මා විසින් අසා දැන ගන්නා ලද්දේ මෙසේය.
එකල භාග්‍යවතුන් වහන්සේ වැඩ සිටියේ සැවැත් නුවර ජේතවනාරාමයේ අනේපිඬු සිටුහු ගේ ආරාමයෙහි ය. එකල්හි පන්සියයක උපාසක පිරිසක් පිරිවරා ගත් ධම්මික උපාසක තෙමේ භාග්‍යවතුන් වහන්සේ වෙත එළඹියේ ය. එළඹ භාග්‍යවතුන් වහන්සේ ට සාදර භක්තියෙන් වැඳ එක් පසෙක හුන්නේ ය. එක් පසෙක හුන් ධම්මික උපාසක භාග්‍යවතුන් වහන්සේ ට ගාථාවෙන් සැලකෙළේ ය.
මහා නුවණැති අපේ – ගෞතම භගවතාණනි,
පින්වතාණන් ගෙන් මම – විමසා සිටිමි කරුණක්
කෙලෙසින් කටයුතු කරනා – ශ්‍රාවකයා යහපත් වෙද?
ගේ දොර අතහැරිය – බුදු සසුන වෙත සපැමිණි
පැවිදි බව ලද කෙනා ද?
උපාසක බව ලබා – ගෙදර සිටිනා කෙනා ද?
දෙවියන් සහිත ලොව – ඉපදෙන මැරෙන අයුරු ත්
ඒ දුකින් අත් මිදී – නිවන ලබනා අයුරු ත්
ඔබ වහන්සේ පමණි දන්නේ
සියුම් දෙය දකින නුවණැති – ඔබ වහන්සේට සම වූ
කිසිවෙක් නො මැති ම ය.
ඔබ වහන්සේ පමණි අපගේ – උතුම් බුදු සමිඳාණන්!
ඔබ වහන්සේ පමණි ලොව – හැම නුවණ හැම දහම දැනගෙන
මහා කරුණාවෙන් – ලෝ සතුන් හට කියා දුන්නේ
භව කඩතුරා සිඳ හළ – හැම දෙය ම දුටු නැණවතාණනි,
සියලු ලොව තුළ ඔබ – නිමල ලෙස බබලත් ම ය
කෙලෙසුන් පරදවා – තුන් ලොව ම ජය ගත් බව
අසා ගෙන ආවේ ය දෙව්ලොවින් – ඇත් රජා ඒරාවණ
හේ ඔබගෙන් අසා – දැනගෙන සියළු කරුණු ම
සාදු! සාදු! යි කියමින් – ගියේ ඉතිරුන සතුටින්
කුවේර, නමින් යුතු – මහ දෙව් රජු ද වෙසමුණි
සදහම් අසා ගන්නට – ඔබ වෙත ය පැමිණෙන්නේ
ඔහු අසන හැම පැනය ට – දෙත් ය පිළිතුරු ධීරයාණන්
ඒ බණ අසා ඔහු – පිනා යයි සිත සතුටින්
නිගණ්ඨයො තාපසවරු – වාද කරන තීර්ථකයන්
ඒ කිසිවෙකු ට නුවණින් – ඔබ වහන්සේ ව පසු කොට
යා ගත නො හැකි ම ය
වේගයෙන් යන කෙනෙකු ව – පසු කරන්න ට නො හැකි ය
එක තැන රැඳුන කෙනෙකුට
වාද කරමින් සිටින බමුණෝ – මහළු වයසට පැමිණි බමුණෝ
“වාදිභසිංහ” ලෙස – තම තමන් ගැන සිතා සිටිය ද
ඔබ වහන්සේ ගෙ දහම් අරුතට – ඒ සියලු දෙන බැඳී යත් ම ය
මෙය යි පිවිතුරු සදහම් – සියුම් වූ සැපවත් වූ
භගවතාණනි, ඔබ ම ය – මැනවින් දෙසන ලද්දේ,
මේ උතුම් සදහම්
අපි සියළු දෙන අසනු රිසිවෙමු – ඒ උතුම් සිරි සදහම්
විමසන දෙය අපට – වදහළ මැනව බුද්ධ ශ්‍රේෂ්ඨයාණනි
මේ සියළු සමණවරු – වැඩ සිටිති බණ අසනු කැමතිව
උපාසකවරු ද මෙහි – එලෙසින් ම වෙති බණ අසන්නට
නිමල බුදු සමිඳු දුටු – ඒ සදහම් අසත්වා!
