිවක් නොකරයි -බොරුවක් කිසිවිට නොකියයි
සැලෙනා නොසැලෙන සත හට-මෙත් සිත මැනවින් පතුරයි
යම් හෙයකින් තම සිත තුළ – කැළඹී ගිය බව දුටු විට
එය අකුසලයක් බව දැන – සැනෙකින් බැහැරට කරලයි
ක්‍රෝධයකින් හෝ මානෙන් – වසඟයකට නොයන්නේය
කෙලෙසුන්ගේ මුල හඳුනා – එය උදුරා දමන්නේය
කැමති දෙයක් හෝ අකැමති – කවර දෙයක් ලද විට හේ
සැබැවින් නුවණැති සමණා – අකුසලයන් මඩින්නේය
ප්‍රඥාවම පෙරට රැගෙන – දැහැමින් වසමින් සතුටින්
ඒ හැම උවදුරු මඩිමින් – දහම තුළම සිටින්නේය
ඈත සෙනසුනේ වසන්ට – අකැමති බව දුරු කරමින්
වැළපෙන මේ දහම් සතර – බැහැරට කර දමන්නේය
කුමක්ද වළඳන්නේ මම්? – කොහේද වළඳන්නේ මම්?
ඊයේ සැතපුනේ දුකින් – අද කොහේද සැතපෙන්නේ?
වැළපීමක් ඇති කරවන – මෙවැනි බොළඳ කල්පනාව
නිවසක් නොමැතිව හැසිරෙන – සදහම් මග තුළ හික්මෙන
නැණවත් වූ සමණ තෙමේ – බැහැරට කර දමන්නේය
වසනා කැප කාලය තුළ – ලැබෙනා ආහාර පාන
නුවණින් පිළි අරගන්නා – පමණ දනී ඒ සමණා
ඉඳුරන් රැකගෙන මැනවින් – ගම තුල හැසිරෙන විටදී
ඇසුනොත් කෙනෙකුගෙ රළු බස් – නොකියයි හේ නපුරු බසක්
බිම යොමු වූ ඇස් ඇති හේ – ඇවිදින ආශා නැත්තෙකි
දැහැන් වඩයි නිරතුරුවම – රෑ කල බොහො නිදිද වරයි
එකඟ සිතින් යුතු වූ හේ – මැදහත් බව ඇති කරගෙන
අකුසල තර්කද කුකුස්ද – උදුරන්නේමය මුලින්ම
වරදක් පෙන්වා දුන් විට – සිහියෙන් සතුටින් පිළිගෙන
ක්‍රෝධ සිතක් ඇති නොකරයි – ළග වසනා උතුමන් ගැන
කතා බහක් කරන විටද – කාලය හසුරුවයි හොඳින්
රටේ තිබෙන මනස්ගාත – ගැන සිතිවිලි නූපදවයි
හැම කෙලෙසුන් හට ගන්නා – තැන් පහ ලෝකේ තිබෙනා
එහි ඇල්මද දුරු කරමින් – සිහියෙන් හික්මී සිටිමින්
රූප, ශබ්ද, හා සුවඳත් – එලෙසින් රස පහස ගැනත්
මේවා ගැන ඇති රාගය – මැඩලන්නේමය මැනවින්
මේ ගැන සිත තුළ තිබෙනා – කැමැත්ත බැහැරට කරනා
නුවණින් යුතු ඒ සමණා – නිදහස් වී යයි සැමදා
කාලය හඳුනාගෙන හේ – මැනවින් විමසයි සදහම්
සමාධි ගත සිතින් යුතුව – වනසයි මේ අවිදු අඳුර
සාරිපුත්ත තෙරුන් නිසා වදාළ දෙසුම නිමා විය.
සාදු! සාදු!! සාදු!!!
(ගාථා අට බැගින් වදාළ දෙසුම් ඇතුළත් අට්ඨක වර්ගය යි.)
(මේ දෙසුමේ අන්තර්ගත දෙසුම්)
මෙම කොටසේ අන්තර්ගත දෙසුම්
1. කාමයන් ගැන වදාළ දෙසුම
2. ජීවිත ගුහාව ගැන ගාථා අටක දෙසුම
3. දුෂ්ටකම ගැන ගාථා අටක දෙසුම
4. පිරිසිදු කම ගැන ගාථා අටක දෙසුම
5. උතුම්කම ගැන ගාථා අටක දෙසුම
6. ජරාවට පත්වීම ගැන දෙසුම
7. තිස්සමෙත්තෙය්‍ය
8. පසූර
9. මාගන්දිය
10. “බිඳී යන්නට පෙර” ගැන දෙසුම
11. කලහවිවාද
12. මතවාද ලිහා දැමීම ගැන කුඩා දෙසුම
13. මතවාද ලිහා දැමීම ගැන ලොකු දෙසුම
14. වහා ප්‍රතිඵල ලැබීම ගැන දෙසුම
15. ජීවිත හිංසාව
16. සැරියුත් තෙරුන්ට වදාළ දෙසුම
අට බැගින් යුතු කොටස තුළ මේ සියළු දෙසුමන් තිබේ.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_4-16/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M