සැවැත් නුවර දී ය …..
මහණෙනි, තථාගතයන් වහන්සේට සය වැදෑරුම් තථාගත බල ඇත්තේ ය. ඒ සය වැදෑරුම් බලයෙන් සමන්විත වූ තථාගත තෙමේ ශ්‍රේෂ්ඨත්වය ප්‍රතිඥා දෙයි. පිරිස් අතරෙහි සිංහනාද කරයි. බ්‍රහ්ම චක්‍රය ප්‍රවර්තනය කරයි. ඒ කවර සයක් ද යත්;
1. මහණෙනි, මෙහිලා තථාගත තෙමේ විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දනියි. මහණෙනි, යම් හෙයකින් තථාගත තෙමේ විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
2. තව ද මහණෙනි, මෙහිලා තථාගත තෙමේ අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දනියි. මහණෙනි, යම් හෙයකින් තථාගත තෙමේ අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
3. තව ද මහණෙනි, මෙහිලා තථාගත තෙමේ ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දනියි. මහණෙනි, යම් හෙයකින් තථාගත තෙමේ ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
4. තව ද මහණෙනි, මෙහිලා තථාගත තෙමේ අනේක ප්‍රකාර වූ පෙර විසූ කඳ පිළිවෙල සිහි කරයි. එනම් එක උපතක් වශයෙන් ද, උපත් දෙකක් වශයෙන් ද, උපත් තුනක් වශයෙන් ද, උපත් සතරක් වහයෙන් ද, උපත් පහක් වශයෙන් ද, ….(පෙ)…. මෙසේ කරුණු සහිත වූ, විස්තර සහිත වූ අනේක ප්‍රකාර වූ පෙර විසූ කඳ පිළිවෙල සිහි කරයි. මහණෙනි, යම් හෙයකින් තථාගත තෙමේ අනේක ප්‍රකාර වූ පෙර විසූ කඳ පිළිවෙල සිහි කරයි ද, එනම් එක උපතක් වශයෙන් ද, උපත් දෙකක් වශයෙන් ද, ….(පෙ)…. මෙසේ කරුණු සහිත වූ, විස්තර සහිත වූ අනේක ප්‍රකාර වූ පෙර විසූ කඳ පිළිවෙල සිහි කරන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
5. තව ද මහණෙනි, මෙහිලා තථාගත තෙමේ මිනිස් දැක්ම ඉක්මවා ගිය විශුද්ධ දිව්‍ය නේත්‍රයෙන් ….(පෙ)…. උපදින්නා වූත් සත්වයන් දකියි. ඒ සත්වයන් කර්මානුරූපව පහත් වූත්, උසස් වූත්, මනා පැහැයෙන් ඇත්තා වූත්, විරූපී වූත්, සුගතියේත් දුගතියේත් උපදින අයුරු දනියි. මහණෙනි, යම් හෙයකින් තථාගත තෙමේ මිනිස් දැක්ම ඉක්මවා ගිය විශුද්ධ දිව්‍ය නේත්‍රයෙන් චුතවන්නා වූත්, උපදින්නා වූත් සත්වයන් දකියි ද, ….(පෙ)…. සුගතියේත් දුගතියේත් උපදින අයුරු දන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
6. තව ද මහණෙනි, මෙහිලා තථාගත තෙමේ ආශ්‍රවයන් ක්ෂය වීමෙන් අනාශ්‍රව වූ චිත්ත විමුක්තියත්, ප්‍රඥා විමුක්තියත් මේ ජීවිතයේදී ම තම විශිෂ්ට නුවණින් අත්දැක එයට පැමිණ වාසය කරයි. මහණෙනි, යම් හෙයකින් තථාගත තෙමේ ආශ්‍රවයන් ක්ෂය වීමෙන් අනාශ්‍රව වූ චිත්ත විමුක්තියත්, ප්‍රඥා විමුක්තියත් මේ ජීවිතයේදී ම තව විශිෂ්ට නුවණින් අත්දැක එයට පැමිණ වාසය කරන්නේ ද, යම් බලයකට පැමිණ තථාගතයන් වහන්සේ ශ්‍රේෂ්ඨත්වය ප්‍රතිඥා කරත් නම්, පිරිස් අතරෙහි සිහනද පතුරුවත් නම්, බ්‍රහ්ම චක්‍රය ප්‍රවර්තනය කරත් නම්, එයට හේතු වූ මෙය ද මහණෙනි, තථාගතයන්ගේ තථාගත බලයෙකි.
