සැවැත් නුවර දී ය ……………….
මහණෙනි, මේ ශ්‍රේෂ්ඨ වූ දේවල් සයකි. ඒ කවර සයක් ද යත්;
දකින දේ අතර ශ්‍රේෂ්ඨ වූ දේ ඇත්තේ ය. සවන් දෙන දේ අතර ශ්‍රේෂ්ඨ වූ දේ ඇත්තේ ය. ලැබීම් අතර ශ්‍රේෂ්ඨ වූ දේ ඇත්තේ ය. හික්මෙන දේ අතර ශ්‍රේෂ්ඨ වූ දේ ඇත්තේ ය. උපස්ථාන අතර ශ්‍රේෂ්ඨ වූ දේ ඇත්තේ ය. සිහිකිරීම් අතර ශ්‍රේෂ්ඨ වූ දේ ඇත්තේ ය.
1. මහණෙනි, දකින දේ අතර ශ්‍රේෂ්ඨ වූ දේ කුමක් ද?
මහණෙනි, මෙහිලා ඇතැමෙක් වටිනා ඇතා ත් දැකීම පිණිස යයි. වටිනා අශ්වයා ත් දැකීම පිණිස යයි. වටිනා මැණික ත් දැකීම පිණිස යයි. උසස් පහත් නොයෙක් දේ දැකීම පිණිස යයි. මිසදිටු ගත් මිසදිටු මගට පිළිපන් ශ්‍රමණයෙකු හෝ බ්‍රාහ්මණයෙකු දැකීම පිණිස යයි. මහණෙනි, මෙබඳු දැකීම් ඇත්තේ ය. මෙය නැතැයි නොකියමි. නමුත් මහණෙනි, මේ දැකීම වනාහී හීන වූ ග්‍රාම්‍ය වූ
පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. විරාගය පිණිස නොපවතියි. නිරෝධය පිණිස නොපවතියි. සංසිඳීම පිණිස නොපවතියි. විශිෂ්ට ඥානය පිණිස නොපවතියි. සත්‍යාවබෝධය පිණිස නොපවතියි. නිවන පිණිස නොපවතියි. මහණෙනි, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් හෝ තථාගත ශ්‍රාවකයෙකු හෝ දකින්නට යයි ද, එය දකින දේවල් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් හෝ තථාගත ශ්‍රාවකයෙකු හෝ දකින්නට යාමක් ඇද්ද, මෙය දකින දේවල් අතර ශ්‍රේෂ්ඨ ම දෙය යැයි කියනු ලැබේ.
මෙසේ දස්සනානුත්තරිය වෙයි.
2. මහණෙනි, අසන දේ අතර යමක් ශ්‍රේෂ්ඨ වන්නේ කෙසේ ද?
මහණෙනි, මෙහිලා ඇතැමෙක් බෙර හඬ ත් ඇසීමට යයි. වීණා හඬ ත් ඇසීමට යයි. ගීත හඬ ත් ඇසීමට යයි. උසස් පහත් දේ ඇසීමට යයි. මිසදිටු ගත් මිසදිටු මගට පිළිපන් ශ්‍රමණයෙකුගේ හෝ බ්‍රාහ්මණයෙකුගේ අවවාද ඇසීම පිණිස යයි. මහණෙනි, මෙබඳු ඇසීම් ඇත්තේ ය. මෙය නැතැයි නොකියමි. නමුත් මහණෙනි, මේ ඇසීම වනාහී හීන වූ ග්‍රාම්‍ය වූ පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. විරාගය පිණිස නොපවතියි. නිරෝධය පිණිස නොපවතියි. සංසිඳීම පිණිස නොපවතියි. විශිෂ්ට ඥානය පිණිස නොපවතියි. සත්‍යාවබෝධය පිණිස නොපවතියි. නිවන පිණිස නොපවතියි. මහණෙනි, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන්ගේ හෝ තථාගත ශ්‍රාවකයෙකුගේ හෝ ධර්ම දේශනාව අසන්නට යයි ද, එය අසන දේවල් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන්ගේ හෝ තථාගත ශ්‍රාවකයෙකුගේ හෝ ධර්ම දේශනාව අසන්නට යාමක් ඇද්ද, මෙය අසන දේවල් අතර ශ්‍රේෂ්ඨ ම දෙය යැයි කියනු ලැබේ.
මෙසේ ත් දස්සනානුත්තරිය වෙයි. මෙසේ ත් සවණානුත්තරිය වෙයි.
3. මහණෙනි, ලබන දේ අතර යමක් ශ්‍රේෂ්ඨ වන්නේ කෙසේ ද?
