කරමින් සසර තරණය – පරතෙර වෙතට පැමිණුන
පිරිනිවීමෙන් සැනසුන – අකම්පිත සිත් පවතින
මහා පැණවත් මුනිඳු ගෙන් – විමසා සිටිමි මෙ කරුණ
කාම සැප බැහැර කළ – ගිහි ජීවිතය අතහළ
බුදු සසුන වෙත පැමිණුන – ඒ සමණ තෙම
කෙසේ නම් මනා කොට – සැරිසරා යයි ද ලොව?
(භාග්‍යවතුන් වහන්සේ)
සුභ නිමිති සෙවීම ද – සිහින ගැන පැවසීම ද
උල්කාපාත ගැන හා – අත් ලකුණු ගැන කීම ද
යමෙකු ගේ සිත තුලින් – මුළුමණණින් බැහැර වූ විට
සුභ ලකුණු සොයා යන – දෝෂයෙන් මිදී ගිය
ඒ සමණාය ලොව – මනාලෙස සැරිසරා යන්නේ
මිනිස් ලොව සැපත ගැන – සියලු ම ඇල්ම දුරු කළ
දෙව් ලොවේ සැපත ගැන – පවතින ඇල්ම සිඳ හළ
අවබෝධ කොට සදහම් – ඉක්මවා හැම භවය ම
ඒ සමණාය ලොව – මනා ලෙස සැරිසරා යන්නේ
කේළාම් කීම ද – ක්‍රෝධ සිත් ඇති වීම ද
ලෝභ හට ගැනීම ද – මනා කොට දුරු කරමින්
බැඳීම ද ගැටීම ද – තම සිතින් නැති කර ගෙන
ඒ සමණාය ලොව – මනා ලෙස සැරිසරා යන්නේ
ප්‍රිය හෝ අප්‍රිය හෝ – බැහැර කොට හැම දේ සිතින්
අල්ලා නො ගෙන කිසිවක් – නො බැඳී කිසිම දෙයකට
හැම බැඳුමෙන් ම මිදී ගිය
ඒ සමණාය ලොව – මනා ලෙස සැරිසරා යන්නේ
කෙලෙසුන් අතර කිසි හරයක් නොම දකිනා
හැම දේ කෙරෙහි බැඳි සෙනෙහස දුරු කරනා
කෙලෙසුන් ඇසුරු නො කරන – බාහිර පිහිට නො පතන
ඒ සමණාය ලොව – මනා ලෙස සැරිසරා යන්නේ
සිත, කය, වචන යන – කිසිවකින් හෝ නො ගැටෙන
දහම ද මනා ලෙස දැන – නිවන කැමතිව සිටිනා
ඒ සමණාය ලොව – මනා ලෙස සැරිසරා යන්නේ
තමා හට වඳින විට – කිසිවිට උඩඟු නො ම වන
අපහාස කරන විට – කිසිවිට වෛර නො කරන
අනුන්ගෙන් බොජුන් ලැබ – ඒ තුළින් මත් නො ම වන
ඒ සමණාය ලොව – මනා ලෙස සැරිසරා යන්නේ
ලෝභය හා භවය – දුරින් දුරු කර දමමින්
හිංසාව ඇති වෙන – හැම දේ තුළින් වෙන් වුණ
සැකයෙන් ද එතෙර වුණ – හැම කෙලෙස් හුල් නැති වුණ
ඒ සමණාය ලොව – මනා ලෙස සැරිසරා යන්නේ
තමාට ගැළපෙන දේ හඳුනාගෙන
ලොවේ හැමට හිංසාවක් නො කරන
දිවියේ ඇති තතු දහම තුළින් දැන
ඒ සමණාය ලොව – මනා ලෙස සැරිසරා යන්නේ
හිත පතුලේ කෙලෙසුන් කිසිවක් නැති
මුලින් ම සිඳ හල අකුසල මුල් ඇති
කිසි ආශා නැති – කිසි පැතුමක් නැති
ඒ සමණාය ලොව – මනා ලෙස සැරිසරා යන්නේ
කෙලෙසුන් නැති කළ – මානය සිඳ හළ
රාග හැදෙන හැම – මග ද බැහැර කළ
දමනය වී පිරිනිවන කරා ගිය – නො සැලෙන සිත් ඇති
ඒ සමණාය ලොව – මනා ලෙස සැරිසරා යන්නේ
සැදැහැ සිත් ඇතිව ම – දහම ද අසා දැන ගෙන
නිවන් මග හඳුනන
බෙදී ගිය පිරිස අතරේ – බෙදීමක් නැතිව සිටිනා
ලෝභ දෝස මෝහ ගැටුම් – දුරු කළ ධීර වීර වූ
ඒ සමණාය ලොව – මනා ලෙස සැරිසරා යන්නේ
කෙලෙස් ජය අරගෙන – පිරිසිදු බවට පත් වූ
නසා හැම අකුසල් – දහමට ම වසඟ වුණ
පරතෙර වෙත ට සපැමිණි – තණ්හා රහිත වූ
සැකසුම් නැති සසර – නුවණෙහි දක්‍ෂ වූ
ඒ සමණාය ලොව – මනා ලෙස සැරිසරා යන්නේ
අතීතේ හෝ අනාගතයේ – බැඳෙන සිතිවිලි ඉක්මවා ගිය
පිරිසිදු නුවණ ලැබ ගත්
සියළු ඉඳුරන් ගෙන් – මනා කොට මිදී ගිය
ඒ සමණාය ලොව – මනා ලෙස සැරිසරා යන්නේ
අමා නිවන ට පැමිණුන – සම්බුදු දහම දැනගෙන
පැහැදිලි ලෙස ම දැක ගෙන – නැසීම ද කෙලෙසුන් ගේ
සකෙලෙස් කර්ම හැම – ගෙවා අවසන් කොට
ඒ සමණාය ලොව – මනා ලෙස සැරිසරා යන්නේ
භගවතාණනි මෙය – සැබැවින් ම මෙලෙසින් වේ
ජීවිතය දමනය කොට – මේ අයුරින් ම හැසිරෙන
සියලු බන්ධන ඉක්මවා ගිය
ඒ සමණාය ලොව – මනා ලෙස සැරිසරා යන්නේ
මනා ලෙස සැරිසරා යාම ගැන වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-13/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M