එකල්හී ජාණුස්සෝණි බ්‍රාහ්මණයා භාග්‍යවතුන් වහන්සේ යම් තැනක වැඩසිටි සේක් ද, එතැනට පැමිණියේ ය. පැමිණ භාග්‍යවතුන් වහන්සේ සමඟ සතුටු විය. සතුටු විය යුතු පිළිසඳර කථාව නිමවා එකත්පස්ව හිඳගත්තේ ය. එකත්පස්ව හුන් ජාණුස්සොණි බ්‍රාහ්මණයා භාග්‍යවතුන් වහන්සේට මෙය පැවසුවේ ය.
“භවත් ගෞතමයෙනි, අපි බ්‍රාහ්මණයෝ නම් වෙමු. ‘මේ දානය මිය පරලොව ගිය ලේ ඥාතීන් වෙත පැමිණේවා! මේ දානය ඒ පරලොව ගිය ලේ ඥාතීහු අනුභව කරත්වා!’ යි දන් දෙමු. මළවුන් උදෙසා දන් දෙමු. කිම? භවත් ගෞතමයෙනි, එම දානය මියගිය ලේ ඥාතීන් වෙත පැමිණෙන්නේ ද? කිම? ඒ මියගිය ලේ ඥාතීහු ඒ දානය අනුභව කරත් ද?”
“බ්‍රාහ්මණය, අදාළ තැනට පැමිණෙන්නේ ය. නොඅදාළ තැනට නොපැමිණෙන්නේය.”
“භවත් ගෞතමයන් වහන්ස, ඒ අදාළ තැන කුමක්ද? නොඅදාළ තැන කුමක්ද?”
“බ්‍රාහ්මණය, මෙහිලා ඇතැමෙක් ප්‍රාණඝාතයෙහි යෙදෙයි. සොරකම් කරයි. වැරදි කාම සේවනයෙහි යෙදෙයි. බොරු කියයි. කේළාම් කියයි. දරුණු වචන කියයි. නිසරු දේ කියයි. අන් සතු දෙයට ආශා කරයි. ද්වේෂ සිතින් යුතු වෙයි. වැරදි දෘෂ්ටියක් ගත්තේ වෙයි. හේ කය බිඳී මරණින් මතු නිරයෙහි උපදියි. එවිට නිරි සතුන්ගේ යම් ආහාරයක් ඇද්ද, එහිදී හේ එයින් යැපෙයි. එයින් හේ එහි සිටියි. බ්‍රාහ්මණය, යම් තැනක සිටියහු වෙත එම දානය නොපැමිණෙයි නම්, මෙය ද එබඳු අදාළ නැති තැනකි.
බ්‍රාහ්මණය, මෙහිලා ඇතැමෙක් ප්‍රාණඝාතයෙහි යෙදෙයි. ….(පෙ)…. වැරදි දෘෂ්ටියක් ගත්තේ වෙයි. හේ කය බිඳී මරණින් මතු තිරිසන් යෝනියෙහි උපදියි. එවිට තිරිසන් සතුන්ගේ යම් ආහාරයක් ඇද්ද, එහිදී හේ එයින් යැපෙයි. එයින් හේ එහි සිටියි. බ්‍රාහ්මණය, යම් තැනක සිටියහු වෙත එම දානය නොපැමිණෙයි නම්, මෙය ද එබඳු අදාළ නැති තැනකි.
බ්‍රාහ්මණය, මෙහිලා ඇතැමෙක් ප්‍රාණඝාතයෙන් වැළකුණේ වෙයි. සොරකමෙන් වැළකුණේ වෙයි. වැරදි කාම සේවනයෙන් වැළකුණේ වෙයි. බොරු කීමෙන් වැළකුණේ වෙයි. කේළාම් කීමෙන් වැළකුණේ වෙයි. දරුණු වචන කීමෙන් වැළකුණේ වෙයි. නිසරු දේ කීමෙන් වැළකුණේ වෙයි. අන් සතු දෙයට ආශා නොකරන්නේ වෙයි. අද්වේෂ සිතින් යුතු වෙයි. නිවැරදි දෘෂ්ටියක් ගත්තේ වෙයි. හේ කය බිඳී මරණින් මතු මිනිසුන්ගේ ලෝකයට පැමිණෙයි. එවිට මිනිසුන්ගේ යම් ආහාරයක් ඇද්ද, එහිදී හේ එයින් යැපෙයි. එයින් හේ එහි සිටියි. බ්‍රාහ්මණය, යම් තැනක සිටියහු වෙත එම දානය නොපැමිණෙයි නම්, මෙය ද එබඳු අදාළ නැති තැනකි.