මහණෙනි, මෙහිලා ඇතැමෙක් දරු ලැබීමකුත් ලබයි. බිරිඳ ලැබීමකුත් ලබයි. ධනය ලැබීමකුත් ලබයි. උසස් පහත් දේ ලැබීමකුත් ලබයි. මිසදිටු ගත් මිසදිටු මගට පිළිපන් ශ්‍රමණයෙකු ගැන හෝ බ්‍රාහ්මණයෙකු ගැන හෝ ශ්‍රද්ධාව ලබයි. මහණෙනි, මෙබඳු ලැබීම් ඇත්තේ ය. මෙය නැතැයි නොකියමි. නමුත් මහණෙනි, මේ ලැබීම වනාහී හීන වූ ග්‍රාම්‍ය වූ පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. ….(පෙ)…. නිවන පිණිස නොපවතියි. මහණෙනි, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් කෙරෙහි හෝ තථාගත ශ්‍රාවකයෙකු කෙරෙහි හෝ ශ්‍රද්ධාව ලබයි ද, එය ලබන දේවල් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් කෙරෙහි හෝ තථාගත ශ්‍රාවකයෙකු කෙරෙහි හෝ ශ්‍රද්ධාව ලැබීමක් ඇද්ද, මෙය ලබන දේවල් අතර ශ්‍රේෂ්ඨ ම දෙය යැයි කියනු ලැබේ.
මෙසේ ත් දස්සනානුත්තරිය වෙයි. සවණානුත්තරිය වෙයි. ලාභානුත්තරිය වෙයි.
4. මහණෙනි, හික්මෙන දේ අතර යමක් ශ්‍රේෂ්ඨ වන්නේ කෙසේ ද?
මහණෙනි, මෙහිලා ඇතැමෙක් ඇත් ශිල්පයෙහි ත් හික්මෙයි. අශ්ව ශිල්පයෙහි ත් හික්මෙයි. රථ ශිල්පයෙහි ත් හික්මෙයි. ධනුශ්ශිල්පයෙහි ත් හික්මෙයි. කඩු ශිල්පයෙහි ත් හික්මෙයි. උසස් පහත් දෙයෙහි ත් හික්මෙයි. මිසදිටු ගත් මිසදිටු මගට පිළිපන් ශ්‍රමණයෙකුගේ හෝ බ්‍රාහ්මණයෙකුගේ හෝ අවවාදයට හික්මෙයි. මහණෙනි, මෙබඳු හික්මීම් ඇත්තේ ය. මෙය නැතැයි නොකියමි. නමුත් මහණෙනි, මේ හික්මීම වනාහී හීන වූ ග්‍රාම්‍ය වූ
පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. නිවන පිණිස නොපවතියි. යම් කෙනෙක් මහණෙනි, තථාගතයන් වහන්සේ විසින් වදාරණ ලද ධර්ම විනයෙහි අධිශීලයෙහි ත් හික්මෙයි ද, අධිචිත්තයෙහි ත් හික්මෙයි ද, අධිප්‍රඥාවෙහිත් හික්මෙයි ද, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතු වෙයි ද, එය හික්මෙන දේවල් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව තථාගතයන් වහන්සේ විසින් වදාරණ ලද ධර්ම විනයෙහි අධිශීලයෙහි ත් හික්මෙයි ද, අධිචිත්තයෙහි ත් හික්මෙයි ද, අධිප්‍රඥාවෙහිත් හික්මෙයි ද මෙය හික්මෙන දේවල් අතර ශ්‍රේෂ්ඨ ම දෙය යැයි කියනු ලැබේ.
මෙසේ ත් දස්සනානුත්තරිය වෙයි. සවණානුත්තරිය වෙයි. ලාභානුත්තරිය වෙයි. සික්ඛානුත්තරිය වෙයි.
5. මහණෙනි, උපස්ථාන කිරීම් අතර යමක් ශ්‍රේෂ්ඨ වන්නේ කෙසේ ද?
මහණෙනි, මෙහිලා ඇතැමෙක් ක්ෂත්‍රියයෙකුට ත් උපස්ථාන කරයි. බ්‍රාහ්මණයෙකුට ත් උපස්ථාන කරයි. ගෘහපතියෙකුට ත් උපස්ථාන කරයි. උසස් පහත් පුද්ගලයන්ට ත් උපස්ථාන කරයි. මිසදිටු ගත් මිසදිටු මගට පිළිපන් ශ්‍රමණයෙකුට හෝ බ්‍රාහ්මණයෙකුට හෝ උපස්ථාන කරයි. මහණෙනි, මෙබඳු උපස්ථානයන් ඇත්තේ ය. මෙය නැතැයි නොකියමි. නමුත් මහණෙනි, මේ උපස්ථානය වනාහී හීන වූ ග්‍රාම්‍ය වූ පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. ….(පෙ)…. නිවන පිණිස නොපවතියි. යම් කෙනෙක් මහණෙනි, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව තථාගතයන්ට හෝ තථාගත ශ්‍රාවකයෙකුට උපස්ථාන කරයි ද, එය උපස්ථානයන් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව තථාගතයන්ට හෝ තථාගත ශ්‍රාවකයෙකුට උපස්ථාන කරයි ද, එය උපස්ථානයන් අතර ශ්‍රේෂ්ඨ වූ දෙයකි. මෙය උපස්ථාන අතර ශ්‍රේෂ්ඨ ම දෙය යැයි කියනු ලැබේ.
