සැවැත් නුවර දී ය ……
මහණෙනි, පවුලක උපදින සත්පුරුෂ තැනැත්තා බොහෝ ජනයා හට යහපත හිත සුව සළසන්නේ වෙයි. මව්පියන් හට යහපත හිත සුව සළසන්නේ වෙයි. අඹුදරුවන් හට යහපත හිත සුව සළසන්නේ වෙයි. දාස කම්කරු පුරුෂයන් හට යහපත හිත සුව සළසන්නේ වෙයි. යහළු මිත්‍රයන් හට යහපත හිත සුව සළසන්නේ වෙයි. ශ්‍රමණ බ්‍රාහ්මණයින් හට යහපත හිත සුව සළසන්නේ වෙයි.
මහණෙනි, යම් සේ මහා වර්ෂාවක් සියළු කුඹුරු සරු කරමින් බොහෝ ජනයා හට යහපත හිතසුව සළසන්නේ වෙයි ද, එසෙයින් ම මහණෙනි, පවුලක උපදින සත්පුරුෂ තැනැත්තා බොහෝ ජනයා හට යහපත හිත සුව සළසන්නේ වෙයි. මව්පියන් හට යහපත හිත සුව සළසන්නේ වෙයි. අඹුදරුවන් හට යහපත හිත සුව සළසන්නේ වෙයි. දාස කම්කරු පුරුෂයන් හට යහපත හිත සුව සළසන්නේ වෙයි. යහළු මිත්‍රයන් හට යහපත හිත සුව සළසන්නේ වෙයි. ශ්‍රමණ බ්‍රාහ්මණයින් හට යහපත හිත සුව සළසන්නේ වෙයි.
(ගාථා)
1. සත්පුරුෂ තැනැත්තා බොහෝ ජනයා හට හිතසුව පිණිස භෝග සම්පත් යොදවයි ද, දෙවියෝ ඔහු රකිති. දෙවියන්ගෙන් රැකවරණ ලත් බහුශ්‍රැත වූ සිල්වත් වූ ධර්මයෙහි සිටි තැනැත්තහුගේ කීර්තිය ඔහු හැර නොයයි.
2. ධර්මයෙහි පිහිටි සිල්වත් වූ සත්‍යවාදී වූ පවට ලැජ්ජා ඇති තැනැත්තා දඹරන් නිකක් සේ බබලයි. ඔහුට ගරහන්නට කවරෙක් නම් සමර්ථ වෙයි ද? දෙවියෝ ත් ඔහුට ප්‍රශංසා කරති. බ්‍රහ්මයා විසිනුත් ඔහු පසසන ලද්දේ ය.
සාදු! සාදු!! සාදු!!!
සප්පුරිස සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an3_5-1-5-2/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M