බ්‍රාහ්මණය, මෙහිලා ඇතැමෙක් ප්‍රාණඝාතයෙන් වැළකුණේ වෙයි ….(පෙ)…. නිවැරදි දෘෂ්ටියක් ගත්තේ වෙයි. හේ කය බිඳී මරණින් මතු දෙවියන් අතර උපදියි. එවිට දෙවියන්ගේ යම් ආහාරයක් ඇද්ද, එහිදී හේ එයින් යැපෙයි. එයින් හේ එහි සිටියි. බ්‍රාහ්මණය, යම් තැනක සිටියහු වෙත එම දානය නොපැමිණෙයි නම්, මෙය ද එබඳු අදාළ නැති තැනකි.
බ්‍රාහ්මණය, මෙහිලා ඇතැමෙක් ප්‍රාණඝාතයෙහි යෙදෙයි. ….(පෙ)…. වැරදි දෘෂ්ටියක් ගත්තේ වෙයි. හේ කය බිඳී මරණින් මතු ප්‍රේත විෂයෙහි උපදියි. එවිට ප්‍රේත විෂයට අයත් සතුන්ගේ යම් ආහාරයක් ඇද්ද, එහිදී හේ එයින් යැපෙයි. එයින් හේ එහි සිටියි. යම් කලෙක ඔහුගේ මිත්‍රයෝ වෙත්වා, යාළුවෝ වෙත්වා, ඥාතීහු වෙත්වා, ලේ ඥාතීහු වෙත්වා යමෙක් යම් දානයක් දෙයි නම් හේ එහි එයින් යැපෙයි. හේ එහි ඒ ආහාරයෙන් සිටියි. බ්‍රාහ්මණය, යම් තැනක සිටියහු වෙත එම දානය පැමිණෙයි නම්, මේ වනාහී ඒ තැනයි.”
“භවත් ගෞතමයෙනි, ඉදින් ඒ පරලෝකප්‍රාප්ත ඥාතියා හෝ ලේ නෑයා ඒ තැනට නොපැමිණියේ නම්, ඒ දානය කවරෙක් අනුභව කරයි ද?”
“බ්‍රාහ්මණය, පරලොව ගිය අන්‍ය වූ ඥාතීහු, ලේ ඥාතීහු සිටිති. ඔවුහු එතැනට පැමිණියාහු වෙති. ඔවුහු ඒ දානය අනුභව කරති.”
“භවත් ගෞතමයෙනි, ඉදින් ඒ පරලෝකප්‍රාප්ත ඥාතියා හෝ ලේ නෑයා ඒ තැනට නොපැමිණියේ නම්, පරලොව ගිය අන්‍ය වූ ඥාතීහු, ලේ ඥාතීහු සිටිත් ද, ඔවුහු ද එතැනට නො පැමිණියාහු නම්, ඒ දානය කවරෙක් අනුභව කරත් ද?”
“බ්‍රාහ්මණය, යම් හෙයකින් මේ සා දීර්ඝ සසරෙහි මිය පරලොව ගිය ඥාතීන්ගෙන් හෝ ලේ නෑයන්ගෙන් හෝ ඒ තැන හිස් වන්නේ ය යන කරුණ නොසිදුවෙන දෙයකි. අවකාශ රහිත දෙයකි. බ්‍රාහ්මණය, එනමුදු දන් දෙන තැනැත්තාට එහි ඵලය හිමි වේ.”
“භවත් ගෞතමයන් නොතැන්හිදී ත් දානයාගේ ඵලය වදාරණ සේක් ද?”