මහණෙනි, තථාගතයන් වහන්සේට මේ සය වැදෑරුම් තථාගත බල ඇත්තේ ය. ඒ සය වැදෑරුම් බලයෙන් සමන්විත වූ තථාගත තෙමේ ශ්‍රේෂ්ඨත්වය ප්‍රතිඥා දෙයි. පිරිස් අතරෙහි සිංහනාද කරයි. බ්‍රහ්ම චක්‍රය ප්‍රවර්තනය කරයි.
මහණෙනි, ඉදින් එහිලා අන්‍යයෝ විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දන්නා නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දන්නා නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, ඉදින් එහිලා අන්‍යයෝ අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දන්නා නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දත් නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, ඉදින් එහිලා අන්‍යයෝ ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දන්නා නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දත් නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, ඉදින් එහිලා අන්‍යයෝ පෙර විසූ කඳ පිළිවෙල ඒ වූ සැටියෙන් ම දත් නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් පෙර විසූ කඳ පිළිවෙල ඒ වූ සැටියෙන් ම දත් නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ පෙර විසූ කඳ පිළිවෙල ඒ වූ සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, ඉදින් එහිලා අන්‍යයෝ සත්වයන්ගේ චුතිය – උපත පිළිබඳ ව ඒ වූ සැටියෙන් ම දත් නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් සත්වයන්ගේ චුතිය – උපත පිළිබඳ ව ඒ වූ සැටියෙන් ම දත් නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ සත්වයන්ගේ චුතිය – උපත පිළිබඳ ව ඒ වූ සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, ඉදින් එහිලා අන්‍යයෝ ආශ්‍රවයන් ක්ෂය වීම පිළිබඳ ව ඒ වූ සැටියෙන් ම දත් නුවණ පිළිබඳ වූ ප්‍රශ්න තථාගතයන් වහන්සේ කරා එළඹ අසති. මහණෙනි, තථාගතයන් වහන්සේ විසින් ආශ්‍රවයන් ක්ෂය වීම පිළිබඳ ව ඒ වූ සැටියෙන් ම දත් නුවණින් යුතුව යම් යම් අයුරින් දැනගන්නා ලද්දේ ද, ඒ ඒ අයුරින් තථාගතයන් වහන්සේ ආශ්‍රවයන් ක්ෂය වීම පිළිබඳ ව ඒ වූ සැටියෙන් ම දත් ඥානයෙන් ඔවුන්ගේ ප්‍රශ්නයන්ට පිළිතුරු දෙති.
මහණෙනි, එහිලා විය හැකි දේ විය හැකි දේ වශයෙනුත්, නොවිය හැකි දේ නොවිය හැකි දේ වශයෙනුත් ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, එහිලා අතීත වූත්, අනාගත වූත්, වර්තමාන වූත් කර්ම කරන්නවුන්ගේ විපාකය හේතු වශයෙන් ද, තැන් වශයෙන් ද ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, එහිලා ධ්‍යාන, විමෝක්ෂ, සමාධි, සමාපත්ති ආදියෙහි කිළුටු වීමත්, පිරිසිදු වීමත්, නැගී සිටීමත් ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, එහිලා පෙර විසූ කඳ පිළිවෙල පිළිබඳ ව ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, එහිලා සත්වයන්ගේ චුතිය හා උපත පිළිබඳ ව ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, එහිලා ආශ්‍රවයන්ගේ ක්ෂය වීම පිළිබඳ ව ඇත්ත ඇති සැටියෙන් ම දන්නා යම් ඥානයක් ඇද්ද, එය ද සමාහිත සිත් ඇත්තහුට යැයි කියමි. අසමාහිත සිත් ඇත්තහුට නොවෙයි.
මහණෙනි, මෙසේ සමාධිය මාර්ගය යි. සමාධිය නැති බව නොමග යි.
සාදු! සාදු!! සාදු!!!
සීහනාද සූත්‍රය නිමා විය.
පළමුවෙනි මහා වර්ගය අවසන් විය.
එහි පිළිවෙල උද්දානයයි :
සෝණ සූත්‍රය, ඵග්ගුණ සූත්‍රය, ඡළාභිජාති සූත්‍රය, ආසව සූත්‍රය, දාරුකම්මික සූත්‍රය, හත්ථිසාරිපුත්ත සූත්‍රය, මජ්ඣේ සූත්‍රය, පුරිසින්ද්‍රිය ඤාණ සූත්‍රය, නිබ්බේධික සූත්‍රය සහ සීහනාද සූත්‍රය වශයෙන් මෙහි සූත්‍ර දශයකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-2-1-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M