“මහණෙනි, ඔබට කැරකී සැඟවී යන ඉරණම ගැන දේශනා කරන්නෙමි. එය අසව්. මැනැවින් මෙනෙහි කරව්. පවසන්නෙමි.”
“එසේය ස්වාමීනී” යි ඒ භික්ෂූහු භාග්‍යවතුන් වහන්සේට පිළිවදන් දුන්හ. භාග්‍යවතුන් වහන්සේ මෙය වදාළ සේක.
“මහණෙනි, කැරකී සැඟවී යන ඉරණම පිළිබඳ වූ ඒ ධර්ම ක්‍රමය කිමෙක් ද?
මහණෙනි, සත්වයෝ තමා කරන ලද දෙයින් ඇතිවන විපාකය තමා සතු ව සිටින්නෝ ය. තමා කරන ක්‍රියාව ම දායාදය කොට සිටින්නෝ ය. තමාගේ ක්‍රියාව තමා උපදින තැන තීරණය කරන ස්වභාවයෙන් යුත්තෝ ය. තමාගේ ක්‍රියාව ම ඥාතියා කොට වසන්නෝ ය. කර්මය පිළිසරණ කොට වසන්නෝ ය. කල්‍යාණ වූ හෝ පාපී වූ හෝ යම් ක්‍රියාවක් කරන්නෝ ද, එහි ඵලය දායාදය කරගන්නෝ ය.
මහණෙනි, මෙහිලා ඇතැමෙක් සතුන් මරන්නේ වෙයි. හේ රෞද්‍ර ය. ලේ වැකුණු අත් ඇත්තේ ය. වැනසීම්, පැහැර ගැනීම් වලින් යුක්ත වූයේ ය. සියළු ප්‍රාණභූතයන් කෙරෙහි දයා නැත්තේ ය. ඔහු කයින් කැරකී යන කර්මයක් කරන්නේ ය. වචනයෙන් කැරකී යන කර්මයක් කරන්නේ ය. මනසින් කැරකී යන කර්මයක් කරන්නේ ය. ඔහුගේ කාය කර්මය වක්‍ර වූයේ වෙයි. වචී කර්මය වක්‍ර වූයේ වෙයි. මනෝ කර්මය වක්‍ර වූයේ වෙයි. ඔහුගේ ගිය ගමන වක්‍ර වූයේ වෙයි. ඔහුගේ උපත වක්‍ර වූයේ වෙයි. මහණෙනි, මම මෙසේ වක්‍ර ගමනක යෙදුණු, වක්‍ර උපතක් ඇති කෙනෙකුට යම්බඳු ඒකාන්තයෙන් දුක්ඛිත වූ නිරයෝ ඇද්ද, එහි හෝ යම්බඳු කැරකී සැඟවී යන ස්වභාව ඇති තිරිසන් යෝනි ඇද්ද මේ දෙගතියෙන් එක්තරා උපතක් උරුම කරගන්නේ යැයි කියමි.
මහණෙනි, කැරකී සැඟවී යන ස්වභාව ඇති ඒ තිරිසන් යෝනි මොනවාද? සර්පයෝ ය. ගෝනුස්සෝ ය. පත්තෑයෝ ය. මුගටියෝ ය. බළල්ලු ය. මීයෝ ය. බකමූණෝ ය. මෙබඳු වූ අන්‍ය තිරිසන් යෝනිවල උපන් සතුන් ඇද්ද, ඔවුහු මිනිසුන් දැක කැරකී සැඟවී යති. මහණෙනි, මෙසේ සත්වයාගේ කර්මය සත්වයාගේ උපත වෙයි. යමක් කරයි නම්, ඒ හේතුවෙන් උපදියි. උපන්නහු ඒ කර්ම විපාක ස්පර්ශයෝ ස්පර්ශ කරති. මහණෙනි, මේ අයුරින් ද මම සත්වයෝ කර්මය දායාද කරගත්තෝ යැයි කියමි.