සක් දෙවිඳුගෙන් සදහම් – අසන දෙව් කැළ විලසින්
(භාග්‍යවතුන් වහන්සේ)
සමණවරුනි පින්වත් – මැනවින් යොමව් දෙසවන්
හැම කෙලෙස් දවාලන – සදහම් ඔබට අස්වමි
ඒ දහම් හැම දෙන ම – දරා ගනිව් සිත
පැවිද්දන් හට නිසි වූ – ඉරියව්වෙන් ද යුතු වූ
පැවැත්මෙන් කල් ගෙවයි – දහම් දත් නැණැති සමණා
සමණෙක් කිසි විටක – නො හැසිරේ ගමේ නො කලට
සුදුසු කල හේ හැසිරෙයි – ගමේ පිඬු ලැබ ගැනුමට
එම නිසා නුසුදුසු කල – ගම ට නො වඩිති බුදුවරු
දකින රූප ද ඇසෙන ශබ්ද ද – දැනෙන රස හා සුවඳ ද
පහස යන මේ දේවල් – ලෝ සතුන් මත් කරවයි
මේවා කෙරෙහි පවතින – ආශාව දුරු කරගෙන
කල් යල් බලා හේ – පිඬු පිණිස ගම පිවිසෙයි
සමණෙක් නිසි කලට – ලබා ගත් දන් වළඳා
යළි පැමිණ හුදෙකලාවේ – තනිව හිඳ භාවනාවේ
තමා ගැන ඇති තතු මිස – බාහිර දෙයක් නො සිතන
එකඟ වූ සිතෙන් හේ – හැසිරෙන්නේ ය දහමේ
ඉදින් හේ කියයි නම් – යම් දෙයක් සව්වෙකුට හෝ
වෙනත් ආගමක සිටි – පැවිද්දෙකු සමඟ හෝ
මනා ලෙස පවසන්නේ – මිහිරි වූ සදහම් ම ය
කේළාම් නො කියන හේ – අනුන්ගේ දොස් නො කියයි
වාදයන් මුල් කොට – අවුල් වල පැටලෙති කෙනෙක්
නුවණින් කුඩා වූ – ඔවුන් ගැන නො ම පසසමු
ඒ ඒ වාදයෙන් – පැටලි පැටලී යති ඔවුන්
ඔවුන් ගේ සිත පවා – වාදයෙන් බොහෝ දුර යයි
සුගතයාණන් විසින් – වදහළ දහම දැන ගෙන
උතුම් නුවණකින් යුතු – සැදැහැවත් සමණ තෙම
වළඳන්ට පිඬු ද ලැබ – සිටින සෙනසුන් ද ලැබ
සඟළ සිවුරේ දූවිලි – සෝදා හරින දිය ලැබ
කරයි පරිහරණය – අවබෝධයෙන් දැන ගෙන
වළඳන්ට පිඬු ද ලැබ – සිටින සෙනසුන් ද ලැබ
සඟළ සිවුරේ දූවිලි – සෝදා හරින දිය ලැබ
මේ කිසිවක් කෙරෙහි – ඇලීමක් නො කරයි හේ
පියුම් පත මත නො රැඳී – ගලා හැලෙනා දිය බිඳක් ලෙස
පින්වත්නි, දැන් ඔබ හට – කියා දෙන්නෙමි ගිහිවත
කෙසේ කටයුතු කරන ගිහි සව් – යහපත් කෙනෙකු වේ දැයි
කරදර සහිත ගිහි ගෙයි – ගත කරන කෙනෙකුන් හට
ලබන්නට නොහැකි ම ය – සමණ දම් පිරිපුන් ලෙස
කිසි ප්‍රාණියෙකු නො නසයි – නො නසවයි කිසිවෙකු ලවා
සතුන් මරණා විට අනුන් – එය අනුමත ද නො කරයි
තැති ගත් නො තැති ගත් – ලොවේ හැම සතුන් වෙත
කිසි දිනක ගිහි සව්වෝ – දඬු මුගුරු නො හෙළත් ම ය
දුරු කරයි හේ සොරකම – අනුන් සතු බව දැන දැන
