මහණෙනි, යම් උපක්ලේශයන්ගෙන් කිලිටි වූ රත්‍රන් මෘදු ත් නොවෙයි ද, කිසිදු කටයුත්තකට යෝග්‍ය ත් නොවෙයි ද, ප්‍රභාෂ්වර ත් නොවෙයි ද, වහා බිඳෙන සුළු ත් වෙයි ද, රනින් කරන දෙයකට මැනැවින් සකස් නොවෙයි ද, රත්‍රන්වල ඇති මේ උපක්ලේශයෝ පසකි. ඒ කවර පසක් ද යත්;
කළු ලෝහ ය, ලෝහ ය, ඊයම් ය, සුදු ඊයම් ය, රිදී ය.
මහණෙනි, යම් උපක්ලේශයන්ගෙන් කිලිටි වූ රත්‍රන් මෘදු ත් නොවෙයි ද, කිසිදු කටයුත්තකට යෝග්‍ය ත් නොවෙයි ද, ප්‍රභාෂ්වර ත් නොවෙයි ද, වහා බිඳෙන සුළු ත් වෙයි ද, රනින් කරන දෙයකට මැනැවින් සකස් නොවෙයි ද, රත්‍රන්වල ඇත්තේ මේ උපක්ලේශයෝ පස යි.
මහණෙනි, යම් කලෙක රත්‍රන් මේ පංච උපක්ලේශයන්ගෙන් හොඳින් මිදුණේ වෙයි ද, එවිට ඒ රත්‍රන් මෘදු ත් වෙයි. ඕනෑම කටයුත්තකට යෝග්‍යය ත් වෙයි. ප්‍රභාෂ්වර ත් වෙයි. වහා නොබිඳෙන්නේ ද වෙයි. මුද්දකට වේවා, කුණ්ඩලාභරණයකට වේවා, ගෙලෙහි පළඳන ආභරණයකට වේවා, රන් මාලාවකට වේවා, යම් යම් පළඳනාවක් කැමති වන්නේ ද, එබඳු වූ රනින් කරන දෙයකට මැනැවින් සකස් වෙයි. රත්‍රන්වලින් නියම ප්‍රයෝජනය ලැබෙයි.
එසෙයින් ම මහණෙනි, යම් උපක්ලේශයන්ගෙන් කිලිටි වී ගිය සිත මෘදු ත් නොවෙයි ද, ධ්‍යාන මාර්ගඵලාදී කටයුත්තකට යෝග්‍යත් නොවෙයි ද, ප්‍රභාෂ්වර ත් නොවෙයි ද, වහා බිඳී යයි ද, ආශ්‍රවයන් ක්ෂය වීම පිණිස මැනැවින් සමාධිමත් නොවෙයි ද, සිතෙහි එබඳු වූ උපක්ලේශයෝ පසකි. ඒ කවර පසක් ද යත්;
කාමච්ඡන්දය ය, ව්‍යාපාදය ය, ථීනමිද්ධය ය, උද්ධච්ච කුක්කුච්චය ය, විචිකිච්ඡාව ය.
මහණෙනි, මේ වනාහී සිතේ ඇති උපක්ලේශයන් පස ය. මහණෙනි, මේ පංචවිධ උපක්ලේශයන්ගෙන් කිලිටි වී ගිය සිත මෘදු ත් නොවෙයි. ධ්‍යාන මාර්ගඵලාදී කටයුත්තකට යෝග්‍යත් නොවෙයි. ප්‍රභාෂ්වර ත් නොවෙයි. වහා බිඳී යයි. ආශ්‍රවයන් ක්ෂය වීම පිණිස මැනැවින් සමාධිමත් නොවෙයි.
