එකල්හී අනාථපිණ්ඩික ගෘහපති තෙමේ භාග්‍යවතුන් වහන්සේ කරා පැමිණියේ ය. පැමිණ භාග්‍යවතුන් වහන්සේට සකසා වන්දනා කොට එකත්පස් ව හිඳගත්තේ ය. එකත්පස් ව හුන් අනාථපිණ්ඩික ගෘහපතිතුමාට භාග්‍යවතුන් වහන්සේ මෙය වදාළ සේක.
“ගෘහපතිය, සතර කරුණකින් යුක්ත වූ ආර්ය ශ්‍රාවක තෙමේ ගිහි සාමීචි ප්‍රතිපදාවට පිළිපන්නේ වෙයි. පිරිවර සම්පත් ලැබීමට ත්, සුගතියෙහි ඉපදීමට ත්, හේතු වන්නේ වෙයි. කවර සතර කරුණකින් ද යත්;
ගෘහපතිය, මෙහිලා ආර්ය ශ්‍රාවක තෙමේ භික්ෂු සංඝයා හට සිවුරෙන් පිදීම පිණිස එළැඹ සිටියේ වෙයි. භික්ෂු සංඝයා හට දන් පිදීම පිණිස එළැඹ සිටියේ වෙයි. භික්ෂු සංඝයා හට කුටි සෙනසුන් පිදීම පිණිස එළැඹ සිටියේ වෙයි. භික්ෂු සංඝයා හට ගිලන්පස බෙහෙත් පිරිකර පිදීම පිණිස එළැඹ සිටියේ වෙයි.
ගෘහපතිය, මේ සතර කරුණෙන් යුක්ත වූ ආර්ය ශ්‍රාවක තෙමේ ගිහි සාමීචි ප්‍රතිපදාවට පිළිපන්නේ වෙයි. පිරිවර සම්පත් ලැබීමට ත්, සුගතියෙහි ඉපදීමට ත්, හේතු වන්නේ වෙයි.
යහපත් මගට පිළිපන් සිල්වතුන් වහන්සේලා උදෙසා සිවුරු, පිණ්ඩපාත, සයනාසන, ගිලන්පස ආදියෙන් උපස්ථාන කරන නුවණැති ගිහියෝ ගිහි සාමීචි ප්‍රතිපදාවට පිළිපන්නාහු වෙති.
ඔවුන් හට දිවා රාත්‍රී දෙක්හි නිරතුරු ව පින් වැඩෙයි. සොඳුරු වූ පුණ්‍ය කර්මයක් කොට ඔවුහු ස්වර්ගයට යන්නාහු ය.
ගිහීසාමීචිපටිපදා සූත්‍රය නිමා විය.
පළමුවෙනි පුඤ්ඤාභිසන්ද වර්ගය අවසන් විය.
එහි පිළිවෙල උද්දානයයි :
පුඤ්ඤාභිසන්ද සූත්‍ර දෙක, සංවාස සූත්‍ර දෙක, සමජීවී සූත්‍ර දෙක, සුප්පාවාස සූත්‍රය, සුදත්ත සූත්‍රය, භෝජන සූත්‍රය සහ ගිහී සාමීචි සූත්‍රය වශයෙන් මෙහි සූත්‍ර දශයකි.
ධර්මදානය උදෙසා පාලි සහ සිංහල අන්තර්ගතය උපුටා ගැනීම https://mahamevnawa.lk/sutta/an2_4-2-1-10/ වෙබ් පිටුවෙනි.
Ver.1.40 - Last Updated On 26-SEP-2020 At 03:14 P.M