කවර හෝ තැනක තිබෙනා – බොහෝ වූ සුළු දෙයක් වූ හෝ
නොකරයි සොරකමක් – එය අනුමත ද නො කරයි
සියළු සොරකම් බැහැර කරලයි
ගිහි ශ්‍රාවක ද නුවණැති – මැනවින් දහම් දැනුමැති
ගිනි අඟුරු වලක් විලසින් – දුරු කරයි වනචරකම
රැක ගත නො හැකි නම් – උතුම් වූ බඹසර
පර අඹුවන් කරා – කිසි දිනක නො යන්නේ ම ය
සභාවක් මැද හෝ – පිරිසක් අතර දී හෝ
තනි වූ කෙනෙකු හට හෝ – නො කියන්නේ ය බොරු බස්
නො කියවයි බොරු – වෙන කෙනෙකු ලවා හෝ
බොරුව අනුමත නො කරයි – සියළු බොරු හේ දුරලයි
ගෙදර වසනා ශ්‍රාවක – මත්පැන් නො බොයි කිසි විට
බුදු සමිඳු ගේ සදහම් – කැමතිව රුචිව ඒ අය
උමතු බව ඇති කරන – මත් පැන ද හඳුනා ගෙන
නොදෙයි බොන්නට කිසිම කෙනෙකුට – බීම අනුමත නොකරයි
මෝඩයෝ මත්පැන් බී – නොයෙක් පව් පුරවා ගනිත්
අනෙක් ජනයාව ද – කුසලයෙහි පමා කරවත්
මත්පැන් බීම යනු – පව් උල්පතක් බව දැන
උමතු වන මුළාවන – මෝඩයන් කැමති වන
මෙය දුරින් දුරු කරන්නේ වේ
පරපණ ද නො නසන – සොරකම් කිසිත් නො කරන
බොරු බස් ද නො කියන – කිසි මත්පැනක් නොම බොන
මෛථුනයෙන් ද වැළකී – සුරකින උතුම් බඹසර
විකල් බොජුන ද හේ – රෑට අනුභව නො කරන
මල් වලින් නො සැරසෙන – සුවඳ විලවුන් නො දරන
කැප සයනයක හෝ – බිම පැදුරෙ හෝ සැතපෙන
අංග අටකින් යුතු – “උපෝසථ” යයි කියති මේ දෙය
දුකෙන් එතෙරට වැඩි – බුදු සමිඳුන් ය ඔබ හට
මේ සිල් කියා දෙන්නේ
පැහැදුන සිතින් යුතුව ම – මේ “උපෝසථය” සුරකිව්
පුන් පොහෝ දවස ට ද – අමාවක හා තුදුස්වක දින
අංග අටකින් යුතු මේ – “පොහෝ වත” දැන ගෙන
සුරකිව් මනා ලෙස මෙය
මෙලෙස රැක “උපෝසථ” – නැගිට පසු දින උදෑසන
පහන් සිතකින් යුතුව ම – අනුමෝදන්ව හැම දෙන
මනා නුවණැති ගිහි සව් – සඟ පිරිස වෙත සපැමිණ
තමා හට හැකි පරිද්දෙන් – දන්පැන් වළඳවන්නේ
දැහැමින් යුතුව සුරකියි තම දෙමාපියන්
දැහැමින් කරයි හේ – කරන හැම වෙළහෙළඳාම්
හේ පුරුදු කරයි නිති – මේ කියා දුන් ගිහි වත
යන්නේ ය මරණින් මතු – “ස්වයං ප්‍රභා” නම් දෙව් ලොව
ධම්මික නිසා වදාළ දෙසුම නිමා විය.
සාදු! සාදු!! සාදු!!!
(දෙවෙනි චූල වර්ගය යි.)
(කුඩා කොටසේ අන්තර්ගත දෙසුම්)
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-14/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M