මහණෙනි, මෙහිලා කෙනෙක් සොරකම් කරන්නේ වෙයි. ….(පෙ)…. වැරදි කාම සේවනයෙන් යුතු වූයේ වෙයි. ….(පෙ)…. බොරු කියන්නේ වෙයි. ….(පෙ)…. කේළාම් කියන්නෙක් වෙයි. ….(පෙ)…. දරුණු වචන කියන්නේ වෙයි. ….(පෙ)…. නිසරු දේ කියන්නේ වෙයි. ….(පෙ)…. අන්සතු දෙයට ආසා කරයි. ….(පෙ)…. ද්වේෂ සිතින් යුතු වූයේ වෙයි. ….(පෙ)…. වැරදි දෘෂ්ටියක් ගත්තේ වෙයි. විපරීත දැක්මකින් යුතු වූයේ වෙයි. ‘දෙන ලද්දෙහි විපාක නැත්තේ ය. ….(පෙ)…. ලොවෙහි නිවැරදි මගට පිළිපන්, නිවැරදි මගෙහි ගිය මෙලොව පරලොව පිළිබඳ සිය විශිෂ්ට ඥානයෙන් අත්දැක යමක් පවසත් නම්, එබඳු වූ ශ්‍රමණ බ්‍රාහ්මණයෝ නැත්තාහු යැ’යි.
ඔහු කයින් කැරකී යන කර්මයක් කරන්නේ ය. වචනයෙන් කැරකී යන කර්මයක් කරන්නේ ය. මනසින් කැරකී යන කර්මයක් කරන්නේ ය. ඔහුගේ කාය කර්මය වක්‍ර වූයේ වෙයි. වචී කර්මය වක්‍ර වූයේ වෙයි. මනෝ කර්මය වක්‍ර වූයේ වෙයි. ඔහුගේ ගිය ගමන වක්‍ර වූයේ වෙයි. ඔහුගේ උපත වක්‍ර වූයේ වෙයි. මහණෙනි, මම මෙසේ වක්‍ර ගමනක යෙදුණු, වක්‍ර උපතක් ඇති කෙනෙකුට යම්බඳු ඒකාන්තයෙන් දුක්ඛිත වූ නිරයෝ ඇද්ද, එහි හෝ යම්බඳු කැරකී සැඟවී යන ස්වභාව ඇති තිරිසන් යෝනි ඇද්ද මේ දෙගතියෙන් එක්තරා උපතක් උරුම කරගන්නේ යැයි කියමි.
මහණෙනි, කැරකී සැඟවී යන ස්වභාව ඇති ඒ තිරිසන් යෝනි මොනවාද? සර්පයෝ ය. ගෝනුස්සෝ ය. පත්තෑයෝ ය. මුගටියෝ ය. බළල්ලු ය. මීයෝ ය. බකමූණෝ ය. මෙබඳු වූ අන්‍ය තිරිසන් යෝනිවල උපන් සතුන් ඇද්ද, ඔවුහු මිනිසුන් දැක කැරකී සැඟවී යති. මහණෙනි, මෙසේ සත්වයාගේ කර්මය සත්වයාගේ උපත වෙයි. යමක් කරයි නම්, ඒ හේතුවෙන් උපදියි. උපන්නහු ඒ කර්ම විපාක ස්පර්ශයෝ ස්පර්ශ කරති. මහණෙනි, මේ අයුරින් ද මම සත්වයෝ කර්මය දායාද කරගත්තෝ යැයි කියමි.
මහණෙනි, සත්වයෝ තමා කරන ලද දෙයින් ඇතිවන විපාකය තමා සතු ව සිටින්නෝ ය. තමා කරන ක්‍රියාව ම දායාදය කොට සිටින්නෝ ය. තමාගේ ක්‍රියාව තමා උපදින තැන තීරණය කරන ස්වභාවයෙන් යුත්තෝ ය. තමාගේ ක්‍රියාව ම ඥාතියා කොට වසන්නෝ ය. කර්මය පිළිසරණ කොට වසන්නෝ ය. කල්‍යාණ වූ හෝ පාපී වූ හෝ යම් ක්‍රියාවක් කරන්නෝ ද, එහි ඵලය දායාදය කරගන්නෝ ය.
