ඒ උත්තම පැවිද්ද ගැන – පවසමි හඬ නඟා ලොවට
සදහම් ඇස් ඇති මුනිඳුන් – පැවිදි වුණේ කෙළෙසින් දැයි
නුවණින් විමසමින් හෙතෙම – රුචි වුන හැටි පැවිදි බවට
බොහෝ කරදර පීඩා ඇත – මේ ගෙයි වාසය තුළ නම්
කෙළෙස් උනන උල්පතක්ය – “නිවස” කියා පවසන තැන
එහෙත් අනේ මේ පැවිද්ද – ආකාසය වැනි තැනක්ය
යනුවෙන් සැළකීමෙනි හේ – ලබාගත්තෙ මේ පැවිද්ද
උතුම් පැවිදි දිවිය ලබා – කයින් කෙරෙන පව් දුරුකොට
වැරදි වචන දුරු කරමින් – දිවිමග කරගති පිරිසිදු
කඳු අතරේ මගධ රටේ – ඇති රජගහ නුවර පැමිණි
මහා පුරිස් ලකුණින් යුතු – අපගේ බුදු සමිඳාණෝ
පිණ්ඩපාතෙ ලබාගන්ට – ගෙපිළිවළින් වැඩිය සේක
රජ මැදුරේ උඩුමහලේ – සිටි බිම්සර රජතුමන්ට
දැක ගන්නට ලැබුණා මේ – සුන්දර පෙනුමැති සමිඳුන්
සැණෙකින් ඒ නිරිඳු තෙමේ – පවසා සිටියේ මෙකරුණ
අන්න ! බලව් භවත්නි, අර – අභිරූපී පෙනුමෙන් යුතු
යහපත් ඉරියව්වෙන් යුතු – අර සුන්දර සමණා දෙස
පහළ හෙළා ගෙන දෙනයන – යන්නේ සංසුන් ගමනින්
හෙළා දෙනෙත් අඩවන් ලෙස – සිහිය පිහිටුවා සොඳ ලෙස
වඩිනා මොහු සොඳුරු විලස – අයත් නොමැත ළාමක වූ
හීන වූ පහත් කුලයට
රාජ දූතයෙනි, තොප දැන් – වහා ගමන් කොට එතැනට
ඔය සමිඳාණන් වඩින්නේ – කොතැනටදැ’යි සොයා බලව
පිටත් කෙරුව දූත පිරිස – ගියෝය සමණා පසුපස
කොහේද සමණිඳු වඩින්නේ? – කොතැනද මෙතුමා වසන්නේ?
තමන්ගේ ඉඳුරන් රැකගෙන – සංවර කම ඇති කරගෙන
පිහිටුවමින් සිහිය හොඳට – නුවණින් යුතුවම හැසිරෙන
ගෙපිළිවෙළින් පිණ්ඩපාතෙ – වඩින විටදි ඒ සමණා
පිරී ගියා ඉක්මණින්ම – එතුමන්ගේ පාත්‍රයත්
පිඬු සෙවීම අවසන් කොට – නගරෙන් පිට වැඩිය මුනිඳු
“මෙතැන වසන්නට හොඳ” යයි – වැඩියෙ පාණ්ඩව පව්වට
එතුමන් වැඩ සිටිනු දුටුව – දූත පිරිස පැමිණුණෝය
ඔවුන් අතර සිටිය කෙනෙක් – රජු වෙත ගොස් කීවේ මෙය
භවත් මහරජාණෙනි, දැන් – “පාණ්ඩව” පර්වත පෙදෙසේ
පෙර දිග බෑවුමට වෙන්ට – සිටින්නේය ඒ සමණිඳු
බලවත් තේජසින් යුතුව – ව්‍යාඝ්‍රයෙකු සේ ගුහාවේ
සවි ශක්තියකින්ද යුතුය – වෘෂභ රාජයෙකු විලසින්
හේ එඩිතරකමින් යුතුය – සිංහ රාජයෙක් විලසේ
දූතයාගේ වචන අසා – නිරිඳු සොඳුරු යානයකින්
ඉක්මණින්ම පිටත් වුණා – “පාණ්ඩව” පර්වතය ළඟට
යානයෙකින් යා ගත හැකි – දුර ගිය ඒ බිම්සර රජු
එයිනුත් බැස පා ගමනින් – ගියේය සමිඳාණන් වෙත
එහි ගිය බිම්සර නිරිඳුන් – සතුට පිරුණ සිතින් යුතුව
ගෙවා සොඳුරු පිළිසඳරින් – පවසා සිටියේ මෙකරුණ
යොවුන් තරුණයෙකි ඔබ නම් – තවමත් මුල් කාලෙ ගෙවන
හැඩ රුවින්ද උසමහතින් – පෙනේ උපත රජෙකුගෙ මෙන්
සේනා සහිතව සරසා – ඇත් පිරිවර පෙරට රැගෙන
ඔබට පුදමි හැම සම්පත් – අනුභව කළ මැන රිසිසේ
පවසාලනු මැන පින්වත – කොයි ජාතියෙදෝ උපන්නේ?
භවත් මහාරාජයාණෙනි,
හිමගිරි පව්වද පෙනෙනා – කොසොල් ජනපදේ තිබෙනා
වීරිය හා ධනයෙන් යුතු – සුන්දර ජනපදයක් වේ
අපි සූරියවංශේ වෙමු – “ශාක්‍ය” වෙමු ජාතියෙන්ද
පින්වත් රජතුමනි මෙමා – ඒ කුලයෙන් නික්ම අවුත්
පැවිදි බවට පත් කෙනෙක්මි – කිසිම කාමයක් නොපතන
කම් සැපයට ගිජුවන ලොව – දුක් විඳිනා හැටි දැකගෙන
එයින් නික්ම පැවිදි වුණෙමි – දකිමින් කෙම් බිමක් විලස
වෙර වඩනා සිතින් යුතුව – යන්නෙමි මම නිරිඳාණනි
මා පැවසූ මෙකරුණ ගැන – දැන් මා සිත රැඳී තිබේ
උතුම් පැවිද්ද ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_3-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M