“බ්‍රාහ්මණය, මම් නොතැන්හිදී ත් දානයාගේ ඵලය ඇතැයි කියමි.?
බ්‍රාහ්මණය, මෙහිලා ඇතැමෙක් ප්‍රාණඝාතයෙහි යෙදෙයි. සොරකම් කරයි. වැරදි කාම සේවනයෙහි යෙදෙයි. බොරු කියයි. කේළාම් කියයි. දරුණු වචන කියයි. නිසරු දේ කියයි. අන් සතු දෙයට ආශා කරයි. ද්වේෂ සිතින් යුතු වෙයි. වැරදි දෘෂ්ටියක් ගත්තේ වෙයි. හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දෙන්නේ වෙයි. හේ කය බිඳී මරණින් මතු හස්ති යෝනියෙහි උපදින්නේ ය. හේ එහිදී ආහාර පාන, මාල, නා නා අලංකාරයන් ලබන සුළු වෙයි.
බ්‍රාහ්මණය, යම් හෙයකින් ඇතැමෙක් මෙලොව දී ප්‍රාණඝාතයෙහි යෙදෙයි ද, සොරකම් කරයි ද, වැරදි කාම සේවනයෙහි යෙදෙයි ද, බොරු කියයි ද, කේළාම් කියයි ද, දරුණු වචන කියයි ද, නිසරු දේ කියයි ද, අන් සතු දෙයට ආශා කරයි ද, ද්වේෂ සිතින් යුතු වෙයි ද, වැරදි දෘෂ්ටියක් ගත්තේ වෙයි ද, ඒ හේතුවෙන් ඔහු කය බිඳී මරණින් මතු හස්ති යෝනියෙහි ඉපදුනේ වෙයි. යම් හෙයකින් හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දුන්නේ වෙයිද, ඒ හේතුවෙන් හේ එහිදී ආහාර පාන, මාල, නා නා අලංකාරයන් ලබන සුළු වෙයි.
බ්‍රාහ්මණය, මෙහිලා ඇතැමෙක් ප්‍රාණඝාතයෙහි යෙදෙයි. සොරකම් කරයි. වැරදි කාම සේවනයෙහි යෙදෙයි. බොරු කියයි. කේළාම් කියයි. දරුණු වචන කියයි. නිසරු දේ කියයි. අන් සතු දෙයට ආශා කරයි. ද්වේෂ සිතින් යුතු වෙයි. වැරදි දෘෂ්ටියක් ගත්තේ වෙයි. හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දෙන්නේ වෙයි. හේ කය බිඳී මරණින් මතු අශ්ව යෝනියෙහි උපදින්නේ ය. ….(පෙ)…. ගව යෝනියෙහි උපදින්නේ ය. ….(පෙ)…. සුනඛ යෝනියෙහි උපදින්නේ ය. හේ එහිදී ආහාර පාන, මාල, නා නා අලංකාරයන් ලබන සුළු වෙයි.
බ්‍රාහ්මණය, යම් හෙයකින් ඇතැමෙක් මෙලොව දී ප්‍රාණඝාතයෙහි යෙදෙයි ද, ….(පෙ)…. වැරදි දෘෂ්ටියක් ගත්තේ වෙයි ද, ඒ හේතුවෙන් ඔහු කය බිඳී මරණින් මතු සුනඛ යෝනියෙහි ඉපදුනේ වෙයි. යම් හෙයකින් හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දුන්නේ වෙයිද, ඒ හේතුවෙන් හේ එහිදී ආහාර පාන, මාල, නා නා අලංකාරයන් ලබන සුළු වෙයි.
බ්‍රාහ්මණය, මෙහිලා ඇතැමෙක් ප්‍රාණඝාතයෙන් වැළකුණේ වෙයි. සොරකමින් වැළකුණේ වෙයි. වැරදි කාම සේවනයෙන් වැළකුණේ වෙයි. බොරු කීමෙන් වැළකුණේ වෙයි. කේළාම් කීමෙන් වැළකුණේ වෙයි. දරුණු වචන කීමෙන් වැළකුණේ වෙයි. නිසරු දේ කීමෙන් වැළකුණේ වෙයි. අන් සතු දෙයට ආශා නොකරන්නේ වෙයි. අද්වේෂ සිතින් යුතු වෙයි. නිවැරදි දෘෂ්ටියක් ගත්තේ වෙයි. හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දෙන්නේ වෙයි. හේ කය බිඳී මරණින් මතු මිනිස් ලොවෙහි උපදින්නේ ය. හේ එහිදී මිනිසුන්ට අයත් පංච කාම ගුණයන් ලබන සුළු වෙයි.