මහණෙනි, මෙහිලා ඇතැමෙක් සතුන් මැරීම අත්හැර සතුන් මැරීමෙන් වැළකුණේ වෙයි. දඬු මුගුරු අත්හැරියේ වෙයි. අවි ආයුධ අත්හැරියේ වෙයි. ලැජ්ජාවෙන් යුතු වෙයි. දයාවෙන් යුතුවෙයි. සියළු සත්ව වර්ගයා කෙරෙහි හිතානුකම්පී ව වාසය කරයි.
ඔහු කයින් කැරකී යන කර්මයක් නොකරන්නේ ය. වචනයෙන් කැරකී යන කර්මයක් නොකරන්නේ ය. මනසින් කැරකී යන කර්මයක් නොකරන්නේ ය. ඔහුගේ කාය කර්මය ඍජු වූයේ වෙයි. වචී කර්මය ඍජු වූයේ වෙයි. මනෝ කර්මය ඍජු වූයේ වෙයි. ඔහුගේ ගිය ගමන ඍජු වූයේ වෙයි. ඔහුගේ උපත ඍජු වූයේ වෙයි. මහණෙනි, මම මෙසේ ඍජු ගමනක යෙදුණු, ඍජු උපතක් ඇති කෙනෙකුට යම්බඳු ඒකාන්ත සුඛ ස්වර්ගයෝ ඇද්ද, එහි හෝ යම්බඳු ක්ෂත්‍රීය මහාසාර කුලයක හෝ වේවා, බ්‍රාහ්මණ මහාසාර කුලයක හෝ වේවා, ගෘහපති මහාසාර කුලයක හෝ වේවා, ආඪ්‍ය වූ, මහා ධනය ඇති, මහා භෝග ඇති, බොහෝ රන් රිදී ඇති, බොහෝ සැප සම්පත් ඇති, බොහෝ ධන ධාන්‍ය ඇති උසස් කුලයෝ වෙත් නම් මේ දෙගතියෙන් එක්තරා උපතක් උරුම කරගන්නේ යැයි කියමි.
මහණෙනි, මෙසේ සත්වයාගේ කර්මය සත්වයාගේ උපත වෙයි. යමක් කරයි නම්, ඒ හේතුවෙන් උපදියි. උපන්නහු ඒ කර්ම විපාක ස්පර්ශයෝ ස්පර්ශ කරති. මහණෙනි, මේ අයුරින් ද මම සත්වයෝ කර්මය දායාද කරගත්තෝ යැයි කියමි.