මෙසේ ත් දස්සනානුත්තරිය වෙයි. සවණානුත්තරිය වෙයි. ලාභානුත්තරිය වෙයි. සික්ඛානුත්තරිය වෙයි. පාරිචරියානුත්තරිය වෙයි.
6. මහණෙනි, සිහි කිරීම් අතර යමක් ශ්‍රේෂ්ඨ වන්නේ කෙසේ ද?
මහණෙනි, මෙහිලා ඇතැමෙක් පුත්‍ර ලාභය ත් සිහි කරයි. බිරිඳක් ලැබීම ත් සිහි කරයි. ධනය ලැබීම ත් සිහි කරයි. උසස් පහත් වූ ලැබීම් සිහි කරයි. මිසදිටු ගත් මිසදිටු මගට පිළිපන් ශ්‍රමණයෙකු හෝ බ්‍රාහ්මණයෙකු හෝ සිහි කරයි. මහණෙනි, මෙබඳු සිහි කිරීම් ඇත්තේ ය. මෙය නැතැයි නොකියමි. නමුත් මහණෙනි, මේ සිහි කිරීම වනාහී හීන වූ ග්‍රාම්‍ය වූ
පෘථග්ජනයන්ට අයත් අනාර්ය වූ අයහපත පිණිස පවතින දෙයකි. අවබෝධයෙන් එපා වීම පිණිස නොපවතියි. විරාගය පිණිස නොපවතියි. නිරෝධය පිණිස නොපවතියි. සංසිඳීම පිණිස නොපවතියි. විශිෂ්ට ඥානය පිණිස නොපවතියි. සත්‍යාවබෝධය පිණිස නොපවතියි. නිවන පිණිස නොපවතියි. මහණෙනි, පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් හෝ තථාගත ශ්‍රාවකයෙකු හෝ සිහි කරයි ද, එය සිහි කරන දේවල් අතර ශ්‍රේෂ්ඨ වූ දෙයකි. සත්වයන්ගේ විශුද්ධිය පිණිස ත්, ශෝක වැළපීම් ඉක්මවා යාම පිණිස ත්, දුක් දොම්නස් නැති වීම පිණිස ත්, ධර්ම මාර්ගයට පැමිණීම පිණිස ත්, නිවන සාක්ෂාත් කිරීම පිණිස ත් හේතු වෙයි. මහණෙනි, යම් මේ පිහිටි ශ්‍රද්ධාවෙන් යුතුව, පිහිටි ප්‍රේමයෙන් යුතුව, නොසෙල්වෙන පැහැදීමෙන් යුතුව, බලවත් පැහැදීමෙන් යුතුව යම් කෙනෙක් තථාගතයන් හෝ තථාගත ශ්‍රාවකයෙකු හෝ සිහි කිරීමක් ඇද්ද, මෙය සිහි කරන දේවල් අතර ශ්‍රේෂ්ඨ ම දෙය යැයි කියනු ලැබේ.
මෙසේ ත් අනුස්සතානුත්තරිය වෙයි.
මහණෙනි, මේ වනාහී සය වැදෑරුම් ශ්‍රේෂ්ඨ වූ දේ ය.
(ගාථා)
යම් කෙනෙක් ශ්‍රේෂ්ඨ වූ දැකීමක් ලැබුවේ වෙයි ද, ශ්‍රේෂ්ඨ වූ ශ්‍රවණයකුත් කළේ වෙයි ද, ශ්‍රේෂ්ඨ වූ ලාභයකුත් ලැබුවේ වෙයි ද, ශ්‍රේෂ්ඨ වූ හික්මීමෙහි ඇළුණේ වෙයි ද,
උපස්ථානය පිණිස එළඹ සිටියාහු වෙත් ද, විවේකයෙන් යුක්ත වූ බිය රහිත වූ නිවන කරා යන අනුස්සති ධර්මය වඩත් ද,
අප්‍රමාදයෙහි සතුටු වන, අවස්ථාවෝචිත ප්‍රඥාවෙන් හෙබි, සීල සංවරයෙන් යුතු ඔවුහු යම් තැනක දුක නිරුද්ධ වෙයි නම් ඒ නිවන කරා නිසි කලට යති.
සාදු! සාදු!! සාදු!!!
අනුත්තරිය සූත්‍රය නිමා විය.
තුන්වෙනි අනුත්තරිය වර්ගය අවසන් විය.
එහි පිළිවෙල උද්දානයයි :
සාමගාමක සූත්‍රය, අපරිහානියධම්ම සූත්‍රය, භය සූත්‍රය, හිමවන්ත සූත්‍රය, අනුස්සතිට්ඨාන සූත්‍රය, මහාකච්චාන සූත්‍රය, සමය සූත්‍ර දෙක, උදායී සූත්‍රය සහ අනුත්තරිය සූත්‍රය වශයෙන් මෙහි සූත්‍ර දශයෙකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an4_6-1-3-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M