මහණෙනි, යම් කලෙක රජවරු අධාර්මික වෙත් ද, එසමයෙහි රජුට අනුව කටයුතු කරන්නෝ ද අධාර්මික වෙති. රජුට අනුව කටයුතු කරන්නන් අධාර්මික වූ කල්හී බ්‍රාහ්මණ ගෘහපතිවරු ද අධාර්මික වෙති. බ්‍රාහ්මණ ගෘහපතිවරුන් අධාර්මික වූ කල්හි නිගම ජනපදවාසීහු ද අධාර්මික වෙති. නිගම ජනපදවාසීන් අධාර්මික වූ කල්හී හිරු සඳු දෙදෙන ද විෂමාකාරයෙන් පායයි. හිරු සඳු දෙදෙන විෂම ආකාරයෙන් පායන කල්හී නැකත් තරු ආදිය ද විෂමාකාරයෙන් පායයි. නැකත් තරු ආදිය ද විෂමාකාරයෙන් පායන කල්හී දිවා රාත්‍රී කාලය ද විෂමාකාරයෙන් ගෙවෙයි. දිවා රාත්‍රී විෂාමාකාරයෙන් පවතින විට මාසය, අඩමස ආදිය විෂමාකාරයෙන් ගෙවෙයි. මාසය, අඩමස ආදිය විෂමාකාරයෙන් පවතින විට වසරෙහි ඍතු භේදය ද විෂමාකාරයකට පත්වෙයි. විෂම වූ ඍතු භේදයක් වසර පුරා ඇති කල්හී විෂම අයුරින් සුළං හමයි. නොමගින් සුළං හමයි. විෂම අයුරින් සුළං හමන කල්හී, නොමගට සුළං හමන කල්හී දෙවියෝ කිපෙති. දෙවියන් කෝප වුණු කල්හී නිසි අයුරින් වැසි දහර නොවසියි. නිසි අයුරින් වැසි දහරාවන් නොවසින කල්හී ගොයම් විෂම අයුරින් පැසෙයි. මහණෙනි, විෂම අයුරින් පැසුණු ගොයමින් ලද ආහාර අනුභව කරන මිනිස්සු අල්ප ආයුෂයෙන් යුතු වෙති. දුර්වර්ණ වෙති. දුර්වල වෙති. බොහෝ රෝගාබාධ සහිත වෙති.
මහණෙනි, යම් කලෙක රජවරු ධාර්මික වෙත් ද, එසමයෙහි රජුට අනුව කටයුතු කරන්නෝ ද ධාර්මික වෙති. රජුට අනුව කටයුතු කරන්නන් ධාර්මික වූ කල්හී බ්‍රාහ්මණ ගෘහපතිවරු ද ධාර්මික වෙති. බ්‍රාහ්මණ ගෘහපතිවරුන් ධාර්මික වූ කල්හි නිගම ජනපදවාසීහු ද ධාර්මික වෙති. නිගම ජනපදවාසීන් ධාර්මික වූ කල්හී හිරු සඳු දෙදෙන ද යහපත් ආකාරයෙන් පායයි. හිරු සඳු දෙදෙන යහපත් ආකාරයෙන් පායන කල්හී නැකත් තරු ආදිය ද යහපත් ආකාරයෙන් පායයි. නැකත් තරු ආදිය ද යහපත් ආකාරයෙන් පායන කල්හී දිවා රාත්‍රී කාලය ද යහපත් ආකාරයෙන් ගෙවෙයි. දිවා රාත්‍රී යහපත් ආකාරයෙන් පවතින විට මාසය, අඩමස ආදිය යහපත් ආකාරයෙන් ගෙවෙයි. මාසය, අඩමස ආදිය යහපත් ආකාරයෙන් පවතින විට වසරෙහි ඍතු භේදය ද යහපත් ආකාරයකට පත්වෙයි. යහපත් වූ ඍතු භේදයක් වසර පුරා ඇති කල්හී යහපත් අයුරින් සුළං හමයි. නිසි මගින් සුළං හමයි. යහපත් අයුරින් සුළං හමන කල්හී යහපත් අයුරින් නිසි මගට සුළං හමන කල්හී දෙවියෝ නොකිපෙති. දෙවියන් කෝප නොවුණු කල්හී නිසි අයුරින් වැසි දහර වසියි. නිසි අයුරින් වැසි දහරාවන් වසින කල්හී ගොයම් යහපත් අයුරින් පැසෙයි. මහණෙනි, යහපත් අයුරින් පැසුණු ගොයමින් ලද ආහාර අනුභව කරන මිනිස්සු දීර්ඝ ආයුෂයෙන් යුතු වෙති. වර්ණවත් වෙති. බලවත් වෙති. අල්ප රෝගාබාධ සහිත වෙති.
(ගාථා)
1. ඒකාන්තයෙන් ම එතෙරවන්නා වූ ගොනුන් අතුරින් ප්‍රධාන ගවයා වක්‍ර ව යයි නම්, ඒ ප්‍රධාන ගවයා වක්‍ර ව ගිය කල්හී සියළු ගවයෝ වක්‍ර ව යති.
2. එපරිද්දෙන් ම මිනිසුන් අතුරින් යමෙක් ශ්‍රේෂ්ඨ යැයි සම්මත වෙයි ද, ඉදින් ඒ තැනැත්තා අධර්මයෙහි හැසිරෙයි ද, අවශේෂ ප්‍රජාව ගැන කතා කරන්නට දෙයක් නැත. රජු අධාර්මික වූ කල්හී මුළු රට ම දුකට පත්වෙයි.
3. ඒකාන්තයෙන් ම එතෙරවන්නා වූ ගොනුන් අතුරින් ප්‍රධාන ගවයා ඍජු ව යයි නම්, ඒ ප්‍රධාන ගවයා ඍජු ව ගිය කල්හී සියළු ගවයෝ ඍජු ව යති.
4. එපරිද්දෙන් ම මිනිසුන් අතුරින් යමෙක් ශ්‍රේෂ්ඨ යැයි සම්මත වෙයි ද, ඉදින් ඒ තැනැත්තා ධර්මයෙහි හැසිරෙයි ද, අවශේෂ ප්‍රජාව ගැන කතා කරන්නට දෙයක් නැත. රජු ධාර්මික වූ කල්හී මුළු රට ම සැපයට පත්වෙයි.
සාදු! සාදු!! සාදු!!!
අධම්මික සූත්‍රය නිමා විය.
දෙවෙනි පත්තකම්ම වර්ගය අවසන් විය.
එහි පිළිවෙල උද්දානයයි :
පත්තකම්ම සූත්‍රය, අනණ සූත්‍රය, සබ්‍රහ්ම සූත්‍රය, නිරය සූත්‍රය, රූප සූත්‍රය, සරාග සූත්‍රය, අහි සූත්‍රය, දේවදත්ත සූත්‍රය, පධාන සූත්‍රය සහ අධම්ම සූත්‍රය වශයෙන් මෙහි සූත්‍රයෝ දශයකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-2-2-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M