එකල්හී ආයුෂ්මත් ආනන්දයන් වහන්සේ ආයුෂ්මත් සාරිපුත්තයන් වහන්සේ වෙත වැඩියහ. වැඩම කොට ආයුෂ්මත් සාරිපුත්තයන් වහන්සේ සමඟ සතුටු වූහ. සතුටු විය යුතු පිළිසඳර කතා බහ නිමවා එකත්පස් ව හිඳගත්හ. එකත්පස් ව හුන් ආයුෂ්මත් ආනන්දයන් වහන්සේ ආයුෂ්මත් සාරිපුත්තයන් වහන්සේට මෙය වදාළහ.
“ආයුෂ්මත් සාරිපුත්තයෙනි, මෙලොව ඇතැම් සත්වයෝ මේ ජීවිතයේ දී ම පිරිනිවී නොයත් නම් එයට හේතුව කුමක් ද? එයට ප්‍රත්‍යය කුමක් ද?”
“ආයුෂ්මත් ආනන්දයෙනි, මෙහිලා සත්වයෝ ‘මේ පිරිහීම පිණිස පවතින සංඥාවෝ යැ’ යි ඒ වූ සැටියෙන් ම නොදනිති. ‘මේ ගුණධර්ම පවත්වන සංඥාවෝ යැ’ යි ඒ වූ සැටියෙන් ම නොදනිති. ‘මේ දියුණුව පිණිස පවතින සංඥාවෝ යැ’ යි ඒ වූ සැටියෙන් ම නොදනිති. ‘මේ තියුණු අවබෝධය පිණිස පවතින සංඥාවෝ යැ’ යි ඒ වූ සැටියෙන් ම නොදනිති. ආයුෂ්මත් ආනන්දයෙනි, මෙලොව ඇතැම් සත්වයෝ මේ ජීවිතයේ දී ම පිරිනිවී නොයත් නම් එයට හේතුව මෙය යි. ප්‍රත්‍යය මෙය යි.”
“ආයුෂ්මත් සාරිපුත්තයෙනි, මෙලොව ඇතැම් සත්වයෝ මේ ජීවිතයේ දී ම පිරිනිවී යත් නම් එයට හේතුව කුමක් ද? එයට ප්‍රත්‍යය කුමක් ද?”
“ආයුෂ්මත් ආනන්දයෙනි, මෙහිලා සත්වයෝ ‘මේ පිරිහීම පිණිස පවතින සංඥාවෝ යැ’ යි ඒ වූ සැටියෙන් ම දනිති. ‘මේ ගුණධර්ම පවත්වන සංඥාවෝ යැ’ යි ඒ වූ සැටියෙන් ම දනිති. ‘මේ දියුණුව පිණිස පවතින සංඥාවෝ යැ’ යි ඒ වූ සැටියෙන් ම දනිති. ‘මේ තියුණු අවබෝධය පිණිස පවතින සංඥාවෝ යැ’ යි ඒ වූ සැටියෙන් ම දනිති. ආයුෂ්මත් ආනන්දයෙනි, මෙලොව ඇතැම් සත්වයෝ මේ ජීවිතයේ දී ම පිරිනිවී යත් නම් එයට හේතුව මෙය යි. ප්‍රත්‍යය මෙය යි.”
සාදු! සාදු!! සාදු!!!
පරිනිබ්බාන හේතු සූත්‍රය නිමා විය.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-4-3-9/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M