මහණෙනි, මෙහිලා කෙනෙක් සොරකම අත්හැර සොරකමින් වැළකුණේ වෙයි. ….(පෙ)…. වැරදි කාම සේවනය අත්හැර, වැරදි කාම සේවනයෙන් වැළකුණේ වෙයි. ….(පෙ)…. බොරු කීම අත්හැර, බොරු කීමෙන් වැළකුණේ වෙයි. ….(පෙ)…. කේළාම් කීම අත්හැර, කේළාම් කීමෙන් වැළකුණේ වෙයි. ….(පෙ)…. දරුණු වචන අත්හැර, දරුණු වචනයෙන් වැළකුණේ වෙයි. ….(පෙ)…. නිසරු දේ කීම අත්හැර නිසරු දේ පැවසීමෙන් වැළකුණේ වෙයි. ….(පෙ)…. අන්සතු දෙයට ආසා නොකරයි. ….(පෙ)…. ද්වේෂ නැති සිතින් යුතු වූයේ වෙයි. ….(පෙ)…. නිවැරදි දෘෂ්ටියක් ගත්තේ වෙයි. අවිපරීත දැක්මකින් යුතු වූයේ වෙයි. ‘දෙන ලද්දෙහි විපාක ඇත්තේ ය. පුදන ලද්දෙහි විපාක ඇත්තේ ය. සේවායෙහි විපාක ඇත්තේ ය. හොඳ නරක කර්මයන්ගේ විපාක ඇත්තේ ය. මෙලොවක් ඇත්තේ ය. පරලොවක් ඇත්තේ ය. මවක් ඇත්තේ ය. පියෙක් ඇත්තේ ය. ඕපපාතික සත්වයෝ ඇත්තාහ. ලොවෙහි නිවැරදි මගට පිළිපන්, නිවැරදි මගෙහි ගිය මෙලොව පරලොව පිළිබඳ සිය විශිෂ්ට ඥානයෙන් අත්දැක යමක් පවසත් නම්, එබඳු වූ ශ්‍රමණ බ්‍රාහ්මණයෝ ඇත්තාහු යැ’යි. මෙබඳු දෙයක් සිතට ගත්තේ වෙයි.
ඔහු කයින් කැරකී යන කර්මයක් නොකරන්නේ ය. වචනයෙන් කැරකී යන කර්මයක් නොකරන්නේ ය. මනසින් කැරකී යන කර්මයක් නොකරන්නේ ය. ඔහුගේ කාය කර්මය ඍජු වූයේ වෙයි. වචී කර්මය ඍජු වූයේ වෙයි. මනෝ කර්මය ඍජු වූයේ වෙයි. ඔහුගේ ගිය ගමන ඍජු වූයේ වෙයි. ඔහුගේ උපත ඍජු වූයේ වෙයි. මහණෙනි, මම මෙසේ ඍජු ගමනක යෙදුණු, ඍජු උපතක් ඇති කෙනෙකුට යම්බඳු ඒකාන්ත සුඛ ස්වර්ගයෝ ඇද්ද, එහි හෝ යම්බඳු ක්ෂත්‍රීය මහාසාර කුලයක හෝ වේවා, බ්‍රාහ්මණ මහාසාර කුලයක හෝ වේවා, ගෘහපති මහාසාර කුලයක හෝ වේවා, ආඪ්‍ය වූ, මහා ධනය ඇති, මහා භෝග ඇති, බොහෝ රන් රිදී ඇති, බොහෝ සැප සම්පත් ඇති, බොහෝ ධන ධාන්‍ය ඇති උසස් කුලයෝ වෙත් නම් මේ දෙගතියෙන් එක්තරා උපතක් උරුම කරගන්නේ යැයි කියමි.
මහණෙනි, මෙසේ සත්වයාගේ කර්මය සත්වයාගේ උපත වෙයි. යමක් කරයි නම්, ඒ හේතුවෙන් උපදියි. උපන්නහු ඒ කර්ම විපාක ස්පර්ශයෝ ස්පර්ශ කරති. මහණෙනි, මේ අයුරින් මම සත්වයෝ කර්මය දායාද කරගත්තෝ යැයි කියමි.
මහණෙනි, සත්වයෝ කර්මය තමාගේ දෙය කොට ඇත්තාහු ය. කර්මය දායාද කොට ඇත්තාහු ය. කර්මය උප්පත්ති ස්ථානය කොට ඇත්තාහු ය. කර්මය ඥාතියා කොට ඇත්තාහු ය. කර්මය පිළිසරණ කොට ඇත්තාහු ය. කල්‍යාණ වේවා, පවිටු වේවා යම් කර්මයක් කරත් ද, එය ඔහුගේ දායාදය වන්නේ ය.
මහණෙනි, මෙය වනාහී කැරකී සැඟවී යන ඉරණම නම් වූ ධර්ම පරියාය වේ.
සාදු! සාදු!! සාදු!!!
සංසප්පනීය පරියාය සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an6_10-5-1-6/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M