මා හට අසන්නට ලැබුනේ මේ විදිහටයි. ඒ දිනවල භාග්‍යවතුන් වහන්සේ වැඩසිටියේ සැවැත් නුවර ජේතවනය නම් වූ අනේපිඬු සිටුතුමාගේ ආරාමයේ.
එදා පසේනදී කොසොල් රජතුමා මල්ලිකා දේවියත් සමඟ මාළිගාවේ උඩු මහලේ සිටියේ. ඒ වෙලාවේ පසේනදී කොසොල් රජු මල්ලිකා දේවියගෙන් මෙහෙම ඇහුවා.
“ප්‍රිය මල්ලිකා, තමන්ටත් වඩා ප්‍රිය වූ තව කවුරු හරි ඉන්නවාද?”
“පින්වත් මහාරාජ, මට නම් තමන්ට වඩා ප්‍රිය කවුරුවත් නෑ.
පින්වත් මහාරාජ, තමන්ට වඩා ප්‍රිය මනාප වූ වෙන කවුරුවත් ඔබවහන්සේට ඉන්නවාද?”
“ප්‍රිය මල්ලිකා, තමන්ට වඩා ප්‍රිය මනාප වූ කවුරුවත් මටත් නෑ.”
එතකොට පසේනදී කොසොල් රජතුමා මාළිගාවෙන් බැස්සා. භාග්‍යවතුන් වහන්සේ ළඟට ගියා. ගිහින් භාග්‍යවතුන් වහන්සේට ආදරයෙන් වන්දනා කළා. පැත්තකින් වාඩි වුනා. පැත්තකින් වාඩි වුන පසේනදී කෙසොල් රජතුමා භාග්‍යවතුන් වහන්සේට මෙහෙම කිව්වා.
“ස්වාමීනී, මේ මං මල්ලිකා දේවියත් සමඟ මාළිගාවේ උඩු මහලේ සිටියේ. ඉතින් මං මල්ලිකා දේවියගෙන් මෙහෙම ඇහුවා. ‘ප්‍රිය මල්ලිකා, තමන්ටත් වඩා ප්‍රිය වූ තව කවුරු හරි ඉන්නවාද?’ කියලා. එතකොට ස්වාමීනී, මල්ලිකා දේවිය මට මෙහෙම කිව්වා. ‘පින්වත් මහාරාජ, මට නම් තමන්ට වඩා ප්‍රිය කවුරුවත් නෑ. පින්වත් මහාරාජ, තමන්ට වඩා ප්‍රිය මනාප වූ වෙන කවුරුවත් ඔබවහන්සේට ඉන්නවාද?’ කියලා. ස්වාමීනී, එහෙම කිව්වාම මල්ලිකා දේවියට මං මෙහෙම කිව්වා. ‘ප්‍රිය මල්ලිකා, තමන්ට වඩා ප්‍රිය මනාප වූ කවුරුවත් මටත් නෑ’ කියලා.”
ඉතින් භාග්‍යවතුන් වහන්සේ මේ කරුණ දැනගෙන, ඒ වෙලාවේ මේ උදානය වදාළා.
“හැම දිශාවෙම සිතින් විමස විමසා බැලුවත්, තමන්ට වඩා ප්‍රිය මනාප කෙනෙක් හම්බවෙන්නේ නෑ. අනිත් උදවිය ගැනත් වෙන වෙනම බැලුවොත් තමාමයි ප්‍රිය. ඒ නිසා තමාගේ සැප කැමති කෙනා අනුන්ට හිංසා නොකර ඉන්න ඕන.”
සාදු! සාදු!! සාදු!!!
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/kn1_3-5-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M