සැවැත් නුවර දී ය …..
මහණෙනි, සය කරුණකින් සමන්විත වූ භික්ෂුව අනුත්තර වූ සිහිල් බව සාක්ෂාත් කරන්නට අසමර්ථ වෙයි. ඒ කවර සය කරුණකින් ද යත්;
මහණෙනි, මෙහිලා භික්ෂුව යම් කලක සිතට නිග්‍රහ කළ යුතු නම් එසමයෙහි සිතට නිග්‍රහ නොකරයි. යම් කලක සිතට වීර්යය ඉපිද විය යුතු නම් එසමයෙහි සිතට වීරිය ඉපිද වීම නොකරයි. යම් කලක සිත සමාධියෙන් සතුටු කළ යුතු නම් එසමයෙහි සිත සමාධියෙන් සතුටු නොකරයි. යම් කලක සිත උපේක්ෂාවෙන් තැන්පත් කළ යුතු නම් එසමයෙහි සිත උපේක්ෂාවෙන් තැන්පත් නොකරයි. ලාමක අදහස් ඇත්තේ ද වෙයි. සක්කායෙහි සතුටින් බැස ගත්තේ වෙයි.
මහණෙනි, මේ සය කරුණෙන් සමන්විත වූ භික්ෂුව අනුත්තර වූ සිහිල් බව සාක්ෂාත් කරන්නට අසමර්ථ වෙයි.
මහණෙනි, සය කරුණකින් සමන්විත වූ භික්ෂුව අනුත්තර වූ සිහිල් බව සාක්ෂාත් කරන්නට සමර්ථ වෙයි. ඒ කවර සය කරුණකින් ද යත්;
මහණෙනි, මෙහිලා භික්ෂුව යම් කලක සිතට නිග්‍රහ කළ යුතු නම් එසමයෙහි සිතට නිග්‍රහ කරයි. යම් කලක සිතට වීර්යය ඉපිද විය යුතු නම් එසමයෙහි සිතට වීරිය ඉපිද වීම කරයි. යම් කලක සිත සමාධියෙන් සතුටු කළ යුතු නම් එසමයෙහි සිත සමාධියෙන් සතුටු කරයි. යම් කලක සිත උපේක්ෂාවෙන් තැන්පත් කළ යුතු නම් එසමයෙහි සිත උපේක්ෂාවෙන් තැන්පත් කරයි. උතුම් අදහස් ඇත්තේ ද වෙයි. නිවනෙහි සතුටින් බැස ගත්තේ වෙයි.
මහණෙනි, මේ සය කරුණෙන් සමන්විත වූ භික්ෂුව අනුත්තර වූ සිහිල් බව සාක්ෂාත් කරන්නට සමර්ථ වෙයි.
සාදු! සාදු!! සාදු!!!
සීතිභාව සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-2-4-1/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M