(භාග්‍යවතුන් වහන්සේ)
නුවණින් යුතු තෙරුන්ගෙ ළඟ – නිරතුරුව ම වසනා විට
කල් ගෙවන්නෙ ඔබ රාහුල – අවමානය නොකර නේද?
මිනිසුන් ගේ අඳුරු ලෝක – එළිය කරන පහන දරන
ඒ උත්තම තෙරිඳුන් හට – ඔබ නිති පුදනවා නේද?
(රාහුල සමිඳු)
නුවණින් යුතු තෙරුන් ගෙ ළඟ – නිරතුරුව ම වසද්දි මම
කල්ගෙවන්නෙ සමිඳාණනි – කිසිදු අවමනක් නොම කොට
මිනිසුන් ගේ අඳුරු ලෝක – එළිය කරන පහන දරන
ඒ උත්තම තෙරිඳුන් නිති – සාදරයෙන් පුදනෙමි මම
( භාග්‍යවතුන් වහන්සේ)
පියකරු තැන සිත නවතින – පස්කම් ගුණය ම අතහැර
ගිහි වාසය දුරු කරමින් – සැදැහැයෙන් ම පැමිණි ඔබත්
දුක් විඳිනා සසර ගමන – නිමාවට ම පත් කරන්න
කළණ සුමිතුරන් සමඟින් – නිරතුරු වාසය කරන්න
ඈත වනේ සෙනසුන් වල – නිසල හුදෙකලා තැන් වල
තනියම කාලය ගෙවන්න
ලැබෙනා ආහාර වේල – සිහි නුවණින් යුතුව ගන්න
පොරව ගන්න සිව්රු ගැනත් – වළඳන ආහාර ගැනත්
ගන්නා බෙහෙතක් ගැන හෝ – තමන් සිටින කුටිය ගැනත්
කිසිම දෙයක් ගැන මේවා – ආශාවක් නොකර ඉන්න
එන්නට නම් එපා! යළිත් – දුකින් පිරුන සංසාරෙට
සුරකින සිල් පදයන් ගැන – තමන්ගෙ ඉඳුරන් පස ගැන
සංවරයෙන් කල් ගෙවන්න
කයෙහි තිබෙන ඇත්ත ගැනම – පවතීවා! නිතර සිහිය
සංසාරෙට කලකිරීම – බහුල සිතින් කල් ගෙවන්න
සුන්දර විලසට දිස්වෙන – රාගයක්ම ඇති කරවන
කිසිම අරමුණක් ගැන ඔබ – නො ම සලකා දුරු කරන්න
ඉතා හොඳින් එකඟ කෙරුව – සමාධිගත සිතින් යුතුව
පිළිකුල් වූ දෙය එලෙසම – ඔබ සිත තුළ රඳවගන්න
කෙලෙස් සටහනක් නො තිබෙන – විදසුන් නුවණ ම වඩමින්
මානය හිත පතුළෙ තිබෙන – මුලින් ම උපුටා දමන්න
දියුණු කරන ලද නුවණින් – එය බැහැරට කර දමමින්
උපශාන්ත බවට පත් ව – සැනසීමෙන් කල් ගෙවන්න
භාග්‍යවතුන් වහන්සේ මේ ආකාරයෙන් ආයුෂ්මත් රාහුලයන් හට මේ ගාථා වලින් නිතර අවවාද කරන සේක.
රාහුල සමිඳුන් නිසා වදාළ දෙසුම නිමා විය.
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn2_2-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M