මහණෙනි, යම් කලෙක සිත මේ පංචවිධ උපක්ලේශයන්ගෙන් මැනැවින් මිදුණේ වෙයි ද, එකල්හී සිත මෘදු ත් වෙයි. ධ්‍යාන මාර්ගඵලාදී කටයුත්තකට යෝග්‍යත් වෙයි. ප්‍රභාෂ්වර ත් වෙයි. වහා බිඳී නොයයි. ආශ්‍රවයන් ක්ෂය වීම පිණිස මැනැවින් සමාධිමත් වෙයි. විශිෂ්ට ඥානයකින් සාක්ෂාත් කළ යුතු වූ යම් යම් ධර්මයන් ඇද්ද, ඒ ඒ ධර්මයන් විශිෂ්ට ඥානයෙන් සාක්ෂාත් කිරීම පිණිස සිත නැඹුරු වෙයි නම්, ඒ ඒ තැනෙහි ඒ ඒ ඥානය ලැබීම පිණිස ඒවා ප්‍රත්‍යක්ෂ කිරීමෙහි සමර්ථ භාවය ඇතිවෙයි.
ඉදින් හේ කැමති වෙයි නම් ‘අනේකවිධ ඉර්ධි ප්‍රාතිහාර්යයන් අත්දකින්නෙමි. තනි කෙනෙක් ව සිට බොහෝ අය වන්නෙමි. ….(පෙ)…. බ්‍රහ්මලෝකය දක්වා කයින් වසඟයෙහි පවත්වන්නෙමි’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
ඉදින් හේ කැමති වෙයි නම් ‘සාමාන්‍ය මිනිස් ශ්‍රවණය ඉක්මවා ගිය විශුද්ධ වූ දිව්‍ය ශ්‍රවණයෙන් යුතුව දිව්‍ය වූ ද, මානුෂීය වූ ද ඉතා දුර ඇත්තා වූ ත් ළඟ අත්තා වූ ත් ශබ්දයන් අසන්නෙමි’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
ඉදින් හේ කැමති වෙයි නම් ‘අන්‍ය සත්වයන්ගේ, අන්‍ය පුද්ගලයන්ගේ සිත තම සිතින් පිරිසිඳ දැනගන්නෙම් නම්, එනම් සරාගී සිත සරාගී සිතක් ය කියා දැනගන්නෙම් නම් ….(පෙ)…. විමුක්ති සිත විමුක්ති සිතක් ය කියා දැනගන්නෙම් ද, අවිමුක්ත සිත අවිමුක්ත සිතක් යැයි දැනගන්නෙම් දැ’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
ඉදින් හේ කැමති වෙයි නම් ‘අනේකප්‍රකාරයෙන් පෙර විසූ කඳ පිළිවෙළ සිහි කරන්නෙමි යි. එනම් එක් ජාතියක් ද, ජාති දෙකක් ද ….(පෙ)…. මෙසේ ආකාර සහිත වූ, විස්තර සහිත වූ නොයෙක් ආකාර වූ පෙර විසූ කඳ පිළිවෙළ සිහි කරන්නෙමි’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
ඉදින් හේ කැමති වෙයි නම් ‘මිනිස් ඇසින් දකින සීමා ඉක්මවා ගිය දිවැසින් ….(පෙ)…. කර්මානුරූප ව උපදින මියයන සත්වයන් දැනගන්නෙමි’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
ඉදින් හේ කැමති වෙයි නම් ‘ආශ්‍රවයන් ක්ෂය වීමෙන් (අනාශ්‍රව වූ චේතෝ විමුක්තිය ත්, ප්‍රඥා විමුක්තිය ත්) ….(පෙ)…. සාක්ෂාත් කොට එයට පැමිණ වාසය කරන්නෙමි’ යි. ඒ ඒ තන්හි ඒ ඒ ඥානය අත්දැකීමට ඒවා ප්‍රත්‍යක්ෂ කිරීමෙහිලා සමර්ථ භාවය ඇතිවෙයි.
සාදු! සාදු!! සාදු!!!
උපක්කිලේස සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an3_5-1-3-3/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M