බ්‍රාහ්මණය, යම් හෙයකින් ඇතැමෙක් මෙලොව දී ප්‍රාණඝාතයෙන් වැළකුණේ වෙයි ද ….(පෙ)…. නිවැරදි දෘෂ්ටියක් ගත්තේ වෙයි ද, ඒ හේතුවෙන් ඔහු කය බිඳී මරණින් මතු මිනිස් ලොවෙහි උපදින්නේ ය. යම් හෙයකින් හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දුන්නේ වෙයි ද, ඒ හේතුවෙන් හේ එහිදී මිනිසුන්ට අයත් පංච කාම ගුණයන් ලබන සුළු වෙයි.
බ්‍රාහ්මණය, මෙහිලා ඇතැමෙක් ප්‍රාණඝාතයෙන් වැළකුණේ වෙයි. ….(පෙ)…. නිවැරදි දෘෂ්ටියක් ගත්තේ වෙයි. හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දෙන්නේ වෙයි. හේ කය බිඳී මරණින් මතු දෙව් ලොවෙහි උපදින්නේ ය. හේ එහිදී දෙවියන්ට අයත් පංච කාම ගුණයන් ලබන සුළු වෙයි.
බ්‍රාහ්මණය, යම් හෙයකින් ඇතැමෙක් මෙලොව දී ප්‍රාණඝාතයෙන් වැළකුණේ වෙයි ද ….(පෙ)…. නිවැරදි දෘෂ්ටියක් ගත්තේ වෙයි ද, ඒ හේතුවෙන් ඔහු කය බිඳී මරණින් මතු දෙව් ලොවෙහි උපදින්නේ ය. යම් හෙයකින් හෙතෙමේ ශ්‍රමණයෙකුට වේවා, බ්‍රාහ්මණයෙකුට වේවා ආහාර පාන, වස්ත්‍ර, පාවහන්, මල් සුවඳ විලවුන්, සයනාසන, ආවාස, පහන් දල්වන උපකරණ ආදිය දුන්නේ වෙයි ද, ඒ හේතුවෙන් හේ එහිදී දෙවියන්ට අයත් පංච කාම ගුණයන් ලබන සුළු වෙයි. මෙසේ බ්‍රහ්මණය, දානය දුන් තැනැත්තාට ද ඵල රහිත නොවේ.”
“භවත් ගෞතමයනි, අසිරිමත් ය! භවත් ගෞතමයෙනි, අද්භූත ය! භවත් ගෞතමයෙනි, යම් දානයක දී දුන් තැනැත්තාට ද එය ඵල රහිත නොවෙයි ද, ඒ දන් දීම කළ යුතු ම දෙයකි. මළවුන් උදෙසා දන් දීම කළ යුතුම දෙයකි.”
“එකරුණ එසේ ම ය බ්‍රාහ්මණය, එකරුණ එසේ ම ය බ්‍රාහ්මණය. බ්‍රාහ්මණය, දන් දුන් තැනැත්තාට ද එය ඵල රහිත නොවේ ම ය.”
“භවත් ගෞතමයන් වහන්ස, ඉතා මනහර ය ….(පෙ)…. භවත් ගෞතමයන් වහන්සේ අද පටන් මා දිවි හිමියෙන් තෙරුවන් සරණ ගිය උපාසකයෙකු වශයෙන් පිළිගන්නා සේක්වා!”
සාදු! සාදු!! සාදු!!!
ජාණුස්සෝණි සූත්‍රය නිමා විය.
දෙවෙනි ජාණුස්සෝණි වර්ගය අවසන් විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an6_10-4-2-11/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M